إضافه :
انا عمري حالياً 24 سنه وزوجي 29 سنه
مدة زواجنا 3 سنوات .. تزوجنا عن قصة حب "عن طريق المنتدى والماسنجر" ثمرة هالحب "بنوته" عمرها سنه ربي يحفظها
كنت اعرف زوجي 3 سنين قبل زواجي وكنت اسولف معاه اغلب اليوم اذا كنت خارج الدراسه عن طريق المسن .. رسمت صوووره غييير مليانه مغامرات ووناسه معاه واعتقد هو بالمثل
صدمت بالزواج انه روتين غير كذا زوجي حياته "تصفح المنتديات والاخبار .. ومتابعة العربيه والجزيره والقنوات الرياضيه .. ودوام ..وطلعه للتمشي"معاي"
فاقده جو الجمعات بس زوجي او اهلي .. كل شي مؤجل عند زوجي والسبب مادي او مايقدر يرتبط بغير الدوام سواء نادي او معهد يعني يقول وقت فراغي كل يوم غير الثاني نستغله بالتمشي احسن
الجامعه اسجل وانسحب لما يقول مقدر اكمل الرسوم ومرتين تصير الحركه فشلتها من بالي خلاص
مو مقصر بالطلعه ابد ومتى ماقلت بنطلع قال قدااااام
بسسسس بالبيت فاقدته وهذي نقطة زعلي منه .. عايشه مع رجل بجسد بلا روح
يعني بغرفه وحده كننا بمقهى انا ع البي بي ولاب توبي وهو على لاب توبه والتلفزيون وتعببت من هالوضع
اقوله خل لنا وقت خاص فينا نسولف وكذا يستجيب بس احس باله مشغول بالتصفح وده يرجع للنت بالعربي مدمن نت
انا ماجلس ولا خمس دقايق بدون افكر يعني انقهر واموت بقهري داخل وبعدين انفجر فيه وهو يستغرب هالانفجار المفاجى ويقول انتي توك هاديه
مثلا اكون قدامه وانتظره يسولف اجلس ببالي اتذكر ايام اول ووعوده بحياتنا المثاليه و و واقارن واطالع له واتحسر واعصب وفجأه اقوم وافصل لاب توبه واصرخ انت كذاب وش هالحياة ماتحسسس ليه ماتسولف لنا ساعه مافتحت افمك لازم انا اتكلم ولا مافيه امل تبادر ؟ الى متى و و وو اول يسكت
الحين يقول هذا اناا وفكينا من هالسيره واكمل عاد انا مشوار النكد
احس مو راضيه ابد ولاني راضيه اقتنع انه كذا نكمل حياتنا
تعبت اقارن 3 سنين حب ب 3 سنين زواج فرررق
مااظلمه الرجال جدا طيب معاي وحنون وكل ماقلت شي سمي وابشري ومايقول لا
بس فقدت كلامه واحاسيسه وتعبيره وشووقه كان محسسني اني ملاك
امس قلتلو يافلان بسألك انت تعاملني بعاطفه ولاعقل ؟ قال بالاثنين قلت وقبل ؟ قال بعاطفه
قلت ليه قال ماتزعلين قلتلو لا قال لان كنت مفكرك كامله ومالكامل الا وجهه
هنا على طول نزلت دمعتي لاني عارفه انه هذا اللي متعبني
قال قلتلك ماتزعلين قلت مو زعلانه ابكي من نفسي
قال لاانا كامل ولاانتي كامله ولاعاملتك بعاطفه بس بتنازل عن اشياء انا ابيها بس لجل ارضيك
وانا فاهمه قصده انه النت والتلفزيون ذولي اكبر اهتماماته واول يغير عشاني ويطفي النت بالساعات لاقلتله متضايقه
المهم ان اللمعه بعيونه اتجاهي طفت وكل مافكرت هالتفكير ازعل واحس خلاص ماله داعي اكمل معاه خذلت الصوره اللي رسمها عني كل هالسنوات
