السلام عليكم جميعا

منى الف سلامة عليكى حتطمن عليكى حالا ان شاء الله


زهورة
ممكن سؤال؟
لما يكون فى ناس كتير ملمومة على الساحر اللى فى الشارع مثلا و فى ناس اتنشلت و جينا فى الميكروفون نقول يا جماعة اللى مسرقش يروح عشان نمسك اللى سرق تفتكرى النشال حيفضل قاعد مستنى ولا حيمشى مع الناس عشان ميتمسكش؟
دا نفس المنطق فى ناس مع الثوار ايوة طبعا بس اذا الثوار قالوا حنمشى عشان تمسكوهم حيمشوا معاهم طبعا و تكون النتيجة
1- فضوا لم الثوار
2- حيتقال اهو شفتوا لما مشيوا محصلش حاجة عشان تعرفوا ان اللى كانوا موجودين دول مش ثوار دول بلطجية و الدليل لما مشيوا الدنيا هديت

احنا عارفين مين اللى عامل الحرايق دى و مين اللى دافع للناس اللى حرقت
مع الاسف الموضوع بحماية المجلس العسكرى لانه هو اللى بيحمى الفلول ذى ما قلت قبل كدة و هو اللى بيحمى مبارك فى محبسه "الشيك" قوى و الدليل على كلامى شوفى مبارك فين و ايه كل الصلاحيات اللى عنده و هو محبوس و شوفى الثوار اللى بيتعلجوا فى المستشفيات دلوقتى فى انهى مستشفيات فى مصر دا 1 و 2 انهم بيتعالجوا و هم محطوط فى ايديهم الكلابشات و اذا مكانش ينفع فى الايد يبقى فى الرجل و فى الاخر تتربط فى السرير!!!!!!
دا يرضى مين؟
الجيش فى ناس كويسة دا اكيد لان مينفعش اننا نعمم ان الطائفة دى كلها كويسة او انها كلها وحشة بدليل ان تلاقى فى المسلمين اللى استغفر الله العظيم يعنى


و مع كل اللى ذكرته دلوقتى و قبل كدة و الغصة اللى فى حلقى لكن انا عندى تفاؤل كبير ( ان "مع" العسر يسر) معاه مش بعده و دا اكيد و كمان انا واثقة فى عدل ربنا و انصافه للمظلومين و اللى بيحصل دلوقتى زيادة عدد المظلومين
فى ناس مكانش ليهم فى السياسة و بعد ما متلهم ولا اتعذبلهم ابن او بنت نزلوا يعنى واحد مات بتنزل عيلته كلها عشان تجيب حقه فالدايرة بتتسع
و انا اللى بيخلينى اكون مرتاحة انى فى كل صلاة بيكون دعائى لربنا "اللهم انى استودعتك بلدى و اللهم انتقم من كل من تجبر و ظلم"
بحس فعلا انى ارتحت جدا لانى بيكون عندى احساس ان ربنا هو اللى حياخد حقنا و هو المنتقم الجبار بس بجد نفسى اشوف الكلام دا و انا عايشة نفسى يطول فى عمرى لحد ما اشوف النهاية السعيدة



باقى البنات بحبكم فى الله

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة