كل هذي الذكريات ما زلت اخط فيها على رمال الثمامه
نفس المكان اللي اروح له واعتدت عليه
والاحداث مستمره
طلعت السستر وقالت لي مداااام يقوووم من البنج
وقتها حسيت ان الحياة ابتسمت لي من جديد
ويوم طلبووو مرافق مع زوجتي
قلت ما يرافق معها احد غيري وفعلا رافقت واياها
وصار محمد وامه هم اغلى شي في حيااااتي
وما اتصوّر حياتي بدووونهم
راحت الايااااااام
وكنت دايم اخطط بمشروع تجاري
عشان ازيد دخلي
منها اسدد ديون ابوي
ومنها اسعد زوجتي وولدي
وكنت احلم اشتري بيت عشان اهديه لأمي وابوي
والله ثم والله اني ما ابالغ عليكم
كنت اذا رحت للبقاله عشان اشتري شي اقوول للعامل سلّفني الى آخر الشهر
واحيانا كنت اتسلّف من حارس العماره عشان اشتري حليب لعبدالله
ومع ذلك ما قلت شي لزوجتي حتى تنهي الاربعين
وبعد الاربعين
فتحت قلبي للي هي في وسط قلبي لزوجتي
وقلت لها اني كنت مخبي عليك السالفه لخووفي عليك
والسالفه وما فيها ( .......... )
وقلت كل شي يتوّض
وما دمتمي بقربي ومعي صدقيني انا اسعد الناس
ورح نعيش لو في كهف
هنااااااااااااااااااااااااااااااا
بداية قصتي الحقيقه ومعاناتي اللي قاعد ادفع ثمنها الى اليوووم
سكتت طووووووويلا
ثم تكلمت
وقالت كلام ليتني ما سمعته
قالت ( يا بابا ما احد طقك على يدك وقال ادخل لسوووق الاسهم وخلي حماقتك تنفعك
وبعدين انا ما عندي استعداد اني اعيش باقي حياتي تحت رحمة فقرك )
وقالت ودني لبيت اخوووي ويا ليت تطلقني
آهــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــ ومليووون آهــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــ
يعني كل حبي وتضحياتي وعمري فيك ما بيّن في عينك
آهــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ وش اللي قاعد يصير لي في دنياي
جهزت اغراضها
وفعلا وديتها لبيت اخوها
ونزولا لكرامتي دست على قلبي
ولبيت لها طلبها وطلقتها
خسرت كل شي
حبي و احلامي وفلوسي وحتى البيوت اللي كنت احلم اشتريهم
بس كان اكبر جرح هو حب زرتها في قلبي واسقيته من كل عمري
طلعت من الرياض والله اني ما اعرف وين ارووووووووح
ولا حتى ويني كنت فيه
كل اللي اعرفه او حسيت فيه
صووووووت فرامل
كنت مسرع سرعه جنونيه
ثم ارتطااااام
ثم بعدها اسمع ناس عندي وفوووق راسي
وهم يقولون ( لا حووول ولا قوة الا بالله )
اللي يقول لي ( قل اشهد الا اله الا الله )
واللي يقول ( ابعدوو عنه خلووه ياخذ نفس )
واللي يقوول ( اتصلو على الاسعاف )
بس فيه شباب سمعت ان هم اللي نقلوني للمستشفى
وكنت وقتها فاقد الوعي
وبعدها تم تحويلي للرياض
فتحت عيوني ولقيت نفسي في العناية المركزه
"
راح اكمل لكم قصتي ان شاء الله لأني طالع الان لصلاة الظهر
اكرر القصة واقعيه وصارت لي بكل احداثها
وبعد ما كتب لي الله حياة احببت اني اكتبها
يمكن تاخذون منها دروس وعبر
"" تكملة القصة ""
الموقف كان صعب حيييييل
وكنت اعتقد ان الحادث اللي صار لي
وان اصوات الناس اللي اسعفوني انه حلم
ما كنت اعتقد ولو جزء من واحد في المائة
اني رح القى نفسي في هذا الموقف
فتحت عيوني ولقيت نفسي اتنفس بواسطة الاكسجين
والاجهزه متصله بجسمي من راسي الى رجولي
وجهاز القلب والضغط يرتفع وينزل
الممرضه شافتني فتحت ركضت للدكتور
وجاني الدكتور وكان يبتسم لي ويقول الحمد لله على سلامتك
الحمد لله ما طولت فيك الغيبوبه وانت الان في احسن حال
بس رح تحتاج الى كم عمليه
لأن عندك كسور مضاعفة في الرجل وحول منطقة الحوض
وكان وقت ما جيت لنا عندك نزيف ولكن الحمد لله ربك لطف فيك
