أشكرك أخي الكريم...
هذا الشيء صحيح صارت تسال بهذه الطريقه لدرجه صارت اذا ما جاوبتها تقول أنت لا تصير مثلهم أنا أحبك بس لا تخليني يا خالد بروحي , ساعات أحاول أجاوبها بطريقه هاديه اني مستحيل أتركها وهذا اللي سويته كله عشانها .
ولكن مع هذا كله أصبحت عصبيه ( مع أن هذا الشيء مب من طبيعتها طبيعتها هاديه ) يعني مثلاً أتصلت بأبوها وأول ما سمعت صوته يلست تصيح بطريقه هستيريه وتقوله أنت ما تحبني يا أبوي ( مب طبعها ترفع صوتها على أبوها ) عمي جن جنونه واتصل عليا يسألني وقعد يصارخ بنتي شو فيها شو سويت فيها ؟؟؟؟؟؟؟؟؟؟ حاولت أكون هادي وياه ورديت وقلت يا عم أنت من يوم ما سافرت بتكمل شهر ما فكرت تتصل عليها ولا تسال عنها هذا الشيء زعلها منك قالي أنا قلت ما راح اتصل فيها عشان شوي تبعد مني ولا تتعلق فيني وتعتمد على روحها أنا سكت واقتنعت بكلامه طبعاً قرر يرد من السفر ...
صارت كل تصرفاتها استفزازيه وهذا الشيء اللي يعصبني بسرعه منها أصبحت حياتنا من يوم ما شافت امها مشاكل بطريقه مب طبيعيه كلها ردود أفعال مني ومنها ....
يوم الخميس طلعت من البيت وكانت هاديه أول مره تسالني فين بتروح سالتها في شيء تبين تطلعين مكان تبينا نسافر قالت لا , قلت لها خلاص كلها كم ساعه وبرد البيت وطلعت وما رديت الا يوم السبت ولا فكرت تتصل تسال فينك .
المهم انصدمت انه الوالده ( الله يصلح حالها ) لان لي فتره ما شفتها قررت تزورنا البيت كان يوم الجمعه المساء من غير ما تعلمني
( لو أدري كان منعتها لان وضعنا في البيت مب طبيعي ) كانت في وجهها لجين وصارت بينهم هواشه باختصار اللي صار بينهم انه لجين من يوم ما يات الوالده ما نزلت لها مع ان الخدم بلغوها انه الوالده موجوده وظلت في حجرتها وقت العشاء طلعت الوالده عندها الحجره وطلبت منها تنزل وعلى كلام الوالده بالقوه وافقت تنزل وياها اللي صار وقت العشاء على كلام الوالده حدود ربع ساعه قالت ولجين قاعده ما طلبت من البشكاره تحطلها شيء في الصحن ( تقول الوالده يا ولدي كانها في عالم ثاني ما كانت وياي ) طلبت الوالده من البشكاره تحط لجين اكل مجرد ما بدات البشكاره تحط فجأه قالت بدات لجين تصرخ وخذت الصحن من أيدين البشكاره ورمته على الارض وقالت أنتي ما يخصج فيني مب غصب اكل فهمتي الوالده عصبت وقالت لها عيب عليج هالكلام أنتي مثل بناتي شو هالرمسه يا لجين , قالت ما خلصت كلامي الا وهي تصيح وتقول اسفه اسفه ورمت نفسها بحضنها وقعدت تصيح فجاه نزلت ركض لصالة رسم وبدات تقطع لوحاتها وتصارخ تقول أكرهها الوالده حاولت تهديها ردت وسبت الوالده كلام مب طبيعي الله يهديها الوالده اضطرت تمد أيدها عليها وبس طلعت حجرتها وهي تصارخ اكرهكم كلكم ...
أنا رديت البيت السبت وحاولت أكون هادي وانا طالع عندها الحجره وانا ادعي الله يعطيني الصبر عليها دخلت عندهها حاولت ارمسها ابد ساكته ولا ترد سالتها ليش قطعتي لوحاتج مب حراام هذيج الساعه نطقت وياليتها تمت ساكته قالت أنت مب من حقك تسالني فاهم ,, سالتها عيدي شو قلتي ,, قالت أنا ما أعيد كلامي اوكيه ليش انت فينك عني يومين ولا سألت عني ,, ليش ما اتصلتي انتي وسالتي عني ,, اتصل شلون وانت شايل كل شيء عني ,, قتلها ليش فين راحت تليفونات البيت ,, بصراحه يوم حسيت الموضوع بيقلب عليا سالتها ليش غلطي على الوالده وسبيتها يالمتربيه ,,, قالت ما صار شيء من بينا وانا غلط وهي عطتني كف خلاص ارتحت عرفت شو صار شو بتسوي بتضربها عشاني ( وانا مصدوم هذه لجين تتكلم ولا وحده ثانيه كانت ترد ) أنا قتلها هذا اللي ناقص أمد أيديني على أمي عشانج ضحكت وقالت وانا ما طلبت وأصلاً انا حتى ما اتصلت عليك عشان أعلمك باللي صار لاني انا غلط عليها ...
طلعت من عندها وراسي بينبط شلون اتعامل وياها شلون أعزز الجانب الديني عندها واحنا مب قادرين نتفاهم اي سالفه تنفتح من بينا تقلب هواشه ..
في البدايه عقب ما شافت أمها حسيتها قربيه مني وكانت خايفه أبعد عنها وكنت حاس بالشيء ولكن هي اليومين اللي غبتها عن البيت قلبت وحده ثانيه , الوالده تقول ملامح لجين مكسوره وتحاول تسوي روحها قويه بس شلون مب عارفه فصارت تتبع أسلوب صراخ مادري اذا هذا الشيء صحيح ؟؟؟؟
ساعات احسها تسمع الكلام وتكون هاديه مثلاً يوم أسولف وياها عن الحمل وأنها راح تكون أم تستنكر هذا الشيء وتقول لا عشان ما أرميهم شلون اعيش حياتي يا خالد من غير أمي أحس تفكيرها كل منحصر بامها مب قادره تتجاوزها ...
موضوع أني أقابل أمها أبد وصعب بالنسبه لي منتهي وأنا من البدايه علمتها انها راح تكون اخر مره تشوف أمها ولا راح أفكر أقابل وحده مثلها عشان أسمي وأهلي بعد..