عدناا .. بس مانامت سما مارضت تنام و انا ماقدرت انام قبل ما اكتب لك


تعالي نمسك ردك و نفصله شوي

اقتباس:

الزواج بعد 18 يوم ما اقدر اتراجع ما اقدر اقول شي ما اقدر اتكلم والي حاصل الان في مشكله حساسه مابين اهلي واهله نورا انا فلت باسلوب المزح وجس النبض لوالدي نكنسل الزواج

سييشل .. اكيد مافي طريقة للتراجع ... خلاص مابقى شي 18 يوم
واهلك مستعدين و العريس و اهله جاهزين ... و كل ماقرب الموعد راح تزيد بداخلك الافكار و الوساوس
عشان كدا لا تفكري و تقولي باقي 18 باقي 17 .. بل عيشي كل يوم بيومه
و اشغلي نفسك بالتحضيرات و بالدعاء بالتوفيق

اقتباس:

فسيتي كانت مستقره لكن بعد المشكله الحساسه صرت خايفه اكثر صرت متردده اكثر صرت ما ابغئ خطيبي اكثر مافيه شي ولا حصل بيني وبينه اي موقف لكن شعور داخلي

مادري عن المشكلة الحساسة و هل هي فعلا تستاهل انك تحسي بهذا الاحساس
بس اعتقد بشكل عام انتي مسبقا متوترة و المشكلة زودت عليك
عدم حدوثها ماكان بيغير من مشاعرك الحالية

اقتباس:

خايفه يتم الزواج والمشاكل تواجهني خايفه يتم الزواج ومشاعري تزيد للاسوء خايفه افشل في الحياه الزوجيه خايفه ما اكون زوجه مثاليه خايفه تغلبني العاطفه على العقل واصير انسانه مجنونه خايفه ما اظبط تصرفاتي قدام اهله خايفه تكبر المشاكل خايفه اواجه هذي العائله الي ليست كباقي الناس خايفه خايفه خايفه تعبت وتعبت وتعبت

هنا المشكلة .. الخوف و التوتر ..
خوفك شي لابد منه و الاغلب عانو منه
وهذا حق مشروع لك .. انتي مش رايحة حفلة و راجعة و لا طالعة سفرة ولو ماعجبك المكان
راجعة .. انتي مدركة تمام الادراك انك داخلة على حياة جديدة و عالم جديد .. بالتالي خااايفة منه
والخوف من المجهول كلنا نعاني منه غاليتي ...
اضيفي اعتقد و انك مرتاحة بيبت اهلك (يعني مافي شي يجبرك عالزواج .. فا زي الي تقولي في نفسك
ليش اسيب الامان و اروح لمكان الله اعلم ايش بلاقي فيه ) ..

عادة البنات الي يغلب عندهم التفكير عن العاطفة (العقلانيات) هم اللي يفكروا بنفس افكارك و تجيهم مخاوفك
وماشاء الله هم بالعادة يكونو زوجات نااجحات ..

قلتي :
**اخاف يتم الزواج و تواجهني مشاكل :
اي مشاكل بتواجهك .. المشاكل العادية الخفيفة هذه عادية تحصل حتى بينك وبين اخوتك
وانتي ماشاء الله عليك عااقلة ومتزنة و بتعرفي تحليها باذن الله
وبعدين مو لحالك طرف فيها . زوجك موجود و على كلامك انه متزن و عااااقل
يعني لا تشيلي هم باذن الله

قلتي :
**اخاف من مشاعري لاتتغير للاسؤ
طيب ليش نفترض الاسوء .. ايش اللي بيغيرها .. الاهم تدخلي الزواج و انتي غيير منحازة
وغير مسبقة الحكم على نفسك ...
طيب تعالي نفترض الاسوء .. لاقدر الله .. ماحبيتيه .. ياستي نفرتي .. كهرتيه ..
خلاص ساعتها بتحاولي و تصبري فترة .. ماقدرتي تتاقلمي بترجعي بيت ابوك معززة مكرمة
على الاقل تكوني خضتي التجربة و ماتندمي بكرة اانك فسختي بدري .. ماراح تلومي نفسك
انك ماعطتيه و عطيتي نفسك فرصة ... خاصة و انك ماشفتي منه اي شي يكرهك فيه حاليا ..

