واعتذر لجميع القرائ التأخير بس الله وحده اعلم بسبب
انتهينا من يوم الثقافات وكل واحد فينا تبادل بعض المعلومات عن بلده وتم تناول طعام الغداء في المعهد
طبعاً كل واحد جايب اكله من اكل ديرته
اليابانيين جابو السوشي والصينيين مكرونه والنيوز لنديين جابو فيش اند شيبس
والالمان مدري وش جابو والخ الخ
جاء الدور علي وقالو لي ماتقدر تاكل لين تجيب لنا اكله شعبيه من الاكل السعودي
انا توهقت من وين اجيب لهم اكله شعبيه ؟؟ احترت صراحه
المهم فكرت فكرت فكرت فكرت فكرت وقلت مافيه وقت اطبه هذا واحد .. اثنين قلت مالي الا الكوين ستريت نزلت تحت بشارع ورحت لمطعم هندي عنده كبسه سعوديه قلت بس هو الدوى ياعصمان اخذت 6 نفر لحم مع رز كبسه .. وعلى اساس انه مندي لحم .. بس بيني وبينكم طعمه مره خورافي وحلو واللحم ذايب شي خورافي كأنه مطعم الرومنسيه
شريته وكلفني تقريباً حوالي ال 200 دولار قلت كيفه مهيب حسوفه ابد شريته وطلعت فووق للمعهد
وقدمت الوجبه السعوديه وكان معاي علمين سعودين ورزيتها بزاوية الطاوله ...
وكتبت ايت فور يور هاند فريست .. وحاط صورة من النت سعوديين ياكلون كبسه بيديهم
طبعاً ماتتخيلون كيف انبهرو قالو يلعن بليسك وش جيب انت ههه العالم انهبلو قالو تاكلون بيديكم
قلت ايه .. قالت وحده انتم متوحشين .. قلت لها ياحياتي انتي << خربها امزح لحد يصدق
المهم الي يصور وكيذا واي واحد يبي ياكل اقوله كل بيدك معاهم شوك وملاعق هههههههههه ههههههههههه
قلت لازم بيدك عارضوني ونشبت لهم الا بيدك بس كيذ لعانه ولا انا منيب اخالف
المهم اكلو بي الملاعق وعجبهم وسحبو على باقي الاكل وصارو ياكلون .. وقلت لهم شوفوني وانا اكل بيدي
الا وصديقكم ينطلق واكل بيدي وانواع التصوير .. واعرمش اللحمه واكل حبحر حار والعالم تصوير حسيت اني شي نادر في الحياه .. ههههههههههه قالت وحده انت مصاص دماء .. ############
همن تذكرت كلمة الوالده الله يحفضها (( ترى بشرب من دمك )) فاعرفت اني من فصيلة مصاصين الدماء
المهم خلصت الاكل وقمت الحس يديني .. قامت وحده تضحك ... تقول كأنك كلب قلت الله لايكرمك كلب مره وحده .. قلت هذي سنه بس قلت لها ماي ريلجين يعني الدين حقي هيك
ابشركم الكبسه اخذت المركز الثاني والمفروض تصير المركز الاول بس عشان وحده ايطاليه مسويه باستا
خطيره هي الي فازت .. والجائزه رجله الى ميشن بي جزيره بحريه
تستاهل وانا اخذت هديه قلم وتي شيرتات ماعلينا خلصت من الحفل .. وطلعت من المعهد وانا اتمشى في شارع الكوين ستريت .. اكيد تعرفونه.. الا شوي ويرن جوالي ..
ترن ترن ترن ترن ترن ترن ترن ترن ترن .. وانا الجوال .. رقم غريب من السعوديه .. الله يستر لا تصير فيه مصيبه بعد
رديت الوو
المتصل .. كيف حالك
انا .. بخير
المتصل .. شلونك ياعمري ..
انا .. مين
المتصل .. انا امك
انا .. شفيه صوتك متغير يا يمه ؟؟
المتصل .. تعبانه شوي
انا .. عسى ماشر فيك يا يمه
المتصل .. اشتقت لك يايمه
انا .. يايمه لاتشيلين هم خلاص قربت رجعتي
المتصل .. ياولد انتبه لنفسك وانتبه من عيال الحرام والخ الخ الخ
انا .. انشاء الله ابشري انت طيبه يمه
المتصل .. بخير ياحياتي
انا .. خلاص يمه لاتطولين على جوالك سكري وانا اكلمك في وقت ثاني
المتصل .. فمان الله يا امي انت
انا .. فمان الكريم
انتهت المكالمه
تنهت لبعض الشي .. وواصلت السير وكأني اشوف صورة امي في شوارع الكوين ستريت وكل ماجلست في مكان
احسها جمبي .. حسيت كني غريق يتشبث بجذع الذكريات ... هذي الغربه الي يقولون عليها
الحمدلله على كل حال اهلي بخير وابي صحته زينه وانا بخير .. الله يديم النعمه
فجأه .. سمعت صوووت يصدددددددح من احد شبابيك البيوت الصغيره في الكوين
صوووت يداعبني ويحملني لأطير مع احلامي احلامي تطير وانا طائر في الخيال الجميل
ست الحبااااايب ياحبيبه يا اغلى من رووحي ودمي .. ياطيببببه وكلك طيبه ياربي خليكي يامي ياربي خليكي ياامي
ياست الحبايب ياحبيبه
.. لحضه من اصعب لحضات سفري ..
هلت دمعتي لفراق اهلي وضاق الصدر والمنتظر مل صبره .. والله يجيب العواقب سليمه
فاصل ونرجع لكم ..
الجزء الجاي .. لقاء ابو منيف والسهره والحطب والامور السنعه