راجياً من الله حل مشكلتي
السلام عليكم اخواني منتدى عالم الاسره و المجتمع
اشكر ادارة المنتدى الرائع و اعضائه الرائعين
اخواني عندي مشكله و قلقان ولا ابي اضحك على نفسي
المشكله
اني تقدمت و ردو بالموافقه خلال 5 ايام وشافتها امي واهلي بس اني طلبت الشوفه الشرعيه بحيث الطرفين
يحددون حياة بعض ..فكان الرد بالرفض وقالو البنت رفضت و من بعد 3 مرات صارحني
اخوها بان الرفض من ابوها وانه مو متقبل موضوع الشوفه بحكم العادات و التقاليد
فا ماحبيت اجبرهم تركتهم على حريتهم وصليت وطلبت الاستخاره لمدة اسبوع و الحمدلله تمت الامور
وملكت وكانو يبغون الملكه مستعجله ولحد الان محتار وش فيهم مستعجلين بكل شي
و قضيت وصارت الحين زوجتي على سنة الله و رسوله
بعد تقريباً اسبوعين بحكم اخوها متفتح ولا هو متشدد وبالعكس انسان متفهم
بس مشكلته اذا اتصلت مايرد ولا يتصل الا بعد 4 ايام كذا مره يسوي الحركه هذي
مو مشكلتنا هذي ..الحاصل اني فهمته و جيته باسلوب وطلبت رقمها اني اكلمها
فقال والله من حقك ولا احد يمنعك هذي زوجتك وحلالك وتبعك مو تبعنا
لكن انا بكلمها و استأذن منها..قلت طيب مو مشكله ...الحاصل بعد 3 ايام كلمني
وقالي انها رفضت وتقول مستحيه وماقدر اكلمه و قالت لاتعطيه رقمي نهائي ولا ابي اكلمه
صح اني اخذت بخاطري شوي بس قلت مو مشكله
راحت الايام وكنت ماشي بطريق ولقيت محل هدايا حبيت اهدي لها هديه و اجلس معها لانها
زوجتي وحلالي ولا احد يقدر يردني ..كلمت اخوها فقلت شوف خطيبتي متى يكون الوقت المناسب بزورها
معي اغراض بعطيها وبجلس معها ووووو مثلي مثل احد وده يعيش ايام الملكه ويجس بطعم فرحته
جاني الرد بالرفض وانها مستحيه وووو انا استغربت الا متى مستحيه يعني كاني انسان غريب
فرميت الهديه من القهر و الرفض
هذا اختيار ابوي لشريكة حياتي
طبعاً لي اخت واقرب انسانه لي وهي الي افضفض لها و تفضفض لي والي بينا غلا مايعلمه الا الله
خبرتها بالسالفه كلها والي حصل
فقالت بسيطه قلت كيف قالت بسيطه و بس سكتت اختي وانا سكت ماقلت شي
بعد يومين اتصلت اختي و خبرتني بالي حصل كله ..قلت ايش وايش الي حصل
قالت السالفه اني ماعرف رقمها بس اني كلمت امها وسلمت عليها وباركت لها واعتذرت بالتهنئه
المتأخره وطلبت اني اكلم فلانه الي هي خطيبتي قالت امها تبين تكلمين فلانه ..قالت اختي ايوا
ابي اكلمها .كأن الام مقروصه وضيعت بالكلام و قامت تلخبط بكلامها وقامت تتكلم كلام متقطع هههههههههه
قالت اختي ليه مامعها جوال هي ..قالت الا بس مدري خربان او طافي شحنه لكن اتصلي
بعد 5 دقايق وتكلمك لاني فوق..قالت اختي لا خلاص مابي ازعجك يا خاله عطيني رقمها اكلمها
قالت لا خلاص كلمي بعد 5 دقايق..كلمت اختي بعد 10 دقايق وردت خطيبتي على طول
وكلمتها اختي وسلمت وباركت ووووو وقالت فلان يبي يكلمك ..قالت شوفي اخوي كلمني
وقالي بس انا مابي اكلمه ولا ابي ياخذ رقمي لاني ما بي شي يلهيني عن دراستي و اختباراتي
وماتخيل اكلم رجال