لكن هذا ماراح يصير باذن الله ..
لانه الطبيعي .. اذا دخلت البنت العلاقة الزوجية بعقلية متفتحة و بنفسية جيدة متقبلة لطرف الاخر
و الشريك قابلها بطيب المعاملة و حسن المعشر .. باذن الله تحبه و تموووت عليه...

قلتي
**اخاف افشل وماكون زوجة مثالية ...
ايش مفهومك عن الزوجة المثالية ؟؟
حبيتي جداتنا و امهاتنا عاشوا و كانو نعم الزوجات و نعم الامهات .. وهم اميات و غير متعلمات
فمابالك بك و ببنات الجيل الجديد ؟؟ متعلمة .. مثقفة .. مطلعة .. عارفة اللي لك و اللي عليك
عارفة حق الزوج عليك ,,,, ايش اللي مابيخليك تنجحي ؟؟؟
بيني لزوجك مخاوفك هذه و صديقني بيساعدك .. نفس كلامك قلته لزوجي ببداية زواجنا
و فعلا سااعدني ربي يجزاه الخير وخفف عني ضغظ كبير ..
ثقي بنفسك و بقدراتك .. زوجك معك . يحبك.. يحترمك .. خلاص لا تخافي .. بيساعدك و يوقف جنبك
على الاقل انتي والدتك جنبك الله يطول بعمرها وقت ما احتجتي مساعدة لاقيتيها
فكري بللي يتزوجوا و يتغربوا على طول ...

لا تفكري انك بتتزوجي و كل شي يهجم عليك .. لا حبيبتي سبحان الله كل شي بيجي وحدة وحدة
بتتزوجي و بتكون مسؤلة عن نفسك و زوجك فقط .. وهذا سهل.. بعد اول الايام بتعرفي
تنظمي وقتك بين واجباتك في البيت .. و بتتعلمي على طباعه شوية شوية

بعد ماتتعودي بيجيك اول طفل و بتزيد شوي المسؤليات بس برضو بتكوني اصلا اتعودتي على 2
فا بتشوفي فرق بسيط .. وهكذا الى ان تكبر اسرتك و نشوف عيالك يتنطوطوا حوليكي ..
المشاكل تيجي لكل الناس .. حتى لو ماتزوجتي بتواجهي مشاكل .. ولو تزوجتي غيره عن حب و عشق و هيام
بررضو بتحصل .. لكن انتى ادرى بزوجك و عارفاه انه من الرجال اللي ينشد فيهم الظهر
وبيشاركك همومك و افكارك و كل شي يبدا كبير و يصغر ...

** خوفك من اهله .. طبيعي لانهم ناس جدد عليك ... بس برضو وحدة وحدة على نفسك
اسالي زوجك عن اطباعهم .. و اقبلي عليهم بنية طيبة و ان شاء الله تلاقي منهم المثل
اول فترة كوني معتدلة في كل شي الى ان تتعرفي على بيئتهم و طبائعهم .. بعدها اقلمي نفسك عليها
اهم شي عمتك و عمك تكسبيهم.. بالكلمة الطيبة (كبار السن يحبوا المدح و الدعاء لهم )
بذكرهم بمكالمة تلفونية بين الحين و الاخر ... الهدية لها مفعول السحر
توصي ابنهم عليهم .... وهكدا بتكسبيهم باذن الله ... فقط تخيلي امك و اسالي نفسك
كيف زوجة اخي ممكن تكسب امي .. و طبقيه مع حماتك ..

** اخيرا زوجك و عدم علمه بعالم النساء ..
زوجي كان زي زوجك ... مايعلم وين ربي حاطه بامور النساء.. اذا تكلم مع حرمه جلس يتعرق
ا هذه نعمممممممممممة نعممممممممممة نعمممممممممة
احمدي الله عليها ... ايش الفايدة من زوج يغدقك و يغدق غيرك بالهدايا..
اليوم مايعرف بكرة معاك بيتعلم كل شي ... واذا كان هذا عيبه الوحيد فياا محلااااااااه ...
بتبدي انتي معاه مره و اثنين و مرده يتعلم ..

