الله يجزاكم كل خييييييييييييييير ..

امس جيت لامي و كانت تتعذب بالفراش، كل مانامت على جنب .. تألمت و مو قادرة تتكلم
و نقلبها للجنب التاني و نرجع نقلبها للجهة اللي قبل، حتى الدواء ماتقدر تبلعه، صعب عليها .. لانه ما عاد فيها حيل ..
ماحنا عارفين كيف نريحها ..

قمت امس و دعيت ربنا، و قلت ( ربنا هو الشافي ) و هو بيده كل شي .. دعيت انه يخفف عنها آلامها و انه يعينها على عبادته
لانه حتى الصلاة ما صارت تقدر تقوم الا بالقوة ..

الحمدلله قمت الصبح و الآلام تبع امس خفت عنها كثير ..

صرت ادعيلها بس ( بتخفيف آلامها و حسن الخاتمة ) .. صح امي و ابغاها تعيش معايا طول العمر وتزوج أولادي .. بس ما ابغاها
تتعذب كذا و نحن ماحنا قادرين نعمل شي .. بتتعذب و هي بنفسها ماهي عارفة كيف ترتاح ؟

يارب ارحم ضعفها و كبر سنها ..

و أنا متأكدة و على يقين انه ربي يبغالها الخير ، لانه رحمته أضعاف رحمتي على ولدي الصغير ..

و شفت 4 أحلام بالشهر هذا عن امي، و كلها تبشر بالخير لها ان شاء الله.. بس ما باقولها دحين ..
يااااااااااارب ..

وقت اروح لبيتي، عيني طول الوقت عالجوال.. افتكر امي وقت كنت أتأخر عنها يومين، كانت تتصل
علي و تخاصمني ( ايوة .. ما صدقتي تتخلصي من امك ؟ من يومين ما دقيتي ؟ )
اقول لها ( و الله الشاحن تبع الجوال كان ضايع ) .. و تجلس تفضفض لي اي شي و تتكلم ..
اعرف وقتها انها طفشانة، و على طول بعد العصر زوجي ياخدني لها و اجلس معاها و تجلس تتكلم و اسمع لها
*
كنت مستودع اسرار امي، و كانت تقول ما اثق اقول اي سر لأي أحد ( غيرك ) .. و كنت اعتبره وسام شرف على صدري ..
يارب كن معها و ارزقها الخاتمة الحسنة و ضاعف لها من حسناتها و ارزقنا الصبر على فراق أغلى ما نملك ..