صباح الفل يا بنات

نعومة اذا صحيتى يوم حواجبك وجعاكى تعرفى انه من الحمل
اذا حد عدى تحت بيتكم و لقيتى نفسك مش طايقاه و انتى اصلا متعرفهوش يبقى من الحمل
و كملى انتى بقية الامثلة كلها


زهورة حبيبتى
انا عاجبنى قوى قوى انك حاطة خط تحت كلامى انا فى كلامى مجبتش سيرة الجيش
جيشنا عظيم و يمكن مش ببالغ لما اقول من اقوى الجيوش فى المنطقة العربية كلها كمان
بس انا قلت "المجلس العسكرى" المجلس العسكرى بالنسبة للمصريين هو رئيس الجمهورية لانه قائم باعمال رئيس الجمهورية و لما نقول اننا عاوزينه يمشى يعنى يرجع مجلس عسكرى بس و مالوش دعوة بحكم البلاد لكنه يفضل مع الجيش مش يعنى مش عاوزين قيادته للجيش لأ منقدرش نستغنى عنهم طبعا ولا عن جيشنا و يجيب مجلش منتخب هو اللى يقوم بعمل رئيس الجمهورية لانه اثبت فشله فى المهمة دى و ليه الحق كمان انه يفشل لانه مش متدرب على السياسة هو متدرب على الحياة العسكرية
احنا عاوزينه يفضل جيشنا ذى ما هو بيحمينا و على راسنا من فوق يحمى الحدود و يحمى مصر مع الشرطة اللى مقموصة منا الايام دى عشان عملنا ثورة
لكن المجلس العسكرى كرئيس جمهورية خيب امالنا و املى انا شخصيا جالى احبااااااااااااااااااااااااااااااااط كبير متتخيليش حجم المرارة اللى كنت حاسة بيها و انا فى مصر و خصوصا اخر اسبوع حسيت ان الدم اللى سال سال عشان ننضف بيه ارضيه الشوارع او شوية ناس مكناش محتاجنهم فموتناهم و اللى اتصابو دول هبل اتصابو عشان "حاجة" لا ترقى الى مسمى ثورة
الثورة لما قامت قامت بمطالب المجلس العسكرى "القائم باعمال رئيس الجمهورية" معملش حاجة منها خااااااااااااااااالص و اليكى بعض الامثلة "المتعمدة" و اللى تحرق الدم بس يا ريت قبل ما تقرى تاخدى قرص الضغط ذى ما انا بلبعه كدة
1- حرية
اتسجن فى عصر المخلوع 4000 واحد عسكريا فى فترة 30 سنة
فى حكمهم بقى بعون الله 12000 فى 10 شهور مش بلطجية "ثوااااااااااااااااار" مش عاوزينهم يتكلمو و اذا قلنا فيهم بطلجية موافقة يا سيتى عددهم كام 6000 يبقى لسة باقلنا 6000 و مع العلم هم مش 6000 ولا حاجة هم 4000 و المحاكمات العسكرية للمدنين حسب القانون المصرى غلط متنفعش بس هو نفعها
حق التظاهر "السلمى" مش بيدوه الا اذا كانو ناس كتييييييييييييييير فى التحرير لكن اذا كانو 50 واحد مثلا يدخلو عليهم الداخلية و فين يوجعك عشان يفضو اعتصامهم ذى اخر احداث حصلت يوم 19 نوفمبر
كشف العذرية على بناتنا قدام الرجالة "العساكر" مش الدكاترة عرايا كما ودلتهم امهم و امام كاميرات!!!!!!!!!!!

