حياك الله اختي الغالية اوناا وشاكرة لك اهتمامك ومتابعتك

ابشرك الحمدالله الحين البنت صار لها يومين وهيه طيبة ماعليها خلاف ومن ناحية اني اتوضا واغسلها بالماء اللي توضيت فيه

والله وبدون ما تقولين لي اني مسويتها ومتوضين كل اهل البيت

ومغسلينها بماء الوضوء والحمدالله كلمة ماشاء الله تبارك والله اني انا واولادي وزوجي ماتفارق السنتنا وانا معودتهم كلهم حتي هيه البنت الصغيرة لو شافت شئ تقول ماشاء الله يا ماما شوفي هاذا حلو وكل اولادي هاذي الكلمة ماينسونها ابد دائما في مواضع الإعجاب اول شئ معودتهم يقولون ماشاء الله تبارك الله من الصغر ومعلمتهم ان الواحد يقولها على نفسه وعلى كل شئ يعجبه والحمدالله ماعمري لاحظت ان احد من اولادي شاف شئ وما يقولها واشدد دائما على قول ماشاء الله تبارك مع اولادي واهلي وجاراتي ودائما اعتب على اللي مايقولها مرة وصل بيننا خلاف انا وامرأة من قريباتي كبيرة في السن مدحت في بنت من البنات اللي نعرفهم وماقالت ماشاء الله تبارك ولما نصحتها وقلت لها اذكري الله ياخالة وقولي ماشاء الله عليها الله يحفظها وهاذي

تنشب بحلقي ليه وش قالوا لك انا شيطانه انا حرمة اخاف الله ومصلية وصايمه وعيني باردة وماعمري نظرت احد او حسدت احد عيال اولادي وبناتي عندي ياكثرهم ماعمري طالعت في احد منهم وانا ياالله ياليتني سكت كان احسن لي بس انا ما احب اللي يمدح شئ واللي يشوف شئ ومايذكر الله عليه هاذي الصفة ما احبها ابد وكمان اللي يوعد ومايقول ان شاء الله او اذا اراد الله

لازم ان الشخص يتحرز وينتبه لمثل هاذي الأشياء وكمان اذا ودعت احد من اولادي او زوجي او قرايبي دائما اختمها بعبارة استودعتك الله الذي لا تضيع ودائعه وقت طلوعهم من البيت او وقت محادثتهم في الهاتف والحمدالله اللي ربي ملهمني لهاذي العبارات واني ما انساها حتى لو انا بأحلك الظروف واصعبها

غاليتي اوناا الظاهر من شدة الخوف والقلق على اطفالنا بنمرض وتشيب رؤسنا من الهم والتفكير اللي حنى فيه
انا بعض الأوقات اجلس مع نفسي واقول ليش انا حزينه ومكتئبة
وزعلانه على شئ ربنا كتبه على اطفالي هو الله اللي خلقهم واوجدهم من عدم وماراح ياخذهم إلا اللي خلقهم وكونهم وهو ارحم بحالهم مني وخلاص عقب هالتفكير اسلم بالقضاء والقدر وارضى وتنزل عليه طمأنينه وسكينه وترتاح نفسيتي ولاكن بعض الأوقات تنغزني وساوس الشيطان وترو ح بأفكاري لبعيد ومع
مرض اي طفل انا اضعف واخاف على الطفل المريض والشيطان مايقصر كل شويه يوسوس لي بشئ خصوصا انه انا
متعلقة في اطفالي بشكل كبير جدا
ربنا مارزقني الخلفة الا بعد 8سنوات زواج وكنت اظن اني ماراح

