بسم الله الرحمن الرحيم


اخوانيه من بعد اذنكم اسمحولي بتعبكم معاي اتمنى تطلعون على موضوعي يوم تفضووون بارك الله فيكم .


سبق وطرحت موضوعي في المنتدى عن حادثه وفاه امي واخوي .. رحمة الله عليهم



خليفه من وفاه امي كان بعمر 11 وصار جريب يدش 14
واايد حساس اي كلمه تاثر فيه ويعصب ويصيح ... الموضوع ومافيه .. خليفه اخوي صار حسودي يحسد اي صديق عنده ام ..

يحسدربعه اللي عندهم امهات ... انا حاولت اشل هالعقده براسه موب راضي .. فكرت اودي دكتور نفسي بس اخوي موب مينون ..ومابا اوديه اخاف يتحسس ..او حد يدري ويقول عنه مينون ..
تعبني وايد يااخواني موب فاهمة كيف اقنعه ..


اخر مرة متصليلي المدرسه طالبيني لانه اخوي ضارب واحد بصفه وخذت الكلام من المشرف ونص التفاصيل من خليفه نفسه
الولد مسكين يايب بسكوت ماادري كيك ماركزت شو يايب .. المهم يلس يوزع على ربعه خليفه ماماده ياكل اال يسمع ربيعه يقول ترى امي مسويتلي الحلاوة مخصوص عشاني ( بحسن نيه موب قصده )
خليفه رد الحلاوة بالصحن قاله ربيعه خليفه كل وربعه يقولون كل حلوة والله يلس يقول شبعان
يردد عليهم ماباه شبعان ..
ربيعه الله يهديه قال لخليفه .. يعني مابتاكل من اكل امي.. خليفه قاله شبعان ماتفهم ..
رد الولد الله يهديه قال.. امي احسن وحده تطبخ وبرايك انت الخسران ..
خليفه هجم على الولد ببكوس يضربه .. العيال فرقوهم يلس يقول ماتفهم مابا اكل موب غصب
وعقب واحد مدرس خاطف سمع جاف الهواش وسحبهم لاداره ..



موقف صارله من فتره ..

داش خليفه البيت زعلان ومضايج .. يسب ربيعه ويقول والله وايد جايف نفسه وخقاق وغيره .. قلتله خير ش ناقصك اييبلك اياه
قال مابا شي موب ناقصني شي .. يلس يقول الولد يدلع على امه ويلوي عليها وامه يلست عندنا شوي يلست تقطعلنا الخضرة وتغرف لنا الخبيص وماادري شو ..
قلته حليلها فيها الخير والله ... قلتله وشو يزعلك بالسالفه .. مارد عليا ادري لانه مشتاق لامي بس اباه يقولها عشان يرتااح اباه يفضفض
ابا يصااارخ شو بداخله عشان يفج هالعقده اللي فيه

يلست اخبره قصة الرسول صلى الله عليه وسلم ودايمن اجوفه يتصفح الصور وكأن بخاطر كلام وايد بس مااعرف كيف اطلعه من الحاله اللي يمر فيها ..وطبعن الصور مستحيل اشله منه االبوم اذا قلت مااعرف وينهم جلب الدنيا على راسي عشان يتصفحهم اقوله ماتمل بسك
انا بصراحه استغرب لبسه كل لبسه اسود باسود .. مايحب يغير .. الا كناديره بيض..
كل تيشرتات وبرمودا وبناطلين يحب اللون الاسود ..
اجوف ربعه يلبسون ملون اقوله خليفه ليش ماتلبس شرات جي يقولي كل واحد وذووقه .
لاحوله ولاقوة الا بالله بعد شو اقدر اسوي..
سافر الحمدلله كذا مرة مع اختي وزوجها لدول اوربا غير جو ..
وسرنا العمره وان شالله ارتب جريب للعمره ضروري ..

ومن حلولي وديته المول في اخر بوظبي مارينا وسرنا عند الالعااب وطول الطريج شو بتشترين ومتى بنرد .؟؟ يوم وصلنا وديته قسم الاعاب فوق وششريت الكرت وعبيته فووول مترووس
واقوله بخاطري العب من زمان مالعبنا .. يلس يطالعني يقووول انتي ياهلة انتي اقوله عادي جوف هكوا الناس كلها تلعب مع عيالهاا .

وانا قاصده اوديه وين زحمه الناس عشان يجوف اللي بعمره كيف يلعبون ..
قلته ماباا اطلع لين مانلعب كله الالعاب ويلس يمسك ايدي ويمطني امشي وانا عاندته ولزمت العب

ولعبنا وانا كنت مستانسه اباه يستانس وهو يضحكلي من غير نفس كل شوي يقول بس خلاص وعقب تغدينا مع الناس كلها حوالينا تتغدى وزحمه .. واخر شي يوم ردينا يقولي مابا اسير معاج انتي ماتخليني اثق فيج ولا في كلامج ومفجاتج مااحبها


بس ناشدتكم تعطوني الحل لحالته .. مابا يحسد ربعه .. اباه يكون اكبر من جي .. ابويه الله يهديه ان قعد مع خليقه ماقال الا فلوس تبا فلوس شي ناقصك وبس ينشغل وكل وقته سفر من يوم وفاه الوالده واخوي بطي وانا موب عارفه كيف اتعامل معاه كل مايكبر يصير صعب الطباع