عزيزتي خالة جرين

مانقدر نسأل الدكاترة.. اول شي لانه اخوي عنده كل الاخبار و متكتم ..
تاني شي، صعبببببببب و نفسي ما تقبل ..

احساسي كأني عايشة بحلم و بأصحى منه ..
حاسة بتقصير جهة امي و ماني عارفة ايش اقدم لها ؟
و هي ماتطلب مننا شي، فما اعرف ايش نفسها فيه ؟؟؟

اذا جبت اي شي للبيت، تزعل و تقول لا تجيبي شي ..
اذا طبخت، ماتاكل و تقول اطبخي على قدك ..
اذا حطيت يدي عليها عشان اكبسها او امرخها، ما اعرف ايش تسموها
تقولي يكفي .. أقولها لو تعبت باتكلم، بس ماترضى تخليني ..
صوت، ما تبغى صوت ..
دورت لها عن شيخ يرقيها، بس مافيها حيل تروح له، و اخوي مايرضى
انه الشيخ يدخل البيت و مافيها رجال ..

ايش بيدي اقدم لها ؟؟؟

و بأسمع كلامك و بأتصل لاخوي اللي مسافر برة و اقول له متى اجازتك ؟
عشان يحاول ينزل .. مابغاه يقلق لانه عنده اختبارات دحين

و اختي اللي بمدينة تانية، أقولها تنزل الفترة هذه اذا تبغى !
بس قلت لك وحدة من اخواتي، لسانها ماتمسكه و تغلط دائماً و ما تفكر بكلامها
قبل اسبوعين، تقول لامي .. فلانة اللي تقرب لزوجي حالتها كانت زي حالتك قبل لا تموت
و قريبة زوجها ماتت بنفس المرض، و اختي ما فكرت وقتها ؟ انه امي نفسيتها بتتعب اذا سمعت كذا ؟