أمي تفرق بيني وبين إخواني ولاترضى علي مهما فعلت
السلام عليكم
اول موضوع لي في هذا المنتدى الرائع بصراحه لمن قريت فيه دفعني اكتب مشكلتي الي
ملييييييييييييييييييييييييييييييييييييييييييييييت وانا عايشتها
مشكلتي هيه انا ابلغ من العمر 25 غير متزوجه والحمدلله متعلمه ومتخرجه من الجامعه
الحمدلله اصلي واصووم واتصدق
ولاكن مشكلتي في امي الوالدة الله يحفظها
كلامها وطريقة تعاملها معي تدفعني للجنون ولا اخبي عليكم تدفعني احياانا للانتحار
مايعجبها شي ومعاملاتها فيها تفرقه بيني وبين اخواني ادري البعض بيقول اني حساسه جدا لا والله بس تعاملها فيه تفرقه بيننا
واحيان تعايرني اني غير متوظفه وغير متزوجه مع العلم اني جميله جدا وفيني ميزة خفة الدم بس لايتقدم لي الى اشخاص سمعتهم سيئه جدا
وانا بصراحه مابغى ارمي نفسي مع اني افكر احيانا لو اني اوافق افضل من الكلام الي اسمعه
ولاكن كل شي مقدر
وكل واحد ياخذ نصيبه بالدنيا
ولاكن الوالده عندي الله يهديها لدرجة ان برمضان الي راح كلمت اخوي وجا يهاووشها وطبع اخوي ذا انه عصبي مره
المهم جا يهاوشها وتهجم عليها كان بيضربها بس على طول وقفت بووجهه وتهاوشت معه عشان لايمد ايده عليها
ولمن شافني وقفت بوجهه طنش وطلع من البيت تصدقووون بالله لمن طلع قلت الله لايردك سمعتني امي
وقعدت تدعي علي ماخلت دعوه الى دعت علي فيها ولمن قلت لها ليش كذا ؟؟
قالت هذا ولدي عسى فيك وفيك الخ ...
بصراحه ماتحملت بكيت بس سبحان الله ماخلص اليوم الى دعوتها صااابت بس مو فيني في واحد من اخواني
وصارت امي تصوووم النهار والليل بعد لمن شافت اخوي تعبان تعبت معه ولمن تعافى وصار بخير صارت هوووشه ثااانيه وعلمت ابوي على الهوشه وامي جات بدل ماتدعي لي دعت علي برضه عشان مين عشان اخوي الي يسبها ويمد يده عليها
ولمن دعت ذي المره جات الدعوه فيها وتعبت ودخلت المستشفى وجلست فيها اسبوعين ويشهد علي الله اني اخلص شغل البيت اروح لها ازورها لان الزياره محدده وقتها واخوي مو داري عنها وتعب شغل في بيتنا كل شغل البيت علي وغير كذا عندي اخواني اثنين متزوجين وعايشين معنا بنفس البيت بس كل واحد شقه مستقله
وامي تنزلني اكرف في بيوتهم بحجة ان زوجاتهم مايعرفون للنظافه والمشكله امي تقول انهم احسن مني
انا بصراحه تعبت من الوضع ابوي زمان كان كذا معي يمد يده ويهاوش على اي شي بسبب او بدون
بس ماتحملت وواجته وقلت له ماتبيني او اني كنت غلطه بحياتك مع اني مو مقصره من ناحيتهم بشي
فوديني دار التربيه وريح راسك وريحني وقلت له اني اكرهك لان تعاملك معي فيه تفرقه بيني وبين اخواني
لمن قلت له كذا تغير 180 درجه
صار يوقف معي بكل شي وهذا الشي الي مصبرني لين الحين بس امي وش الحل معها تعبت منها
تدق بالكلام وكل شي مايبان في عينها واي شي تبيه انفذه لها ولمن يمرض احد من اخواني تبغاني اقوووم بكل شي معه ولمن اتعب انا قسم بالله ولاحد يطالع فيني حتى
حتى امي تقلي خذي بنادول وقومي
وش الحل مع العلم اني صرت اكره عائلتي اتمنى اني اتزوج وافتك اختي تزوجت وكل يوم مشاكل مع زوجها وصارت تجلس عندنا وانا اقوم بكل شي حتى ببنتها احس صار عندي بنت وانا ماتزوجت
وزمان كانت تروح تتمشى هي وزوجها واخواني ويرمون عيالهم عندي يعني كل ذا ومايملي عين امي
لمن اشتكي لها الوضع تقلي اجل وش نبي فيك
تكفوووون شوفولي حل بمشكلتي لاني تعبت وما اخبي عليكم فكرة الانتحار تروح وتجي ببالي ليته مو حرام كان من زمان ريحت عمري
التعديل الأخير تم بواسطة روح المساء ; 14-11-2011 الساعة 08:30 PM