اقولك على سر صغير . كان عندي نفس الخوف (بالرغم من ملكتي الطوييييييييييييييلة)
وبالرغم من تعودي على زوجي و(ظني اني احببه بجنوون )
بس يوم زواجي و الايام القليلة التي سبقته كانت مليئئئئئئة بالدمووع
خفت اسيب اهلي .. خفت اسيب امي .. خفت من اهله .. خفت منه .. خفت يتغير علي
وتظهر انيابه .. خفت من المستقبل .. كنت مدللة وكلمتي مسموعة في بيت اهلي
فا ايش بيكون موقعي عنده ؟؟ تعودت على قدر من الحرية وهو عنده كل شي عيب ووممنوع... خفت حتى من الطبخ و النفخ و مسؤلية البيت
و يوم زفافي قضيته بكااا من الصبح الى ان روحت معاه البيت
وبكا بشهر العسل
رغم معرفتي اني راجعة لاهلي و باجلس عندهم 3 سنوات اكمل دراستي .. لكن الخوف كان رفيييقي
لدرجة انني بعد الزواج بكم من شهر .. كنت اتمنى اتطلق بعييد الشر (شوفي هذا كله و انا ملكتي كانت 4 سنواات
وتواصل دايم بيننا و حب و شوق و راسايل ورقية و ايميلات و مسجاات و كللللل الي يخطر ببالك و زوجي اكبر مني
وكان مخلص و بدا يشتغل)

لكن بعد الزواج من كثر خووووفي وصلت لدرجة انه فكرة الطلاق كانت معشعشة براسي و ادور بس سلبيااته و اشوفها
اللي كان مانعني خوفي من ابي

مع مرور الوقت و طيب تعاملة و اخلاقه العالية الرااااااااااااقية
مو بس صرت احبه الا امووووت عليه الله يحميه و يخليه فوووق راسي
ويوم معاه و احنا جالسين نلاعب عيالنا احسن من شهر في بيت اهلي وسط لمة خواتي
اللهم لك الحمد اللهم لك الحمد ...

الان بس اتذكر هذيك الايام اندم على اللحظات اللي ضيعتها ايام زواجي بالقلق و التفكير و الهم
عرضت لك تجربتي عشان تعرفي انه حتى اللي تزوجو عن حب برضو ممكن تجيهم افكار
ويسيطر عليهم الخوف..وانه سبب خوفك مش عدم الحب ولا خوف من سنه و لا لانه طالب .. و انما عقلااانيتك و حبك للمثالية .. واعتقد كان بيجيك نفس الاحساس مع اي شخص ثااني ..

بس المهم ماتخلي هذا الخوف يفسد حياتك .. قولي لنفسك من حقي اخاف .. انا فعلا داخلة حياة جديدة
بس ماراح اخليه يصير خوف مرضي و اهدم حيااتي بيدي ...

زوجك طيب و محترم و خلوق و يحبببك و يحترمك مايعرف غيرك ... ايش عااد باقي ؟؟؟؟
هذه الصفات فيه و تساليه ان كنتي بتحبيه ؟؟؟
بطلب منك بعد زواجك بكم شهر تجي و اقولي لي مشاعرك ساعتها
ان شاء الله حيااتكم تكوون سعيدة ..
زوجك فيه صفات راائعة ... و انتي ماشاءالله عليك عااقلة و عندك حس بالمسؤؤلية
فا راح تكوني زوجة رائعة و ام ارروع

اخر نقطة , انتي اكيد استخرتي صح ... اذن لاا تخااااافي ان شاء الله زواجك منه خير

ربي يسعدك حبيبتي .. و اي سؤال اسدحيه و لا تستحي ... و ان شاءالله يارب يفرج همك و يسعدك
مع زوجك و يسخر له قلبك و عقلك و يسخر لك عقله و قلبه و تفكيره

طلب بسييييط .. اليووم قومي صلي ركعتين و ناجي رب العباااد بكل مخاوفك
واطلبي منه سبحانه الطمانينة و الراحة النفسية و التوفيق
وصدقيييني باذن الله بترتااحي

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله