الأخ الفاضل متفائل صدقت ان المهور صارت غالية لاكن ياخوي

ماتتفق معي بأن اكثر الشباب الحين لما الواحد منهم ربنا يرزقه

بوظيفه زينه وراتبها ما شاء الله عليه اول مايفكر بسيارة آخر

موديل وتكلفتها غالية واتوقع ان السيارات صارت اسعارها

اغلى من تكاليف الزواج ولما تناقش الشاب تقول له ليش

ماتتزوج وانت توظفت وصارعندك راتب يقول لك بدري على

الزواج الحين ابغا اتمتع واستانس والزواج لاحقين عليه يعني

اغلب الشباب حريصين على اقتناء السيارات ولوازمها اكثر من

حرصهم على تكوين اسرة وعذرهم ان المهور غالية طيب

السيارة اللي اخذتها قيمتها تفوق ثمانين الف او مئة الف هذا

المبلغ تقدر تتزوج فيه

انا زوجي عنده ثلاثة من اخوياه الوحد راتبه ما يقارب 11000الف

ريال واعمارهم من 37الى 40 سنه وهما عزابيه للحين ماتزوجوا

وطايحين بالسيارات كل سنه موديل جديد هاذا غير لوازم

السيارات واكسسواراتها اللي يشترونها بأسعار خياليه احيان

يطلبونها طلبية من جدة ولما تسأل اي واحد ليش للحين ماتزوجت

يجاوبك يقول والله المهور غالية ماعندنا امكانية نتزوج طيب

والسيارة هاذي معاك للحين

كم دافع لها وانت تعدل وتزخرف فيها فلوسهم كلها يصرفونها

على السيارات ومطاعم الوجبات السريعة ومغاسل الملابس

والشقق المفروشة والأجهزة النقالة الحديثة ولافكروا في الزواج

نعم هناك شباب يتمنون اعفاف انفسهم لاكن مثل مايقولون

العين بصيرة واليد قصيرة لاوظائف ولا قدرة مادية لاكن اللي

عندهم وظائف ورواتبهم زينه انا اشوف ان الزواج هو آخر

اهتماماتهم يحبوا يكشخوا ويسافروا ويتباهوا بالسيارات

والزواج في آخر القائمة عندهم

غلاء المهور ليس عذر للي عنده وظيفة وراتبها زين والدولة

الله يديم عزها ماقصرت تعطي اللي يبغى يعرس مبلغ وقدره

45000الف ريال وسمعت خبر انهم بيعطون حتى اللي ماعنده

وظيفة ولما يلاقي وظيفة رسمية يبتدي يقسط القرض

يعني حتى العاطل لو بغى يتزوج بيعطونه قرض وكل شئ

سهل وميسر بإذن الله

والمهور من ناحية غالية هيه فعلا غالية لاكن ماظنتي كل مهور

المملكة بتغلى كثر مهور اهل الجنوب عندنا بالجنوب يسلخون

المعرس سلخ والله انه يتزوج ويخلف 5او 6 عيال هو باقي

يقسط ديون العرس وعندنا واحد تزوج وخلف عيال ودفع باقي

مهر زوجته من مهر بنته اللي زوجها بالجنوب العريس يدفع للبنت

ولأمها ولأبوها ولخوالها ولعمامها ولسميتها ولو عندها ولد عم

قد سبق وخطبها وماصار نصيب يعطيه رضاوه ماتقل عن
5000آلاف ريال
هاذا غير القصر او قاعة الفرح والذبايح وتكاليف العرس وحتى

الزفة ماتركب سيارته الا يدفع المقسوم ان كثرت 5000آلاف ريال

وان قلت 2000ريال يعني الحمدالله انا عشت بالشمال ياحليلهم

ويازين تكاليف اعراسهم لاكن الجنوب يحلقون للعريس زيروا

اقل مهر يندفع 70000 الف ريال هاذا لو حصل له واسطه وعملوا

له تخفيض .

بالنسبة للأخ مضيع اللفة زواج البدل هذا زمان كان منتشر واذكر

عندناشايب عمره فوق 60 سنه كان متزوج من بنت عمه واخو

زوجته ماخذ اخته يعني بدل كل واحد ماخذ اخت الثاني

الشايب هاذا ماتوافق مع زوجته والثاني يحب زوجته ومتفاهمين

هو وياها الشايب كان لو صارت معاه هو وزوجته مشكله كان

يضربها وهي ترو ح لبيت اهلها كان الشايب مايروح يراضيها

ويرجعها بيتها لا يرو ح يشيل اخته من بيتها كان هاذاك مسكين

لما يجي البيت يلاقي عياله يصيحون خالي اخذ امنا ويقول اذا

ابوكم بغى امكم قولوا له يرجع لي اخته والله انه مايشوف


امكم ولاعاد تدخل له بيت وكان يرو ح مسكين يجيب معه جاهه

من الجماعة بيرجع زوجته يقول له الشايب انت رجع اختك وانا

ارجع لك اختي ولا خلاص انت طلق وانا اطلق وكل و احد يروح

بحال سبيله مسكين الثاني تلعوز لعوزة في زواجه

وفيه واحد ثاني بعد متزوج كذا بالبدل طلق زوجته وماعندها

اطفال وراح اخذ اخته من بيت زوجها وعندها 3 عيال وطلقها

من زوجها بالقوة قال له انت خذ اختك وانا آخذ اختي وجبر اخته

تروح المحكمه وتطلب الطلاق منه بالقوه وفعلا مسكينه

ضغطوها اهلها واخوها وطلبت الطلاق وطلقها زوجها

فالحقيقة هو زواج مايجوز لاكن زمان مثل ماقال الأخ قلة وعي

وجهل ما فيه احد يعلم عن الحلال والحرام شئ الحمدالله الحين

كل شئ واضح لناس في مثل هالأمور والله انا كنا نشفق على

حال اخت الشايب وهو كل يوم يسحب في اخته من بين اولادها

كان وضعها يحزن وحنا صغار كنا نشوفها تبكي نحسبه كان يضرب

اخته ولما كبرنا شوية عرفنا وش سبب سحبته لها من بيتها في

الصباح وبعدين كان يمشي ورى اخته ويصايح على زوجته

واخوها ايه هين انا اوريهم شغلهم والله لأعرفهم من فلان يقصد

نفسه ويقول لأخته يالله امشي قدامي والله غير اعرفهم قيمتي

ويجلس يبربر حتى يوصل لبيته بعدين زمان كانت الحريم

ماتقدر تقول لولي امرها لا كانت لوتكلمت ياويلها وسواد ليلها

هاذي معناته متمردة على اهلها كانت تطيعهم طاعة عمياء

بس الحين المرأة صارت لها شخصية اقوى عن الرجل وصار

صوتها مسموع ويحسبون لها الف حساب ماعاد إلا بعض

النساء صاحبات الشخصيات الضعيفة تلاقيها مسلمة الخيط

والمخيط بيد الرجل ليس احتراما ولا تقديرا ولا ثقة في اختيارة

ولاكنه خوفا من بطشه تلاقيها ترتعد لما تسمع صوت قرقعة

مفاتيح هذا الرجل وتلاقي هاذي الزوجة ماتقدر تحاور او تناقش

او تبدي رايها بأي شئ والسبب خوفها وضعف شخصيتها وعدم

ثقتها بنفسها وقدرتها .


معليش لفينا الموضوع لفة بسيطة بس تحملونا على الإطاله .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله