تنناهيد ..
الله يصلحك ياشيخه وش الكلام ذا يعني طفل يضيع ويتربى بعز شغالات وجدته مو دارية عنه
وعمات كل وحده همها نفسها وعيالها وش ذنبه المسكين
هل انتي راضيه عن نفسك كذا ؟؟
حرام عليك وربي حرام ولدك مفروض باقي بحضانتك عمره صغير ويحتاج أم مب شغالة
يعني اانتي قادره تاخذينه عندك ولا تبين .!!
وربي لو انا مكانك طز بالفلوس وطز بالزواج كل ابوه اغلى ما طلعت به في الدنيا ولد
وبعد ابيعه عشان زواج الله العالم وش بيكون وضعك معه
فكري بولدك بعدين لا كبر وصارت كل عقد العالم فيه
فكري بنفسك بعد ما تتزوجين ويمكن ما ترتاحين للرجال ذا وما تنبسطين معه حتى لو كان يحبك
وربي انقهرت على ولدك وحسدتك على النعمة اللي انتي فيها ياليتني زيك ياليت وضعي مثلك وعادي اخذ عيالي .. على اني ملهوفه على الزواج لكن وقسم بالله ما أفكر فيه كثر عيالي كل رجال العالم ما يملون عيني في سبيل سعاده اطفالي ووجودهم مع أم حنونة تضمهم وتهتم فيهم وتذاكر لهم وتدري تعشو ولا لا نامو متغطين ولا بردانين هذا متألم ولا مرتاح تربيهم على نظرها وتعودهم على الصلاه اللي اذا الطفل ما تربى عليها بتصعب عليه لا كبر
وهو اذا تربى مع شغاله تتوقعين بتعرف ربنا وبتحرصه على الصلاه ؟
انا لو مكانك اخلي ابويه واهلي والمجتمع كله على جنب واسوي اللي أقدر عليه اللي يمليه علي ضميري
اعطي ولدي حقه مني خاصه في سنه هذا .. انصحك تاخذينه وتربينه ورزقك ماهو طاير وما تدرين يمكن ربي يعوضك خير من الزواج تشوفين وظيفة تتسلين فيها , وصبرك عليه وتربيتك اجر لاتفوتين هالاجر ولا كبر شوي ساعتها فكري بالزواج ..وترى ربي كريم وأنتي تسألين أكرم الأكرمين صدقيني بيعوضك خير العوض على صبرك وتربيتك له ..
انا زيك مطلقه ومحرومة منهم بكيت ومرضت وطالبت ولا فيه فايده ابوهم مو راضي يعطينياهم وهو تزوج ومبسوط وجاه عيال بس يبي يحرق قلبي ويعاندني فيهم ما يدري ان عياله يتألمون أكثر بعناده ذا
صدقت امي يوم قالت العيال هم الضحية الوحيده للطلاق صدق ما ضاع الا الأطفال ..
حسبي الله ونعم الوكيل
سامحيني يا ختي بس والله بكيت وتذكرت عيالي وكلامهم الجارح لما يجون عندي والاسئله اللي مالها اجابات
كيف انتي ولدك اللي مابعد تكلم , الله يصلح حالك وييسر أمرك خذيها من اخت ناصحة
استخيري واقدمي على الممطالبة بولدك بكل السبل والوسائل حاربي عشانه قد مما تقدرين