كنت اتكلم ببطء قلت له كم الساعه
قال الان الساعه 4 العصر
يعني كنت يوم ونصف غايب عن الحياة
لازمت المستشفى ثلاث شهور
واجريت عدة عمليات
وبعد معاناة كثيره من الرحله العلاجية
وقبل ما اطلع من المستشفى
قال لي الدكتور وبكل صراحه
( انت لما جيت لنا في المستشفى كان نسبة حياتك بيد الله
ولكن كان وضعك جدا صعب
والله سبحانه اكرمك ورجعت مره ثانية للحياة
لازم تكون قوي وتواجه الحياة بإرادة كبيره
يلزمك فترة علاج طبيعي طووويله
يمكن تقدر تمشي واحتمال لا
واذا مشيت ما رح ترجع مثل اول
بدي اياك ان تكون مؤمن وثقتك بربك كبيره
وانت افضل من غيرك بكثييير
عندنا مرضى ما يقدرون ياكلون ولا يشربون ولا يقضون حاجاتهم
الا عن طريق اجهزه
ولكن انت الحمد لله بخير والف عافيه )
وقت ما كنت في الستشفى
زارني اخو زوجتي مرات كثيره
وكان يجيب معه محمد واحيانا عبدالله
وكنت اذا شفتهم احس اني اشووف الحياة من جديد
اخو زوجتي انسان اكثر من محترم وزميل لي من فترة طويله
كان كل زياة يعتذر لي عن اللي صار من اخته
وانا ارد ( انت مالك اي ذنب )
وكان كل زيارة يقول لي معاناة ( زوجتي ) بعد بعدها عني
ويقسم بالله انها تبكي ليل نهار وتقووول ( كيف قلت هذا الكلام )
وقال لي انها كانت فرحانه بالبيت بس يوم رجعت لسوق الاسهم وخسرت البيت وكل املاكك جاتها صدمه
وكان يترجاااني ان نرجع لبعض ونفتح صفحة جديده
طلعت من المستشفى للبيت
وكانت امي الله يطول في عمرها معي على طوول
وتخبرون الامهات وحرصهم
راحت للعطاره خصيصا لي وتعالو شوفو الاعشاب والحلب و الرشاد 
وخالتي جات وجابت معه ( شبت ) مدري وش اسمه
وعمتي فديتها جابت طلعي مذبوح وقالت لامي تسوين له مرقه مع الحلب
واذا قدر ياكل العظيم يصير احسن ههههههههه
وكل وحده تسوي بي معمل تجارب
حسيت غرفتي صارت عطارة واعشاااب
يا لبيه والله انهم ونسوني والله لا يحرمني منهم ومن اهتمامهم
والحمد لله كان البيت كل يوووم ما يفضى
من اقاربي واالزملاء والجيران
من جد حسيت ان الدنيا ما زال فيها خير
بس يا جماااااااااااااعه
والله لو نلف كل الدنيا ما فيه مثل الام
الله يطول في عمرك يا امي
لأنها اتعبت معي ووقفت معي طووول فترة مرضي
حتى صارت ما تروح ولا تطلع من البيت عشاني
والله لو افديها بروحي ما يوفيها حقها
\
طبعا كنت طيلة فترة علاجي على الكرسي المتحرك
وكنت اروح للمستشفى بشكل مستمر عشان المراجعات والعلاج الطبيعي
تكملة القصة
بعد شهر من العلاج الطبيعي صرت اقدر اوقف على رجل وحده
بس بشي من الصعوبه
وصرت استخدم العكازات وفيه تحسن في صحتي
امي ذاك اليوم وهي عندي
كانت غارقه في التفكير
سألتها ( يمه وش فيك )
قالت يا ولدي اللي صار صار وانا امك
ابيك تتعوذ بالله من الشيطان وترجع زوجتك
هي اخطت وكل الناس تخطي
وتراها نادمه على اللي صار منها
تكفى وانا امك فكر في عيالك
قلتها ( يمه ما عاد لها اي مكان في قلبي ولا في خاطري ولا ابي اظلمها )
قالت ردها وربك يكتب ما فيه خير
سكت وتجاهلت الموضوع
ولكني اتفاجأ ان امي تفتح الموضوع بشكل يومي
وتلح علي وتطلبني اني ارجعها
وكل ما شافت عيالي تبكي بشكل محزن
ولا اخفيكم سرا ان اشتقت لــ محمد وعبدالله بشكل ما تتصورونه
واني افكر فيهم ليل ونهار
زارني اخو زوجتي ذاك اليوم
وطلب مني نفس طلب امي
قلت له ( ما ابي اظلم اختك خلها تشووف حياتها ترى ما لها مكان في قلبي )
قال .. رجعها وربك يكتب ما فيه خير
وفعلا رجعتها عشان ارضي امي اولا ثم مكان اخوها عندي واولادي اللي احسهم انظلمو
ولكن ............