2- عدالة
الحد الادنى للاجور فى حكم محكمة يبقى 1200 جنيه عملوه 750 و لسة متنفذش
الله يعنى يجيولكم منين فلوس عندك حق فى دى
بس تقولى ايه لما تعرفى ان 8500 واحد بياخد نص موازنة اجور الدولة و باقى الناس اللى تقدر بالملايين بياخدو النص دا عدل؟ انا موافقة ان يبقى فى مرتب 100,000 جنيه مش لازم ياخد بالملايين يعنى و واحد مش لاقى العيش الحاف
اسامة سرايا دا رئيس جريدة الاهرام مرتبه "اكبر من" مرتبات باراك اوباما و ساركوزى و ديفيد كاميرون "مجتمعين" لييييييييييييييييييييييه؟ بيكتب ايه بسلامته؟ و قيسى على كدة فى كل مصالح مصر القيادات واخدين خير اى مصلحة و مدين ها للراس الكبيرة
لما يطلع حكم محكمة بعزل الحزب الوطنى من الحياة السياسية "اللى خربوها" لمدة 5 سنين و دا الثوار لسانهم دلدل عشان يطلعوه مطلعش و لما يطلع بحكم محكمة "واجب النفاذ الى ان يطعن فيه" تقوم الحكومة اللى هى حكومة الثورة هى اللى تطعن مش هم و ايه يتقبل الطعن فى نفس اليوم و يحددو جلسة فى نفس ذات اليوم و يطلع الحكم بقبول الطعن و ابطال الحكم اللى طالع قبل كدة فى نفس ذات اليوم "الساعة 10 بالليل"!!!!!!!!!!!!!!!!!!!! اه و الله و القضايا اللى بتحاكم اللى خربوها و قتلونا و دمرونا بتتاجل الى ما شاء الله و مطلعش حكم واحد يوحد ربنا يبرد قلوب الناس!!!!!!!!!!!!

3- كرامة انسانية
طبعا مافيش بعد انتهاك البنات كرامة
مافيش بعد رمى جثث الثوار فى "الزبالة" كرامة
مافيش بعد قتل مواطن من ظابط شرطة عشان مرضاش يتشتم بامه كرامة
مافيش بعد سحل الثوار و البنات من شعورهم فى الارض كرامة


4- عيش
هو بعد كدة نجرؤ اننا نعرف ناكل "حتى" العيش الحاف


فلما نقول ان المجلس العسكرى "فشل" كـ "رئيس جمهورية" فى انه يحكم مصر و يحقق الاهداف اللى قامت من اجلها الثورة نبقى مغلطناش
فياريت نبطل خلط بين المجلس العسكرى كقيادة فاشلة للدولة مش عاوزينها عاوزيين ناس مدنيين احنا اللى ننتخبهم مش يقولو حيفضلو حاكمين لحد 2013 مع العلم ان رئيس الجمهورية المفروض ننتخبه فى 2012 يعنى يفضلو يحكموا مع الرئيس ليه منعرفش و بين القيادة العسكرية اللى نحترمها و نجلها و نثق فيها كمان

و على فكرة بعد ما الناس قامت تانى الاسبوع اللى فات
طلعو قانون العزل السياسى (الله اذا كان مش كويس طلعتوه ليه و اذا كان كويس مطلعش من الاول ليه)
اعلنو ان ميعاد انتخاب رئيس جديد و انهم يمشو يوم 30-6-2012 اومال ايه 2013 اللى كنتو عاوزين تقعدوا لحدها دى!!!!
هو يعنى لازم ناس تموت و ناس تفرش فى الشوارع عشان تنفذو اللى احنا عاوزينه؟
انتو بتعندو مع مييييين؟

فهمتينى يا زهور؟
تانى احنا مش بنخلط بين قيادتنا العسكرية و جيشنا ربنا يحميهم لينا
و بين قيادتنا اللى بتتحكم فينا "تانى" و بشكل غلط و مينفعش نسكت عليه "تانى" برضو

و بالنسبة لمخلوعى هو لسة ماتحاكمش و بالنسبة للقانون المصرى مافيش "مسجون" بيقعد فى المستشفى العالمى و بيتلقى تليفونات و قاعد معاه مراته طول الوقت و بيستقبل زوراه و ليه سويتش بيستقبل تليفوناته لأ و ايه بعون الله كوافيره بيجيله عشان يصبغ برضو يعنى لازم برضو نحافظ على المظهر العام
كل دا مش موجود فى القانون المصرى بس المصريين بكرم اخلاقهم مطنشيين

بصى انا على قلبى علة بس يالا اهو نستحمل لحد ما تنضف لانها خلاص حتنضق حتنضف
معلش انا طولت عليكى بس ردك كان لازم ليه رد مطول


منى ان شاء الله ربنا يطمنا عليكى و يفرحنا بيكى



باقى البنات اعذرونى على اللى كتبته بس زهور نكشتنى


بحبكم فى الله

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة