عندي اكبر اثنين الفرق بينهم سنة و3 أشهر .. وكان الفضول قوي من الكبير بخصوص الصغير لكني كنت هادية جدا مع فضوله .. لما يشوف خوفك على الصعير راح يتوتر الكبير أكثر ..
1- خليه يقرب منه بدون ما تتوتري أو تخافي .. مجرد كوني على أهبة الاستعداد ... يعني أسمح له يقترب ويسأل ويحس بيده وعارفه انه ينتظر الفرصة حتى يضرب أو يعمل حركة فجائية فما أمنعه الى لما يصير الموضوع جد وقتها أمسك يده بلطف واقول له لا حرام يتألم البيبي .
2- أي لعبة أو لبس جديد تشتريه له قولي له هذا من فلان (أخوك الصغير) .. جابه لك .
3- خليه يشاركك بالعناية فيه .. لما تغيري الحفاظ مثلا اطلبي منه مساعدتك وقولي له أعطيني كذا .. أو أمسك هذا ..
موضوع انك تشتري لهم نفس الشي وخوفك انه يتبرمجوا على كذا .
أصغر اثنين عندي توأم وفعلا كنت ألبسهم مثل بعض بالضبط وأشتري لهم نفس اللعبة لكن بلونين مختلفين حتى نميزهم ... كل شيء مثل بعض بالضبط .. كنت اخاف أفرق بينهم واظلم واحد لدرجة كنت لما أعطيهم السمارتيز أو أي حلو حبات صغيرة كنت أقسمهم وأعدهم بالحبة وبنفس اللون كمان .
لما كبروا شوي ودخلوا مدرسة وصاروا يميزوا وتتشكل شخصياتهم صاروا يرفضوا يلبسوا مثل بعض والحين صار عمرهم 15 سنة وكل واحد فيهم بشخصية مختلفة تماما ولهم أصدقاء مختلفين مع انهم بنفس المدرسة ونفس الجيران .
__________________