انا اتكلم احين بس عن سلبياتي يالبليغ لاني جالسه اجلد ذاتي .. انا طيبه ماني نكديه على طول ويدري اني اتنفسه ولا ماكان تحملني
بس ابي ارجع مثل ماكنت بعيونه وعجزززت وتعبت ومليت وكل شي
ساعات ساكتين وبس اطالع له يقول كلمه حلوه ابكي يفكرني مريضه الظاهر بس مايدري اش قد اشتقت لكلامه
نجي لاكبر اغلاطي وهو اللي يبيني اغيرهم اصريت عليه مره يكتب عيوبي وقال هالنقاط لو تتخلصين منهم مابي شي منك ابددد
انا مادري اذا تخلصت منهم هل ببطل اطالبه باللي اتمناه يتخلص منه بعد من اهمال وغيره ولا لا
هذي النقاط اللي ارسلهم لايميلي وقولي كيف اتخلص منهم تدريجيا لاني كل مازعلت اسويهم
اقتباس:
*- ان تكوني مطيعه لي ولاتستفزيني بأوامر تحسسني بأني انا التابع
فلكل رجل قوامه على زوجته فلي انا القوامه عليك
فأنا انسان يبحث عن سعادتك وما افعله لك الا اثبات ودليل لك على حبي لسعادتك
ولامجال لذكرها فأنتي تعرفيني مافعلته في سبيل سعادتك
2- اذا رأيتيني زعلان ومستفز ومعصب الابتعاد عني وخاصه عندما تتحدثين معي وتجديني متنرفز
*
3- الابتعاد كل البعد عن ذكر اهلي فهم خط احمر يجب عليك الابتعاد عن ذكرهم فالشيطان حريص
بان يوسوس لي بقول كلام لا احب قوله عن اهلك وهم اهل لي وانما يوسوس لي لفعل الشي لردة الفعل
4- معك فلوس رزقك الله الى الدهر (ولاكن لاتمدي يدك لي بفلوس وتمنيها فالاولى ان تصرفيها عليك فهي من اهلك وان ساعدتني بشي لاتذكريه بتاتا)
فلا يوجد مجال لان الانسان يمن مايدفعه للطرف الاخر فلكل منا معروف للاخر
*
5- عدم ذكر مانفعله لاحد غير اهلك سواء من طلعات او امور شخصية وخلافات تحدث بيننا ولا احب ان ندخل اهلنا بخلافاتنا الشخصية
6- انا انسان ميسور الحال وانتي اعلم بهذا الشي ويقول المثل مد لحافك على قد رجولك وافهم يافهيم
7- لاتجعلي البيت لي سجن فأتركي لي ما احب فعله
فأنا سعيد لفراقي الدورة العسكرية فلا ترجعي لي الاحكام العسكرية بتصرفاتك كمسئولة في البيت
اذا ما اعجبك شي بتصرف لي مثل رمي ملابسي بمكان
*ما خذيه لاي مكان ولاكن بدون اخباري
والبعد كل البعد عن اخذ مفاتيح البيت لاتحسسيني اني طفل
|
الحين صحى من النوم وقال البسي بنطلع نتمشى ووجهي مليان دموووع قهر من حالي
وارجع اقووول انا صوره مغاااااااااااااااايره تماما لكل اللي ذكرته لما اكون رااااضيه بس من اشيل بقلبي عليه يطلع كل اللي بقلبي متراكم
بطلع الحين واتمنى ماكتبته يساعدك بتوجيهي اكثر
كل الشكر
احترامي
__________________
(وَقُل لّعِبَادِي يَقُولُواْ الّتِي هِيَ أَحْسَنُ إِنّ الشّيْطَانَ يَنزَغُ بَيْنَهُمْ إِنّ الشّيْطَانَ كَانَ لِلإِنْسَانِ عَدُوّاً مّبِيناً) الإسراء"53"