كلمتني الوالده
قبل كم يوم وقالت اني لقيت لك وحده بنت حلال ونفس المواصفات الي تبيها
طبعاً كلعاده انا محبط ولا اهتميت كثير لكلام الوالده لاني ادري ان اخر شي بترفض البنت اول ماتسمع انها بتعيش مع امي
فاقلت لمي يابنت الحلال أجلي الموضوع هذا لاني بصراحه مليت
كل يوم جايبه وحده والحلقه الاخيره تهون
قالت امي صدقني ان هذي البنت غيير البنات الي تعرفهم
قلت يايمه ماطاح الا انبطح لاتحرجين نفسك وتحرجيني معاك مهوب لازم انا شكلي بتزوج من برى
وفعلاً انا تقريباً بنسبة 60% نوية اتزوج من برى
ومع اني في قرارة نفسي ماودي بس مجبر اخاك
بعدها سافرت للعمل
وقعدت هناك اسبوعين وفي هذي الاسبوعين قاعد افكررر افككررر
يعني عشان استر نفسي لازم اسكن في بيت لحالي واترك امي ؟؟
لحول ولا قوة الا بلله
صدقوني ياجماعه اني تعبان نفسياً
والشي الي ادهي من هذا اني اشوف قدامي مغريات وامور (( لاتعليق ))
الى متى وانا بقعد اصارع نزواتي ؟
معقوله كل الكلام الي كانو يقولونه (( بنات الحلال واجد ومالين البيوت ))
انا اشك في هذه المقوله والي قايلها كذاب
المهم رجعت للرياض
وسلمت على الوالده وتقهويت معها
وقالت ترى عمك شايف لك وحده ويبيك تمره الليله
قلت خير ان شاء الله
رحت لعمي
وشرح لي الموضوع
وقال هي موافقه ومتقبله وضعك
<< حسيت ان فيني عاهه يوم انه يقول متقبله وضعي
قلت ياعمي منهي ومدري شلون
قال روح انت وشوفها وبعدين يصير خير
اثر عمي مخطط كل شي قبل مااجي لكن مااخفيكم اني رايح بدون نفس وحتى اني مو فرحان ابد
دقيت على ابو البنت ووصف لي البيت
ورحت
يوم الاربعاء بعد العشاء
لبست وشخصت معة اني مابي اتشخص
وصلت لبيتهم وسلمت على ابوهم
وقعدت معه ونسولف والخ
بس فيه بعض الرجال تحس انه ثور
اسلوبه قديم وطريقة كلامه بايخه يلمح لي وش تسوي بسفر ؟
قلت له ابشرك منيب راعي خرابيط
انا اسافر للعمل بس مو لزي ماتعتقد
مااخفيكم سراً اني كاره الروحه لهم وكاره شي اسمه زواج
يعني في حاله نفسيه سيئه ومو ناقص فلسفه
قلت له طيب تامرني شي يابو فلان
قالي وين بتروح قلت ياخوي وراي شغل وشكلك مشغول .. اجيك يوم ثاني ههههههه
قالي ماتبي تشوف البنيه
قلت يكفي ابوها ونعم اكيد بنيته ونعم
انا بيني وبينكم مابي اشوف احد ولا ابي شي
ابي افتكك واطلع احس اني مكتوم وبزارينهم مزعجين اشكال يعني لاتعليق
قالي انتظر شوي
راح مسرع ودخل جوى وانا قاعد اتعوذ من ابليس
مدري وش الي جاني صرت متنرفز وشوي اطق ابوهم
قالي البنت بتجي وانا بخليكم تاخذون راحتكم
دخلت البنت
وقالت السلام عليكم
وعطتني العصير وقعدت
وانا ساكت وهي ساكته
كانت تتوقع تنتظر اني اتكلم بس ماتكلمت سكت
طبعاً هي توهقت
ناظرتها وقلت شلونك
قالت بخير
قلت لها تدرسين ولا موظفه
قالت الاثنين
قلت اممم حلو الله يوفقك
سألتني سؤال مدري وش يبي
قالت وش طمووحك في البنت الي تبي تتزوجها
رديت عليها قلت تكون مسلمه
ناظرتني وضحكت يوم ضخكت انا ارتحت شوي
وقلت لها شوفي يا بنت الناس انا وضعي كيذا كيذا كيذا
لك جناح خاص وكل شي تبينه اعطيك اياه بس اهم شي تتقبلين وضعي على اساس مايخفى عليك شي
قالت الله يكتب الي فيه الخير
بنسبه لشكل ابنت عاديه جداً
مافيها شي ملفت احسن ماعجبني فيها انها هاديه وذكيه يعني كانت حذره مني
وخصوصاًُ في الكلام لان الواضح انها ماخذه فكره عني وعن معاناتي في البحث
طلعت من عندهم وسلمت على ابوها ورحت البيت
قالت امي بشر
قلت مدري يايمه
شكلها بنت حلال وسنعه
الله يكتب الي فيه الخير
بس انا مستغرب ماعمري فرحت ونا رايح اشوف وحده الا في مره وحده وراح اذكرها لكم
كلمني عمي من بكره
وقال ترى البنت موافقه بس تبي بيت لحالها
قلت عمي قلهم الله يستر عليكم مابيهم
سكرت الخط
يتبع وقصتي مع البنت المطلقه