الله الله
الذوق هنا
يالله دعيت من قلبي للخاطب نمبر تو
تدرين ليش؟؟
لأن أسلوبك العفوي في الكتابة يعجبني
وتكتبين من قلب ومصررررره على وجهة نظرك بس بكل أدب وذوق
مع بعض الألفاظ الفكاهية مثل مدرعه وصواريخ
هههههههههههه
يا شيخه والله انك ذوق
على انك على أعصابك لكن ردودك محترمة جداً على مخالفينك في الرأي
وأتمنى يارب إنك دايما تستمرين على هذا الأسلوب الحلو
نجي للب الموضوع والشق الأول:
تذكرين قصة الخضر مع موسى أكيد
وتذكرين اللحظة اللي قتل فيها الخضر الغلام الصغير
واعتراض موسى عليه السلام وبعدها نبأه الخضر بتأويله
وأنه قتله لأنه إن كبر وش راح يسوي؟؟
راح يكفر وراح يرهق أمه وأبوه
فأزهق روحه وريحهم منه
مع ان الأم والأب مو دارين وش السالفه وحزنوا أكيد عليه
والأم تعرفين حالتها وهذا ضناها فسبحان الله اللي يدبر خلقه وييسر لهم الأحسن وهم غافلون
والسفينة اللي خرقها نفس الفكرة
واكتشف بعدين صاحب السفينة فايدة هالخرق
وكسب سفينة مخروقة أفضل من سفينة يغتصبها منه الملك الظالم
ويقعد بدون شي يدخله على عياله
نفس الفكرة طبقيها على نفسك
وصدقيني بتمر سنين وتجي أيام وتروح ايام وبتسمعين شي من علومهم إذا أراد الله
ويمكن تسمعين عن تعب زوجاتهم معهم وساعتها تحمدين الله انه نجاك منهم
ويمكن هن يقدرن يتحملن هذا التعب لكن انت لأ
ولا عندك استعداد ونفسك أبخصبها
وبعدين انت ليش ما تدققين
ليش بس تفكرين في وجهة نظره وما عجبته ومدري ايش
قوي وجهة نظرك فيه داخل نفسك
ولا تعطين الناس مساحه أكبر من اللي يستحقونه على حساب نفسك
وحطي شروطك فيهم من الآن ولا تستسلمين
هذا زواج وبتقعدين معه العمر كله
وصعبه يا ذوق تبدين رأيه هو على نفسك
يعني خطبك ثالث واعجبتيه ووافق وانت مو متأكده منه أو ما أعجبك بترمين نفسك عشان زواج وبس؟!!
صدقيني ساعتها أكبر مقلب أكلتيه نفسك..
الشق الثاني:
نجي للخاطب نمبر ثري
خلي الأمور تاخذ مجراها عادي
إن جاء حياه الله وإن راح ما عليه حسوفه
أهم شي الماضي خليه في صندوق المهملات
ولا تتركين رواسب سلبية في حاضرك ومستقبلك من هالماضي
لأنك راح تعانين لوحدك
وراح تكون مثل القيود الثقيلة في رجولك تعيق تحركك السريع
والناس يشوفون ثقل خطوتك لكن مو شايفين هالقيود
ويظنون فيك بعدها ظنون عديدة والأكيد انها ماراح تعجبك
وأقلها يمكن يقولون شايفه نفسها وما تحب الناس
أو معقدة
أو دايم حزينة وما تضحك
خلي نظرتك دايم بعيدة
وقبل ماتسوين اي شي لو حتى بتحزنين وتنزلين دمعتين قولي في نفسك:
هذا اللي بسويه بينفعني بكره ؟؟ بينفعني على المدى البعيد؟؟ بيتغير شي للأحسن ؟؟
إذا إيه توكلي على الله وسويه وإذا لأ أنصحك اصرفي نظرك عنه أفضل لك
والله يسهلك وييسر لك ويرزقك بالرجل الكفؤ اللي يعرف قدرك ويحافظ عليك
ويعينك على الطاعات ولا يشوف فيه أجمل منك ولا أحسن منك ابد
آمين