ما شاء الله عليك وعلى حكمتك وعقلك .. بصراحه تنرفزت من بعض الردود اللي تزيد الهم هم ..
لكن ردودك ريحتني .. الله يجازيك على صبرك خير حبيبتي .. وحبيت تفكيرك بأهلك وعيالك ربي يحفظهم لك يارب ..
نأتي لزوجك .. حبيبتي في ازواج تكثر علاقاتهم حتى بعد الزواج وهم كبار .. لانهم يبون يحسون انهم مرغوبين
وموجودين حتى مع تقدم السن ... وهذا تفكير مريض طبعا ..
الحل : مثل ما استدرجتيه بالكلام وكشفتي مكالماته .. استدرجيه لمعرفة تفكيره .. التساؤلات اللي عندك كلها حاولي
تعرفين اجاباتها منه .. بطريقة ذكية .. وليست مباشرة .. هذا هو كيد النساء حبيبتي ..
اذا عرفتي سبب بحثه الدائم عن النساء رغم زواجه .. بتعرفين تحلين مشكلتك .. استخدمي عيالك في حل مشاكلك
مثلا : اذا دخل البيت خليهم يبوسونه على راسه .. احيانا يرسمون اشياء برسائل صغيرة مثل ( نحن نحبك يابابا )
( انت قدوتنا يا بابا ) يعني رسائل تصحيه من نومه شوي ...اذا زوجك مقصر في الصلاة خلي عيالك يطلبون منه
يعلمهم الصلاة او يسألونه اسأله عن الصلاة والدين ..
وانتي لا تقصرين .. يعني مثلا قولي له وانتي منشغله باطفالك كأنك تكلمين نفسك .. ربي انعم علي بزوج اتمنى ادخل
معاه الجنة ويكون زوجي هناك .. الله يعيننا على عمل كل خير يقربنا من الجنة ... او حتى تكتبينها رسالة مع ورده
وتحطينها في السيارة او خزانة الملابس ..
اليوم اللي يكون فيه عندك انسي انه متزوج عليك .. خليه يشوف منك كل شي حلو .. اهم شي الثقة بنفسك .. اهتمي
بنفسك واهتماماتك .. ترا اذا ما حبيتي نفسك محد بيحبك .. لا ترضين بالضرب والاهانة .. لا ترفضيها بالدموع
ارفضيها بالحزم والجديه .. لما تسولفين معاه اختاري الاشياء اللي تهمك وتهمه .. مثلا اذا كان يحب السيارت مثل
زوجي امطريه بالاسئلة عن السيارات وانواعها ومواصفاتها صدق السالفه مملة لكن بتحبين نتائجها مع الايام بيحب
السوالف معاك .. وابتعدي عن سوالف الحش والغيبة والسخرية والمشاكل ..
اعمال الخير انصحك بها بقوة .. والله كثير من حولي انحلت مشاكلهم بتوفيق من الله ومن ثم عمل الخير والصدقات
اتمنى اذا كنت فاضيه تمرين على مواضيعي وتاخذن فكرة عن اعمال الخير اللي يشارك فيها الزوجين وان شاء الله
تستفيدين ..
ما دام انك في بيت اهلك خذي وقت لترتيب وضعك وتفكيرك .. وردي على زوجك اذا اتصل وخليه يعتذر لك واتفقي
معاه انه ما يرفع ايده عليك مرة ثانية ويحترمك .. وابد ابد لا تبينين له انك ضعيفه امامه علشان عيالك .. واهلك ترا
بيستغل هالشي فيك .. واصبري ياغاليه ترا الاجر محفوظ عند رب العباد بإذن الله ..
وسالفة الخيانات لا تعدينها ابد .. كلميه بحزم وقوة واطلبي منه يتركها .. الانسان ما يضمن نفسه
متى يموت .. فحرام يقابل ربه بمعاصي وعلاقات محرمة ..
ربي يفرج همك ويزيدك عقل وحكمة .. ويسعدك ويحفظ لك احبابك يارب ..