حبيبتي تناهيد
دخلت أطل على المنتدى و أجبرني كلامك أدخل و أرد عليك
شوفي حبيبتي
هالي تكلمك مطلقة مرتين و فوق الثلاثين عمري ، يعني ما أكلمك من برج عاجي
تزوجت مرتين و انفصلت ، كان الثاني منهم حياتي كلها ، طلقني بعد وعود و عهود إن الأمور بتزين و تكون تمام ، ظليت فترة مصدومة ، ثم بديت مثلك أحكي ، ما كان عندي أحد يسمعني كنت أكتب و أخلي الورق عندي ، و كل ما قريته صرت مثل الي تشفى جروحه و ينكأها ، مت موت لفراقه ، كنت مثلك أعيش ساعات يومي على ذكراه ، الحين كنا نسوي و كنا نفعل ، الحين هو كيذا ، كان يتصل كان يدق ، الجمعة أتذكر كل التفاصيل ، وربي بغى عقلي يخف ، عجزت أنساه .
دخلت هنا و كتبت موضوع بعنوان مجرد فضفضة ، و دخلت وحدة و هزأتني لدرجة قالت لي : إنت جعلته إله !!!
مشت الأيام فكرت ، قلت هو عايش مرتاح و أنا هنا أموت كل لحظة ؟!! طيب الحل ؟!
شفت قسم ساعدوني و كانت ردود البليغ مميزة بالنسبة لي ، و لا يهونون الباقين بس يمكن تفكيره قريب من طريقة تفكيري ، استخرت و دخلت و كتبت مشكلتي بدون اهتمام و الله ، قلت على الله رد و إلا خلاص ، طلب مني أكتب له مشكلتي ، و كتبت
أقسم لك بالله إني أدعي لهالأخ بصلاتي و هو ما يدري، لأني لما كتبت بديت أقلص مشكلتي ، أول شيء نصحني فيه أكتب كل إلي أحس فيه و أـخلص منه ، تقولين كلام فاضي أقول لك جربي ، و هذي طريقة معروفة بالتحليل النفسي لابد تحصل إزاحة للمشاعر السلبية شوي شوي ، ممكن تفرغينها بالشكوى لله أو الشكوى للبشر أو بالكتابة على ورقإذا تخلصت من تجاربك السلبية بيفضى مكان للجديد إلي إنت محتاجته ، موضوعي موجود و أخي الفاضل ما زال يتابع معي ، أتعب و أنتكس لكن مو مثل أول ، ثم الله عز و جل ما يبتلي الإنسان إلا بالي يقدر عليه " لا يكلف الله نفسا إلا وسعها " و كل بلاء باطنه رحمة ، و كل شيء يوجد صغيرا فيكبر إلا المصيبة تبدأ كبيرة ثم تصغر ، المعاناة لا بد منها لكنها ما راح تستمر طول العمر !
الحل أجتهد في التخفيف من معاناتي ، كل شيء يذكرني بالماضي أتركه و أنساه مثل المريض إلي يحتاج حمية ، و ترا يا عمري الناس تنفر من الي يظل يشتكي ، كل إنسان مهما كان عنده همومه ، حاولي تكونين بشوشة شوي ، مو مرة وحدة بس حاولي ، سوي القهوة و اجلسي مع أهلك زوري الناس اختلطي ادخلي تحفيظ تابعي البرامج اقرئي ، مو شرط أكون سعيدة عشان أبتسم ، لكن أبتسم لأني واثقة إن ربي بيخليني سعيدة ، و هذا مو سهل و إلا ما كان التبسم صدقة .
حاولي يا قلبي لا يروح عمرك بالحزن الدنيا تمشي يا عمري و ما توقف على فراق أحد و إلا كان ماتوا الصحابة يوم توفي الرسول صلى الله عليه و سلم .
و كلنا هنا أخواتك فضفضي يا حبيبتي بالي تبين و كلنا معك ، المهم تحاولين تساعدين نفسك ، و بتكونين بخير ، و بتنظرين لنفسك باعتزاز إنك تجاوزت أزمتك ، و ربي يسخر لك الي يملك قلبك و تصير كلها ذكريات .
أتمنى ما أكون طولت عليك و أتمنى كلامي يدخل قلبك
قومي الحين غسلي وجهك و صلي ركعتين و اقرئي ألم نشرح و تأملي قوله تعالى " إن مع العسر يسرى "
و ربي معك يحفظ بكل وقت
لو احتجت شيء لا يردك إلا كيبوردك !!
استودعتك الله
نسيت أقول لك :
أكثري من حسبي الله و نعم الوكيل على لسانك على طول
و الاستغفار
و قولي اللهم آجرني في مصيبتي اخلفني خيرا منها

__________________
## مهم ##
هل تتعرضين للابتزاز في الانترنت؟


هنا من ينقذك