اصدقائى الاعزاء مش عارفة اشكركم ازاى على انكم رديتو على واثلجتم صدرى باهتمامكم .انا فى غربة وماليش صديقات هنا لانى تقريبا اتعقدت من الست اللى قلت لكم عليها . زوجى هو فعلا ابنى اللى ما خلفتوش مع انة اكبر منى ب 10 سنين وعمرة دلوقتى 46 سنة يعنى مش كبير قوى فى السن . وزى ما قلت لكم انا ما عنديش اولاد وكل وقتى واهتمامى وحبى وعقلى ومشاعرى لزوجى ودة واللة مش مزايدة على اللى بيحصل منى لكن جوايا احساس انة عمل كدة لانة واثق من حبى لية وانى هافوت لة . واحساسى كمان انى اديتة كتير يمكن زيادة عن اللازم . انا طبيبة ولا اعمل هنا فى الغربة لظروف العمل الصعبة واللى ما تناسبش ظروفى العائلية . ودة يمكن يكون سبب كمان للى عملة على اساس انى محتاجة لة ماديا مع العلم انة كريم جدا جدا جدا . وحنين على الناس كلها (كلها) وهو دة الباب اللى كانت بتدخلة منة . متهيالى انى لو شفتها دلوقت (انا ما شفتهاش من ساعة اللى حصل ) هاضربها قلم على وشها .لكن انا عارفة انى مش هاعمل كدة (كلام وخلاص ) كل كلامة معايا انة عارف انى عاقلة ومش ممكن اتهور فى تصرف يخلى الناس تتكلم عننا .بيحب دايما ان صورتة قدام الناس تكون كويسة.انا لو حاصرتة بالاهتمام رايح فين وبتكلم مين ممكن يزهق ولو غمضت عينى وعملت ودن من طين والاخرى من عجين هيضيع من ايدى . يعنى الفترة اللى جاية عايزانى اكون زى البهلوان وامشى على السلك . فية مشكلة تانية وانها ليها ابن شاب عندة14 سنة ومرتبط بزوجى لانة اتربى بعيد عن ابوة وكان زوجى بالنسبة لية بديل للاب او الخال زى ما كانت دايما بتقول .الولد دة صعب جدا بل مستحيل انى ابعدة عن زوجى وهو من راية ان الولد مالوش ذنب فى اللى عملتة امة . انا حاسة ان الولد دة هيكون مسمار جحا اللى هتنطلنا بية كل شوية . ربنا كريم وقادر يبعدها عننا . لى طلب عندكم خليكوا على اتصال بية علشان انا قوية بيكم ومحتاجة لكم جدا . وشكرا ليكم مرة تانية.