هلا حبيبتي ... الحمد لله البنوتات بخير .. ومشكووووره على الدعاء .. وجزاك الله كل خير
انصدمت من جدولك لكني فرحت لان فيه وقت فراااااغ كبير ... والحل سهل بإذن الله لان الخطأ الكبير اللي سبب كل
هذا الخلل هو السهر بالتالي الاستيقاظ بوقت متأخر ...
شوفي نبدأ اولا بالاطفال ...
اعمار اطفالك صغيرة الله يحفظهم ... فلازم النوم يكون الساعة 7 او 8 المساء بالكثير ... السهر لطفل عمره 3 سنوات
او سنة متعب جدا ... وعادة سيئة ...
شوفي عطيهم العشاء الساعة 7 مساء ... وحمميهم ... وعلى طول حطيهم في الفراش ... بيرفضون طبعا لانهم متعودين
على السهر لكن طنشيهم بس خليهم في الفراش اذا تركوا الفراش رجعيهم بدون كلام لا تتكلمين معاهم او تشوفينهم ..
لو يبكون طنشي .. بيتفاجئون بالتغيير لكن بيرضون فيه بعدين ..
بتتعبين اول يومين وبعدين بيتعودون ... نفس الطريقة للقيلولة ... القيلولة لازم تكون ساعة او ساعتين تبدأ من الساعة
11 الصبح ... الى الساعة 1 بالكثير ... لا تخلينهم ينامون الظهر من بعد الساعة 1 ابد ...
اشغليهم طول اليوم ... باللعب والرسم والمسابقات والتلوين والعبي معاهم شوي وانشغلي عنهم شوي .. ممكن تطلعين
معاهم للحديقة او اي تمشية ... علشان يوصلون للساعة 6 او 7 مساء وهم مرهقين ويبون ينامون ...
فإذا ناموا بكير بيصحون بكير بالتالي بيتصلح جدولهم ...
الحين دورك وخلي جدولك يكون كالتالي :
تصحين الساعة 8 تقريبا .. او مع دوام زوجك ... تجهزين الفطور لزوجك وتفطرين معاه ... بعدها تكونين مجهزة
اغراض طبخ الغداء بالليل اسهل لك ويوفر وقت ( مثل تقطيع الدجاج او اللحم والخضراوات او اي شيء ياخذ منك وقت )
يكونون الاطفال صحوا من النوم اكليهم وعطيهم أي لعبة ينشغلون بها او حتى خليهم يتسلون معك في ترتيب البيت ..
ابدئي برتيب البيت من تنظيف الغرف والحمام والملابس ... بخري البيت وعطريه ولو تشغلين ( سورة البقرة ) بصوت
خفيف بالبيت يكون اجمل ويريح الاعصاب ..
تحدي نفسك بتخصيص مدة ساعة ونص الى ساعتين بالكثير لأعمال البيت .. ولازم تخلصين كل شي في هذي الفترة .. بعدها خلصي الطبخ .. واكلي عيالك وعلى طول خليهم ياخذون قيلولة ... وانشغلي بنفسك ..
تزيني وجهزي نفسك لوصول زوجك .. خلالها ممكن تنشغلين باليوجا او أي هواية او قراءة القرآن او مشاهدة التلفاز ..
لما يوصل زوجك استقبليه بأحلى ابتسامة وبكوب عصير مثلا .. جهزي له الحمام ( عزك الله ) وملابس البيت ..
وخلال انشغاله جهزي الغداء ... وطبعا لازم تصحين عيالك ... قبل الساعة 1 الظهر ...
بعد الغداء زوجك بياخذ قيلولة نظفي الصحون وجهزي شاي لزوجك لما يصحى الساعة 5 ... خلال هذا الوقت ممكن
تنشغلين بأي نشاط او لعب مع العيال او تنشغلين بالنت ... شوفي شو هي مواهبك واهتماماتك وطوريها واستغليها ..
لما زوجك يروح الدوام الساعة 5 ... رتبي اي شي يحتاج له ترتيب بالبيت .. وجهزي العشاء لزوجك واشغلي اطفالك
معاك .. خليها تكون مثل اللعبة لهم ... اطلبي منهم احضار الخضار مثلا حتى لو ما يفهمون علميهم حتى لو يغلطون
ترا والله بتحسين بمتعه معاهم ... بعد العشاء .. اكليهم وحمميهم وعلى طول ليهم ينامون ... وان شاء الله بينامون بسرعه
لانهم مرهقين وصاحين من الصبح ... دورك تجهزين نفسك ... وجهزي لزوجك وعاء في ماء دافى لرجله .. او تدليك
بسيط وسريع ... استقبليه استقبال حلو واحلى شي الابتسامه والضمه والدعاء او ( اشتقتلك حبيبي .. يعطيك العافيه ..)
جهزي له العشاء .. وبعد العشاء هو بيروح ينام .. وانتي جهزي اغراض الطبخ لليوم الثاني .. وعلى طول على الفراش
اصلا بتكونين مرهقة ومشتاقة للنوم ... يعني لا تسهرين ... انشغلي بالنت خلال النهار ... على الاقل اذا نمتي بكير
ممكن تستيقضين لقيام الليل والله بترتاحين نفسيا ..
هذا برنامج بسيط ... ممكن تغيرينه بالنسبة للاطفال ما بين الالعاب والطلعات ..
بالنسبة لك ... ما بين الرياضة والنت والهوايات والصلاة والقرآن واللعب مع الاطفال .. ( ارجع اكرر شوفي الشي اللي
انتي موهوبة فيه وطوريه ) ..
بالنسبة لزوجك ... خلي المفاجآت والجلسات الرومانسية في الاجازات ... لان اتضح لي من كلامك ان دوام زوجك على
فترتين يعني وايد وايد متعب ... خططي له لاجازة حلوة بتطبيق بعض الافكار ...
اذا تبين تدلعين زوجك ... فاستخدمي الرسائل القصيرة ووزعيها .. مثل : رسالة في جيبه فيها كلمة احبك او في محفظته..
وردة في سيارته او خزانة ملابسه ... رسالة صغيرة مع كوب الشاي مثلا ... اذا رحت معاه لمطعم اطلبي منهم يحضرون
كعكة باسمه كمفاجأة ... اطلبي من أي مطعم يوصل له اي وجبة للعمل كمفاجأة منك ...
اجلسي معاه وعبري عن شعورك له واشكريه على جهوده وعلى اخلاقه وعلى طيبته معك .. اكثري كلمات المدح والشكر
اكثري من التدليك لانه عمله متعب ...
اتمنى اني افدتك حبيبتي ... ولا تنسين التجديد المستمر اهم شي الارادة والعزيمة وادعي الله يعينك ويوفقك في اسعاد
زوجك وعيالك ..
وأي سؤال او ملاحظة انا حاضرة ... ربي يسعدك ويوفقك ..