استمريت في العلاج
زوجتي رجعت في ذمتي
ولكنها ما زالت عند اخوها
وانا في رحلة طووويله مع العلاج
بعد كم شهر صرت امشي ولكن بشكل صعب يعني 10 خطوات بالكثير
واستخدم العصا
وبعد الفتره الطويلة من العلاج الحمد لله انهيت العلاج الطبيعي
وقال الدكتور احتمال تستخدم العصااا طوول ما انت عايش
الا اذا الله كتب لك الشفااااء
وفعلا سلمت الامر لله ورضيت بقضاءه وقدره
صحيح اني امشي بصعوووبه وبالعصا ولكني افضل من غيري
رجعت لبيتي
ويوم وصلت البيت كانت زوجتي تنتظرني بعد غياااااب طويل
دخلت بس مو انا زوجها اللي كان من سنه
لا من قلبا ولا قالبا
فرحت بشوفتي بشكل ما تتصورونه
ويوم قربت مني اشرت لها بيدي تبعد ولا تفرب مني
وقلت لها ( يا بنت الناس ترى مالك في قلبي اي مكان وانا اشوف انك تشوفين حياتك )
قالت ارجووووك خلني خدامه عندك ولا تقوول هذا الكلام
انا اخطيت خطأ وزلة لسان ومستعدة ادفع ثمن غلطتي طووول حياتي
الان لي خمس سنوات من حادثي وازمتي وقصتي
واسمحوو لي اقول لكم وش صار في هذي الخمس سنوات الى يومكم هذا
** كل يوم يمر لازم تدمع عيون زوجتي وتطلبني اني اسامحها
** ما زلت امشي بالعصا وبصعوووبه وما زلت على العلاج الى يومكم هذا
** بعد كل فتره اقوول لزوجتي ( يا بنت الاجواد شوفي حياتك ما ابي اظلمك معي )
** محمد في صف اول ابتدائي وصار هو واخوه كل حياتي
** انقطعت عن كل الزملاء والاقارب لان ظروفي الصحية تمنعني من التواصل معهم
** ما زلت الى اليوووم وانا ادفع ضريبة دخولي لسوق الاسهم واسدد في الديون
** عندي غرفة خاصة فيني اجلس فيها اكثر يومي الاناره خافته جدا والستائر ثقيله احب اجلس في هدووء
** نفس المكان اللي في الثمامة ما زلت الى يومكم هذا ارووح له بعد فتره وفتره
** سفرياتنا صارت شبه معدووومه يعني يمكن كل سنتين مره بعد ما كانت اسبوعيا
** محمد وعبدالله يروحون معي دائما سواء للمسجد او السوبر ماركت او حتى اهلي وللاسف زوجتي شبه مقطوعه
** يسألوني عيالي بشكل دائم ليه يا بابا ما تعرف تمشي يقوم عبدالله ويمشي ويقول ( كذا يا بابا )
** امي بدل ما كنت اشوفها من اسبوع الى اسبوع ابشركم اني اشووفها بشكل يومي واقضي لها حاجاتها
** صرت في البداية انحرج اني اطلع بالعصا ولكن الحمد لله الفتها وصرت امشي فيها
رجعت للدوام بس بوجه غير اللي كانو يعرفوني فيه زملاي بهدووئي وانطوائي
تصورو اول من يحضر انا وآخر من يطلع انا
وانسووو اني آخذ اجازه صرت اشووف حياتي في عملي
والزملاء دائما يقولون لي ( احرجناك معنا ممكن تغطي علينا الشغل ونطلع )
ارد عليهم ( افا عليكم انتم بس تامرون امر )
وتعبو وهم يترجوووني ان ارجع لدوريتهم في الاستراحه من خمس سنوات الى يومكم هذا وما رجعت
وهذا كل قصتي
وارجووووو ان تكون عبره ودرس يمكن تستفيدون منه
واعذروووني على سرد القصه
ولكني فعلا محتاج لأحد اقول له ويشاركني
ولكم مني خالص تقديري واحترامي