السلام عليكم عذرا للانقطاع ونكمل معا من حيث توقفنا

الصدمه اللي قصمت ظهري هي لما كنت مسافره عند اهلي بحيث ان هلي في مدينه وانا في مدينه وهو مايسمح لي اني اروح لهم الا مره في السنه في الاجازه الصيفيه ودائما اطلبه انه يسافر معي وساعات يتعذر بالاجازه وساعات يجلس بعدي اسبوع او اسبوعين يلحقني
وهو يستمتع اكثر مني باجازته هناك اولا منطقه ذات مناظر خلابه وعائلتي تشيل كل التكلفه والرسميات ويحبون انه ياخذ راحته ولو على حساب انفسهم
وغير كذا بيت اهلي كلهم اخواني الشباب ومعهم يقضي اروع اوقاته لدرجة انه دايم يقولي انه يستمتع معاهم ويشكر ربي على هذي النعمه اللي هي انا واهلي وانه توفق فينا من جميع النواحي ولله الحمد
طبعا الصيفيه الاخيره قبل سنه رحت عند اهلي وهو حاجز بعدي باسبوعين بحكم انه متقيد باجازته وكنا متفقين اروح معاه او اسبقه فقال عادي اسبقيني كلها اسبوعين
طبعا قبل اسافر بيتي لازم المه واجمع الكنبات واغطيها و و و حماية له من الغبار
وفعلا لحقنا وكان واضح انه جدا مشتاق لي ومثل ماقلت الكلام والافعال تبين ان هالانسان مايشوف غيري
ورجعنا بع اجازتنا سوى وكملنا حياتنا تمام الى قبل شهريييين

طلب مني مبلغ 2500 سلف
بصراحه استغربت زوجي مرتاح ماديا بس شرينا جمس جديد اخر موديل وقلت يمكن هذا السبب
وفي نفس الفتره جواله كان امامي وجته رساله من اخوه والايفون يبين محتوى الرساله بدون فتحها
مضمون الرساله واللي فهمته منها انه تسلف من اخوه
بصراحه قلقت وهذا اللي خلاني افتح الجوال وانبش في رسايله هو واخوه..................
هنا الصدمه
لقيته مرسل لاخوه رساله تاريخها يوافق الاسسبوع اللي كنت فيه عند اهلي وكاتب له
ابو فلان لاهنت ابي امر اخذ مفتاح شقتك لان عندي ديت(مواعد وحده)
وشقتي مكركبه ولا فيني ارتب وابيها الليله
رد له اخوه حياك مافي مشكله
الدنيا دارت فيني ديت ... شقه.....يعني ايش الوضع متطور لهالدرجه
طيب الصلاه اللي في المسجد
صلاة الفجر اللي يصحى لها من عز النوووم
طيب القران اللي يختمه كل اسبوعين من 3 سنوات
طيب حلقات حفظ القران ويعطيني اسمع له
يوووووه فيه شي غلط مستحيييييل طيب الدلع والعشق و و و و و
يعني كل هذا تأنيب ضمير واحساس بالذنب

طبعا واجهته واغرق نفسه بالدموع ودخل حاله هستيريه وانا مصدومه وطلبت ننفصل في الحال لكن بحكم ان بناتي مدارس وحده في الصف الثاني ابتدائي ووحده في الصف الاول وبنوته عمرها 3 سنوات وكلهم متعلقيييين فيني قررت ننفصل وانا عنده بمعنى انه يطلع من البيت وطبعا رفض فكان فقط حدوده قسم الرجال واذا بغيى يدخل يدق الباب بحيث اني ابعد عنه وكل هذا بذوق احتراما لمشاعري وعشان مانحسس البنات بشي وفعلا تم لاني لو طلبت اروح عند اهلي واصريت هو اكيد راح يقهرني فيهم وياخذهم مني وانا خفت عليهم وابي افكر بدون محد يضغط علي
هالانسان ماعاد له في خاطري مكان بالذات عقب ماكتشفت ان سبب تعبي ومراجعتي عند طبيبات النسا والولاده والالتهابات وصلت استخدم 4 مضادات في شهر واحد ومالقيت استجابه وهو بكل ثقه يوديني ويجيبني من المستشفى انصدمت انه هو السبب

انا اكرهه وامقته وما اتقبله واخاف اني ماعاد اخاف الله فيه بحيث مافي مجال اجامله واجبر نفسي على احترامه بالرغم من محاولاته وتنازلاته والسبب اللي رابطني فيه اني مرتبطه بدوامي ومدارس بناتي ولا ابي اشتتهم اروح واخليهم او اسحبهم من مدارسهم وطبعا في تطورات بكتبها لاحقا بس الحين احس اني مجهده نفسيا وراح اكون معكم اول باول

وارجوكم لا تبخلون علي بدون مجامله وابي الواقعيه البحته


ملاحظه:اخوه صاحب الشقه متزوج وتارك بناته وزوجته عند اهلها لمدة سنتين من غير ما يسأل حتى عنهم ومعلقها وطالما انه فتح شقته لاخوه فهو بالتالي لا يقل عنه في هذي الامور وزوجته كانت تحس وتعاني ايضا من التهابات وهجر وجفا وغيره