توكلي على الله في امرك..من توكل على الله فهو حسبه..يااختي نصيبك لسى ماجاء .. وانتوا كنتوا حريصين على ان اموركم تكون واضحة لان لو ماعلمتوهم في قرارة ذاتكم راح تكونون غلطانين .. وبالعكس المفروض تفرحين لان نظرتهم للمتملكة نظرة للأسف صغيره.. انتِ ماتبغين اللي ينظرك هذه النظرة انتِ قدرك عالي ..انتِ بيجيك اللي يقول انا ماعلي من ماضي هي مالها دخل فيها وهذه قسمة قسمها لك ربك ،يعني انتِ ماتصورتي ولا توقعتي ان بيصير فيك كذا في يوم بس رب العالمين كاتب هالشيء لحكمة احنا مانعرفها .. والله لو ندري رب العالمين وش مخبي لنا كان تضحكين على كل الهموم اللي مرت .. والانسان خُلق عجول .. قليل من الصبر راح تشوفي الفرج..
بقول لك قصة مش متذكره تفاصيلها لانها من زمان في وحده اعرفها خطبها ولد خالتها على ما اعتقد والكل عرف بهالسالفة وفجأه غيروا رايهم والله ناسيه التفاصيل ..المهم البنت تأثرت نفسيا وكانت تحن له لانها يمكن حطت نفسها انها تكون زوجته في المستقبل وجلست تحكي لي وبعد فترة انخطبت اختها اللي اصغر منها وقبل زواج اختها بأسبوع انخطبت هي لواحد شاريها وميت عليها لدرجة انه يوم انخطبت انهلوا عليها الخطاب وكانت مبسوطه انها تردهم لانها مقتنعه كل الاقتناع باللي متقدم لها وهو زوجها هذا تحمل سفرها لانها كانت مش في نفس الديره اللي فيها اهلها لانها موظفه وكانت مغتربه سنين وماقال شيء والله يوفقها دنيا واخره شوفي كيف ربي عوضها ..
ياحبيبتي انتِ مو ناقصك شيء وبالعكس هذا اللي بيعطيك دافع للحياه .. لاتخلين المواقف هذه تأثر عليك البسي وانبسطي واضحكي ولا كأنه شيء صار وهذا نصيب اختك جاء .. ترى الناس اذا شافوك مبسوطه ولا شيء مأثر فيك صدقيني تكبرين بعينهم ولاتقصرين على نفسك بشيء سوي كل شيء تحبينه وطلعي مواهبك واشغلي نفسك بهواياتك باللي يرضي ربك ..
والله يعوضك ويعوض باقي البنات اللي مثل حالتنا بخير ..