هاله
عظم الله اجركم واسكنه فسيح جناته الله يصبر ويبرد على قلوب زوجته وبناته ..
بالنسبه لسفرك ميعاد الرحله جدا سيء 12 ونص الظهر يعنعي الاولاد رح يكونو مصهللين ولا عندهم اي نية نوم
ومارح يبدؤو ينامو او ينعسو الا بعد ما تمر 8 او 9 ساعات من الرحله
بالنسبه لايوب ما شاء الله شاب كبير
بسهوله رح تقدري تشغليه بس اهم شيء ما تطلعي اسلحتك كلها بوقت واحد لالالا حبه حبه
اول شيء شغليله افلام كرتون على الشاشه اللي قدامه
بعد ما يمل شغليله على الفيديو قيمز
بعدها طلعيله العابه اللي يحبها وحبذا لو كانت جديده بكرتونتها
بعدها خليه يلون او يفتح الشنطه حقت الاطفال اللي بيوزعوها بالطياره رح يلهاله ساعه او نص ساعه بيها
طلعيله شيبس وبسكوت وخليه ياكل
والحل السحري هو الايباد ... نزليله العاب عالايباد وخليه يلعب هذي اقل شيء رح تشغله ساعتين ..

بالنسبه لنور
الله يعيييييييييييييينك لانه سنها صعب جدا ما بتفهم شيء وما ترضى تقعد بمكان واحد
اهم شيء تاكدي انه حجزولك سرير لها ولا رح تقضيها طول الرجله على رجولك
حاولو تختارو اول صف بالمقاعد عشان ممكن تحطي نور عالارض بالمساحه الصغيره اللي قدام رجولكم لو هلكتك وتعبتي منها ..

اهم شيء انتي ما تفقدي اعصابك وخلي ايوب يشيل شنطة على ظهره يحط فيها كل اغراض التسليه وهو يشيلها
وانتي كمان شيلي شنطة ظهر نصيييييييييحه مني ليكي لا تشيلي شنطة الاطفال ام كتف هذي رح تتعبك لانك رح تمشي مسافه طويله شايله نور على كتف والشنطه على الكتف الثاني
اما لو اخذتي شنطة ظهر تقدري تشيلي نور على كتف واليد التانيه تمسكي فيها الجوازات او يد ايوب
والافضل كمان اذا بتشيلي نور على الشياله اللي بتتعلق بصدر الام مدري اذا عرفتيها او لا وعلى ظهرك تكون الشنطه اللي فيها حاجاتها بكذا تكون ايديك الاثنين صارو فاضيين ..
ورتبي شنطة نور كويس بحيث انه اول ما تدخلي يدك فيها بتلقي الغرض اللي بتحتاجيه لانه الاشياء الصغيره هذي لو ماكانت مرتبه صح هي اللي رح تنرفزك .. مثلا خذي موقف نور بتزنزن وانتي تعبتي من الزن وتبغى حليبها والحليب محشور جوى باخر الشنطه وايوب قاعد يسالك اسئله عبيطه وفجاه لقيتي نفسك طلعتي كل اللي بالشنطه عشان توصلي لحليب نور .. موقف جدا ينرفز رغم انه بسيط فتفادي هذي الاشياء .. حطي الاشياء اللي مارح تحتاجها دائما مثل اللبس الاحتياطي في اخر الشنطه وفي اعلى الشنطه حطي الحليب والرضاعات والبامبرز والمناديله المبلله ..
الله يوفقك


نوووووره
يومك مره صعب
برايي فيه اشياء ممكن تلغيها من روتين يومك مالها داعي ورح توفر لك وقت كثير
مثلا سما ويوسف مو لازم كل يوم يتحممو ... اصلا هذا الشيء غير صحي لانك انتي بتشيلي الزيوت الطبيعيه اللي بيفرزها الجسم عشان ترطب البشره .. خلي التحميم يوم ايوا ويوم لا ..
بعدين جلسة زوجك حقت العصر للحلى مو لازم تسوي حلى حطي بسكوت او كيك جاهز من حق السوبرماركت مع شاهي وقهوه وخلاص ... هذي الشيئين لو عملتيها حتكوني وفرتي ساعه كامله من يومك ..


سلمى
باقي القليل خلاص شدي حيلك

__________________