قالت اختي خير وش الي غريب وما ارضى تقولين عن اخوي كذا
هذا زوجك ومن حقه يكلمك ويتعرف عليك ويتعرفين عليه ..قالت حتى انا ما اعرف عنه شي بس انا مابي
قالت عادي مافيها شي كل البنات يكلمن اذا خطبت الوحده لاتحسبينه بيصير شي
قالت انتي فكري ورقمي عند امك وعلميني ..قالت انا مفكره ومقرره و منتهيه مابي اكلم ومو مقتنعه
بالمكالمات كل شي يكون بعد الزواج ان شاء الله...قلت اها يعني هذا الي حصل كله قالت اختي ايه
راحت الايام وصرت خاطب لي 4 شهور و زواجي بعد 5 شهور والمده طويله
من بعد خطبتي صرت متواصل مع ابوها وامها بين فتره و فتره اكلمهم واسال عن اخبارهم
واسال عنها ...الي ماشفته من خطيبتي الا بعد ما عترفت اختي قالت لي جلسنا 4 شهور
وخطيبتك تكلمني واكلمها واكثر شي بيننا رسايل بس ماعمرها سالت عنك ولا جابت طاري اسمك
نهائي وحتى طلبت منها تكلمك ورفضت وقالت لاحقين بعد الزواج خليه يصبر
الغريبه محلفه اختي بأنه لايعرف خطيبي اني اكلمك ولا ابغا يكلمني ولا ابغا يعرف بينا تواصل
فسالت اختي عن طريقة اسلوبها فقالت : عسل و حبوبه وفيها دين ما شاء الله
انا استغربت يعني انا متواصل مع والديها واسال عنها وعن اخبارها وعن دراستها
ولافكرت بيوم تبادلني الشعور
انا يا ناس فيني حب و فيني حنان مليان ودي افرغه بحلال واقسم بالله لو ابي اكلم بنات اقدر
وبكل سهوله بس ماسك نفسي وادعي ربي عسى الامور تتعدل و تحس مثل ما احس وتترك الثقل
الي فاهمته غلط واتوقع اتوقع والله العالم ولا احط شي بذمتي
البنت بفترة الخطوبه تلقى صديقاتها يقولن اثقلي و طنشي ولا تهتمي واجعلي لنفسك شخصيه
وافرضي رايك بالقوه وووووو كثير اسمع كذا هذا غير الام وتوصايتها افعلي كذا وسوي كذا وووو
والنتيجه هدم العشه الزوجيه بكلام وافكار متحجره لاتمت للدين بصله
وانا عندي يقين راح تجيب الخطأ على راسها
وامس كلمتني اختي وقالت قبل 3 اسابيع قلت لها فلان يبي يكلمك وقالت مابي اكلمه
وخليه يصبر لين بعد الزواج
انطلقت على اختي وسفلت فيها ولعنت خيرها وهاوشتها ليه تطلبه منها وانا ما قلت لها
وتحطها فيني واني طلبت وقفلت بوجهها الجوال من حر مافيني
وافكر الحين اعلمها كيف التطنيش والله لا اخليها تحتار احبها او لا بسوي مثل ماتسوي و ارد لها
الصاع صاعين وتحس بتجاهلي وانا متاكد ماراح يهمها شي نهائي
احس فيها برود ومو مهتمه ولا شي
كانها ماشيه بطريق التغلي و الثقل واضح مره وراح
يعني تخيلو : رفض الشوفه الشرعيه و رفض زيارتي لها بعد الخطبه الرسميه وهي زوجتي وتحل لي
ورفضها مكالمتي
حطيت مليون خط احمر تحت اسم العائله فيه شي بس غامض ولا اعرف وش حكايتهم
جاني ردة فعل من صدماتهم و صدماتها لي و الاشد وقت الهديه كان رد اخوها ( عادي الهديه ترد )
من بعدها قطعت الاتصال مع اخوها نهائي ولا اعترف فيه ورميت الهديه
وكان متواصل معي بالواتس اب بس تجاهلته نهائي وحالياً شهر ونص متجاهل لاني احتقرته احتقار
مدري وش اسوي ابي حل تكفون
التعديل الأخير تم بواسطة زياد فهد ; 25-04-2012 الساعة 12:15 PM