بعد ماقضيت سبات الليله المحررجه .. وصحيت من النوم وكلعاده امطار وبررد وانا البس واروح لمحطة الباص والمشي في هل المطر والبررد والمضله الكويسه حقتي


ملاحضه ياربع .. حي قلين فيلد حي راقي لاكن مشكلته الطلعات والنزلات وتخبرون السعوديين اول مايقومون من النوم مالهم خلق مشي وتمصع ويفضل تقوم بدري عشان مايفوتك الباص وتتقروش

وبنسبه للبنات السعوديات الي تبي تروح نيوز لندا ويبون يسكنون مع عائله فيه هووم ستي خاصه بس للبنات وراعية الهووم ستي اجووديه وتعرف المسلمين وطبايعهم ..


نكمل ..

ركبت الباص وكان هذا اليوم الخامس لي تقريباً اذا ماخنتني الذاكره وانا اتكلم في نفسي لازم ياترانزيت تسوي لك رحله مع هل العالم .. المهم وانت راكب في الباص اكتشفت ان الشعب النيوز لندي مايحطوون عطور ا بمعنى اصح مايحرصون عليها ؟؟ من جد مستغرب لا من شباب ولا بنات

العطور عندهم غاليه و مدري وش سالفتهم لاني انا من النوع احط بوورفيييم يعني مركز ماحط تواليت


وانا جالس في الباص كلن يشمشم وش هريحه الكويسه وان فاك الكشره على اساس انك خقق

المهم احنا ياالعرب نحب التشخيص والتعطر وهيك وهيك

نزلت من الباص ورحت المعهد سوالف مع الربع وفلسفه كلعاده المهم استغربت من موقف صار قدامي لقيت وحده جالسه وتقرأ كتاب عربي ومتحمسه ومريت من جنبها ابي اشوف وش نوع الكتاب
المهم لقيت اسم الكتاب عادات العرب والمسلمين .. قلت ايه الحين بتسألني والله النشبه

واتصدد عنها

الجميل في الموضوع اني قدرت ازبن منها (( ازبن )) يعني انحاش

دخلنا الكلاس وبدى الدرررس وصديقكم مفهي افكر برياض واهلي والعيد جاي

عاد قال الاستاد وش المناسبات الشعبيه الي عندكم .. وسبحان الله كنه داري عني

قلت له ايه والله عندنا احنا عيد بعد كم يوم .. قالي صحيح والله .. قله ايه والله

قالي يله طيب اطلع وتكلم عن عيدكم << وجهي صار كيذا

قلت هاه ... قالي يله يله وقامو الطلاب يصرخوون

حسيت اني بطل قووومي قلت لهم ياربع وش بلاكم وراكم علي


قالي يله اخلص احتس

وانا امشي من بين الطاولات وطاقتني ام الركب


قالي تحدث

قلت كل المسلمين عندهم عيد

وبعدين قلت عيد الفطر يجي بعد رمضان ورمضان قبل العيد واحنا نسوي عيد عشان نفرح بي الافطار
وهذا ديننا

وتوالت الاسئله شين اعرف وشين ماعرفه

المهم قالي وش تسوون في العيد .. قلت ياطويل العمر اروح ازور اهلي واصدقائي .. الخ الخ

المهم خلصو اسئله وانا ماصدقت على الله


وقعدت وقال الاستاد لازم نشوووفك بزي السعودي قلت يبن الحلال مايخالف ابشررررر يصير خير

المهم خلص اليوم الدراسي وطلعت على الساعه 1.30 وقعدت مع الشباب في المعهد سوالف وانجلش وكلمات جديده استفدت كثير واكثر شي استفدته القرامر ولسبيكنق لاكن السبيلنق عندي فيه مشاكل حتى الان

كان باقي على العيد يومين .. وكنت فرحان بي العيد وللمعلوميه ماشفت سعوديين الا شووييين مره

وكلمت المدرسه وقلت لهم عندن عيد وابي اجازه .. قالو لي اوكي تم 3 ايام اجازه

قلت كويس


بعد شوي بقولك وش سوينا في العيد والاحتفاليه حقت جامعة يونت