خالة جرين ..

هي ترتاح اذا قرينا عليها اي أدعية او آيات .. أمي ماشاء الله تحب الاذكار و تحب الخير ..
بس اصوات تلفزيون او اي قراءات بتنزعج.. حتى مرة كنت بأكل خيارة، طالعت فيا و تقولي
متى تخلصي ههههه ؟ و امس تأشر لاختي انه خلاص روحي بيتك .. ماتبغى صوت
و اليوم اخوي بس راح لها و خالتي معاها من كم يوم مرافقة لها ..

هي تاخد راحتها اكثر مع خالتي، و يمكن تبكي و تظهر دموعها بسسسس قدام خالتي
لانه قبل شهرين امي قالتلي انها اتصلت على خالتي و جلست امي تبكيييييييي و خالتي تصبرها
و تعاتبها انه لا تبكي و لا تعملي كذا، هذا اختبار من ربنا و زي كذا .. و وقتها عرفت انها ترتاح
لخالتي اكثر مننا ؟ مادري ليه ؟؟؟

زي ماقلت من قبل، امي مستحيل نشوف دموعها.. و السنة اللي فاتت اول مرة ادري من اختي
انه امي بعد ما رجعت من زواجي أنا، جلست بالبيت تبكيييييييي و تشهق من البكا كأنه احد مات ..
مع انه بزواجات أخواتي، امي كانت تنبسط انهم تزوجوا
حتى اول 3 سنوات من زواجي، أمي كانت تنقهررررررر اذا سمعتني أتكلم عن زوجي و قالتلي مرة اخوي
امك تغار عليك من زوجك، و من يومها بديت اراعي الشي هذا و بدأت امي تحب زوجي و توصيني عليه


الصراحة، مو لانها امي .. بس ماافتكر امي بحياتها أذت احد او اساءت له ..
خدمت أبوي الله يرحمه و مات راضي عنها، خدمت حماتها و أمها و أبوها كان دايم يدعيلها
انه ربي يطول بعمرها ، و عماتي كانوا دايم يضايقوا امي بشبابها و هي تردلهم بإحسان
و دحين هم اكثر ناس زعلانين عليها و مرة عمتي دقت علي و تسألني بالله اذا امي زعلانة منها ؟
او شايلة بقلبها عليها و عماتي دايم يقولوا ماشاء الله امكم من بعد وفاة أبوكم الله يرحمه.. تحملت
و ربتكم احسن تربية و مافكرت بنفسها ..

امي بس قسوتها علينا نحن بناتها ثم أولادها .. و نحن عارفين من خوفها علينا ..
ايوة يوم رحت المستشفى عشان أولد قبل شهر، امي تقول انها جلست تدعيلي طول الوقت
و سبحان الله بالمستشفى قالي دكتور التخدير ( انت و الله امك دااااااعية لك بقوة )
كلامه ريحني كثييييير .. و يوم خرجت من المستشفى و رجعت البيت، امي كانت راقدة
و ماتقدر تقوم .. رحت سلمت عليها، و قامت حضنتني و باستني و قالت ( اخييييرا ارتحت )
لانها كانت شايلة هم ولادتي بفترة الحمل..

و اختي تقول لي انه امي مررررررررة انبسطت يوم أني ولدت، و كان باين من صوتها ..
و قالت لاختي بالتلفون ( اسمعي صوت النونو ) .. و خلت اختي تسمع صوت ولدي ^^

معليه شكلي نسيت نفسي و أنا معاكم ^^


.
.