طيب انا الفصحى مضروبه عندي هذا وانا ادبي عشان كذا بكمل عامي
عشان اخذ راحتي واطلع اللي ببالي زي ماهو
بداية سنه دراسيه جديده
مر الاسبوع الاول بين شراء للمستلزمات الدراسيه
والترتيب لبداية العام الدراسي ما يحتاج اشرح وش يصير اول اسبوع من الدراسه
كان الكل متملل من الدراسه الا انا من زود الشطاره ما ابي اجازه حتى حركات دوافير
اهم حدثين صارت بهالاسبوع
اخوي عبدالله كان تو متوظف وجاه واحد واعطاه فلوس وقال له ابيك توصلها لفلان قال اخوي
طيب
واخذها بعدين لما اانتبه لها حصل شكلها غريب وعليها ارقام وحروف غريبه
هو خاف وراح اعطاها ابوي واخذها واعطاه فلوس ثانيه علشان يوصلها للرجال
اتذكر كان جد مستغرب من شكلها والرجال اللي اعطى اخوي اختفى ومعد شافه اخوي
حاول ابوي يعرف عنه اي شي بس كان الارض انشقت وبلعته
بعدها بثلاث ايام كان يوم خميس اتذكره بكل تفاصيله اصلا كيف انساه
وهو يوم ميلاد حزني وكل مشاكلي
طلعنا العصر ولعبنا وضحكنا وكان الييوم مره فله ووناسه
رجعنا تقريبا الساعه تسعه اوعشره بالليل
الكل نام وما بقى غير اخواني سهرانين مع اولاد عمي
وانا وندى ما كنا ننام الا مع امي وابوي
يومها قعد سهرانه ما نمت قعد لحد الساعه ثلاثه سهرانه وحدي
افكر باللي صار طول اليوم واخطط لبكره وش بسوي كنت اقول بكره بطلب ابوي يشتري لي
دبدوب كبير لاني
هدوووووووء وظلام بالغرفه ومافي غير النور اللي جاي من الصاله لان الباب مفتوح
قام ابوي بسرعه وبحركه غريبه ووقف ومشى بالغرفه شوي وطلع للصاله ورجع على الغرفه
وحط يده على جبهته
سألته قلت وش فيك مارد علي
وارجع اساله مره ثانيه كمان ما رد
وقامت امي وسألته فيك شي قال بس حاس بدوخه قويه
قالت امي انادي عبدالرحمن يوديك المستشفى قال لا ما يحتاج
قعد شوي بعدين قال قولي له يجي جا عبدالرحمن وقعد يسأله يعورك شي وش فيك ومن هالاسئله
بعدين قاال معقول حاول يوقف بس ما قدر ساعده اخوي عشان يلبس الثوب وصار يتكلم
بس كلامه مو مفهوم ولسانه ثقيل
الى هاليوم اتمنى اني كنت نايمه وقتها ولا شفت ابوي مصدر قوتي وفخري وقدوتي وكل شي بالنسبه لي
كنت اشوف فيه القوه واشوف فيه الكبرياء والكرم الحنون اللي يلعب معي ويشتري لي كل يوم الاشياء اللي احبها
ويجيبها اذا رجع من الدوام
اللي يقول لي اشياء جديده ما اعرفها
اللحين قدامي مو قادر يلبس حتى ثوبه
ما انسى ذاك المنظر طول عمري ولا اقدر انساه
راح المستشفى وانا اسال امي وش فيه قالت ما فيه شي شوي ويرجع
قعدت انتظره لحد الفجر وامي كل شوي تدق على عبدالرحمن وتساله وش صار ويقول لها باقي
غلبني النوم وانا انتظر رجعته
صحيت العصر
لقيتهم كلهم بالصاله جالسين وجيهم باين عليها الحزن والصدمه
عبدالرحمن يبكي ونوف وعبير مقفلين عليهم الغرفه امي صمت مجرد دموع والباقين ساكتين
اقولهم وش فيه ماحد يرد
بالقوه قالوا لي وحتى مافي مقدمات او ترقيع على طول قالو ابوي جاه جلطه وبالعنايه المركزه
سكت والوضع عادي مدري وش الجلطه اساسا
طلع من العنايه المركزه وصار يرافق معه كل يوم واحد من اخواني
والزياره تروح امي واخواتي وانا وندى نقعد بالسياره لان ممنوع دخول الاطفال
وبيوم مع اصراري اني ادخل وبواسطه دخلوني انا وندى كنت امشي بسرعه عشان اشوفه
دخلت العرفه وربي على بالي ان اخواني غلطانين بالغرفه وهذا مو ابوي
تغير تغير فضيع
نحف مرررره وشكله تغير
انفجعت حسيت بصدمه ما يقوم بس على السرير واجهزه حوله وما يتكلم مااااايتكلم
اكلمه اقول كلمني وهو يبكي
سبحان الله اللي كان يقول لي لا تبكين قدام احد الدموع ضعف
يبكي قدامي يا قووووها
اي والله ياقوها
طلعت من عنده بخيبة امل عمري ما حسيت فيها ولا توقعت اني بوقف بمثل هالموقف
وزاد علي اني فهمت انه راح يبقى كذا ماراح يمشي ولا يتكلم
ستووووووووووووب معد اقدر اكمل ..........................
__________________
... هذا المستخدم لم يعد موجودًا...~ حللونا ~
همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..
التعديل الأخير تم بواسطة حطمؤؤك يااقلبي ; 27-01-2012 الساعة 10:39 AM