اخلف اطفال ولاراح اسمع كلمة ماما في يوم من الأيام والحمدالله ربنا كريم يرزق من يشاء بغير حساب وهاذا هو سبب خوفي وتمسكي بأطفالي وكمان حملهم وولادتهم واجهت فيها شتى انواع التعب والعذاب اول حمل لحاله جلست ثلاثة شهور بالبيت نايمه على ظهري ما اقدر اتحرك ولا اشتغل ولا اسوي اي شئ والسبب نزول في الرحم ونزيف بدون اسباب وكل اطفالي الشهور الأولى اتعب واقابل نفس المشاكل واجيبهم ناقصين عن وقتهم يعني كلهم يدخلون للحضانه اول واحد جلس شهر وعليها كم يوم في العناية المركزة جبته بأول الثامن وكنت اتعذب عذاب لما ارو ح وازوره بالمستشفى اشوفه في بطن صندوق زجاجي حاطينه والأجهزة في جسمه كلها وكنت نفسي اشيله واضمه وابوسه بس ممنوع وكنت عايشة بين الأمل والخوف ياترى هل بيعيش او يموت وانحرم منه وياترى هل اقدر احمل مرة ثانية او لا عندي عقدة من السنوات اللي امضيتها بدون حمل كنت اقول خلاص ياربي الحين ولدي لوصار عليه شئ لا سمح الله ما عاد اقدر احمل بسهولة وسبحان الله ولدي ربنا طر ح فيه البركة وتعافى وتحسنت صحته وطلع من المستشفى للبيت وحملت على الأربعين بالثاني مباشرة والله اني جبته الثاني والأول عمره 11شهر وباقي مايمشي صغير وتعبت فيهم وفي تربيتهم بس كنت فرحانه ومبسوطة فيهم واحمد الله واشكرة الحين يلبسون مقاس واحد

ملابس اللي يشوفهم يسألهم انتم توأم لأن اشكالهم مثل بعض طول وعرض وكل شئ الحمدالله والشكر لله

والظروف اللي انا مريت فيها وعشتها في حياتي هي اللي

وصلتني للخوف والقلق اللي انا الحين عايشة فيه الطفل لو حرارته ارتفعت درجة وحدة على على المستشفى وارجهم رج

الأطباء والممرضات في المستشفى حتى زوجي بعض الأوقات يقول لي شوفي ترى هم بشر مثلنا اذا الله اراد ياخذ المريض
هما ماراح يسون له شئ هم ليسوا رب العالمين ليس بيدهم الموت والحياة والشفاء والمرض تعوذي من الشيطان وريحي نفسك واللي ربك كاتبه لطفلنا بيصير الحين لو الله بيقبض روحه انتي او انا او الدكتور بيردها له او يدافع عنه لا مستحيل هاذا شئ بيد الله عز وجل كلنا ضعفاء وكلي امرك لرب العباد وخلي املك بالله كبير هو الله اللي رزقنا واعطانا وهو اللي بياخذهم الحين اطفالنا عندنا امانه ومتى ماالله ارادهم استردهم
زوجي يفتح لي محاضرة بالمستشفى اما انا لاعاد انام ولا آكل ولا ارتاح حتى الله يشفي ويعافي طفلي المريض

تصوري اعطيه دواء خافض للحرارة وما انام اجلس اراقب اقول يمكن انا انام وحرارته ترتفع فجأه ويمكن الدواء مفعوله مايجيب نتيجة وترتفع حرارة ابني او بنتي ويصيبها تشنج ويحصل معاها مضاعفات وقتها ماراح اسامح نفسي والله ان بعض الأوقات تمر عليه 48 ساعة عيني ماتذوق النوم لو جيت بنام
اغمض عيوني شويه وافز من مكاني وبعد الفزة والله اني احس لي ثلاثة ايام نايمه احس اني شبعانه نوم
خلاص يطير النوم والنعاس من عيوني حتى الممرضات يسألوني يقولون ماما انتي ليش مافيه نوم كذا مافيه كويس نامي ماما انا موجود هنا مافيه خوف بس انا ما ارتاح لهم ابد

المهم اوناا انا يمكن قلت لك قصة حياتي كلها وطولت عليك يالغلا

بس بوضح لك الأسباب اللي بهذلتني وجننتني وخوفتني على بنتي

الحين الحمدالله هي طيبة علشان كذا اليوم نفسيتي عال العال الحمدالله والشكرلله
وأسأل الله ان يحفظ لنا وإياكم اطفالنا ويعافيهم ويشفيهم ويخليهم ويحفظهم لنا من كل شر ومكروه يارب .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله