اقتباس:
المشاركة الأصلية كتبت بواسطة محبة القران22
ابغي اكون قوية العزيمة والارادة
ابغي ادلل زوجي اشعر اني مقصرة معة كثيرا
اشعر اني اعيش حياة فوضوية،، روتينية ويتسرب الي الملل والتكتئاب كثيرا
|
وعليكم السلام ورحمة الله وبركاته ..
هلا حبيبتي ... وحشتيني 
يا حلوه .. اتمنى تكونين بخير وعافيه
اجمل شيء انك حاسة بتقصيرك وعارفه اسبابه ... واللي اقتبسته من كلامك هو المشكلة ولازم
نشوف لها حل ...
شوفي حبيبتي قبل كل شيء ... قوي علاقتك مع رب العالمين واكثري من الدعاء بأن الله يوفقك
ويعينك على اسعاد زوجك اللي يستاهل منك كل خير ..
قلت لك قبل اذا تذكرين ... ان كل لحظة تعيشينها في هذه الدنيا نعمه ... استغليها بارضاء الله واسعاد
زوجك واطفالك ومن حولك وبذلك بتكونين سعيده ومرتاحه بإذن الله ..
تغيير الروتين سهل بس لازم تكون عندك ارادة قوية وعزيمة ... والارادة القوية تأتي اذا فكرتي بجدية
اذا جربتي وارتحتي من التجربة بتكملين ... اما وضعك الحين صحيح مضايقك لكنه مضايق اللي حولك
بعد ...
اهم خطوة التنظيم والتخطيط ..
اذا كانت حياتك منظمة الامور كلها بتمشي تمام بإذن الله ( عن تجربة )
نظمي وقتك بحيث يكون مقسم للبيت واعماله ، للاطفال ، لنفسك ، ولزوجك .... ولنفسك قبل زوجك
لانك اذا كنتي تعبانة ومرهقة ومتضايقة ما بتقدرين تسعدين زوجك ...
شوفي ... عندي صديقة كانت في مثل حالتك .. اقترحت عليها هذا الاقتراح ,,, وانتي جربيه
خصصي مثلا : من الساعة 8 الى 10 صباحا لأعمال البيت ، والطبخ وجهزي اغراض الطبخ بالليل
علشان ما ياخذ منك وقت طويل الصبح ... بعدها خذي راحة ساعة ( ممكن تلعبين مع الاطفال - تشربين شاي او عصير او حتى تاكلين تفاحه او اي فاكهة او سلطة وتتفرجين على برنامج او تصلين
ركعتين او تقرأين شي من القرآن او حتى تمارسين تمارين اليوجا بتحصلينها في اليوتيوب وايد مريحه
ومفعولها رااائع انا امارسها من سنين او اي تمارين رياضية مناسبة للاسترخاء ) ....
الالعاب اللي ممكن تلعبيها مع اطفالك ( لعبة المخدات ... الالوان خليهم يرسمون لو هم صغار وارسمي
معاهم .... لعبة المسابقات بأنواعها ... عوديهم على شغل البيت مثل : ارجاع الالعاب لاماكنها وعطيهم
هديه او جائزة ايس كريم او حلوى ... صدقيني مع الايام بيتشجعون وبيتعودون على العمل .. انا
عودت عيالي من هم صغار علشان جذي ما احتجت لشغاله طول فترة زواجي الحمد لله ) 
بعد الساعة المحددة .... تاكدي انك انتهيتي من كل الاعمال المنزلية ... وعودي اطفالك على قيلولة
الظهر وحبذا لو تكون خلال هالفترة من 11 الى 1 الظهر .. وخذي لك دش ... وتزيني
واستعدي لاستقبال زوجك ... اذا لقيتي وقت اضافي ... شوفي شو هي هواياتك او اهتماماتك ومارسيها
شوفي شو الشي اللي انتي متميزة فيه واهتمي فيها واعمليه ... مثلا : اذا شاطرة بالطبخ شاركي
بالمنتديات واعرضي طبخاتك او سوي لك موقع خاص فيك واعرضي اكلاتك .. وهكذا ..
استقبلي زوجك باحلى استقبال ... دائما قولي في نفسك ..( زوجي يستاهل مني كل خير لانه مش
مقصر معاي ) خافي الله فيه ... وارضيه لو بابتسامة طيبه ...
استقبليه بماء دافئ في وعاء حلو ليضع رجليه فيه .. من تعب العمل ... او استقبليه بعصير ..
بضمه او بوسه على الراس والدعاء ... هذا الشيء يسعد الزوج وينسيه كل التعب ...
جهزي له الغداء وتكلمي معاه بأمور عمله او معلومات قرأتيها تناقشي معاه في امور جميله ومفيده
وابتعدي عن المشاكل وفلانه قالت وفلان قال ...
اذا زوجك من النوع اللي ينام الظهر فما في مانع تاخذين لك قيلولة انتي بعد علشان ترتاحين ..
وقت العصر جهزي لخطة لتغيير الروتين .. رحلة لحديقة او اي مكان ... لعبة مع الاطفال باشتراك
الزوج ...
اذا حبيتي تجهزين العشاء خلي اطفالك يشاركونك في المطبخ مع زوجك ... وطبقي خطتي يوم ابغي
اغير الروتين العب مع اطفالي وزوجي لعبة والخسران يدخل يجهز معاي العشاء ..
لا تعودين عيالك على السهر ... عوديهم ينامون من الساعة 7 او 8 بالكثر
فكرة خالة قرين حلووووه ... حددي يوم تاخذين فيه الاطفال الى حضانة كمن ساعة وجهزي مفاجأة
لزوجك واقضي معاه وقت سواء في البيت او الخارج ... يعني بين فترة وفترة طبقي هالفكرة ..
دللي زوجك بالمساج ، والكلام الجميل ، والافكار المبتكرة وانا حاضرة اذا بغيتي بعض الافكار ..
ودائما فكري حبيبتي ... ان زوجك بمواصفاته نعمه ما شاء الله فقدري هذه النعمه ... فالنعمه زواله
التحكم بأعصابك ونفستك بإيدك بس قوي علاقتك مع الله ... وتصرفي بعقل ..
واذا حبيبتي افيدك اكثر حطي جدولك اليومي ... وان شاء الله ارتب لك اياه ...
واسأل الله ان يفرج همك ويوفقك ويسعدك حبيبتي ... ويحفظ لك زوجك وعيالك يارب ..
__________________
للاطلاع والاستفاده : 1 ، 2
التعديل الأخير تم بواسطة ][ لمني بشوق ][ ; 17-11-2011 الساعة 11:25 AM