الحمدالله والشكر لله عز وجل مافيك الا العافية ان شاء الله تعالى وصدقيني ان الحرارة سببها تجمع الحليب بصدرك حاولي انك ترضعين الصغيرة بإستمرار واهتمي بأكلك زين التغذية الصحية ضرورية للمرأة المرضع طيب تاخذين مانع حبوب والا عندك طرق اخرى لمنع الحمل انتبهي اذا كنتي تاخذين حبوب احتمال ان الحبوب لها دور في الحرارة اي مانع حمل تدخل فيه هرمونات يسبب مشاكل للمرأة سوى حبوب او إبرة او لصقة كلها لها تأثير لأنها هرمونية تغير كل شئ بالجسم وتلخبط كل شئ عندك الله يكون بعوننا يالحريم ويكتب لنا الأجر والثواب حياتنا كلها مشقة وتعب في الحمل والرضاعة وحتى لو الوحدة فينا بغت تريح شوية لازم تاخذ مانع ولو اخذت مانع يأثر عليها وعلى جسمها بالكامل شعرها يتساقط واما تنحف او تسمن والدورة تخربط عندها هاذا غير الحالة المزاجية والعصبية الله يعين ويرزقنا بالأجر والثواب

بالنسبة للمضاد استخدميه للمدة اللي ذكرتها لك الدكتورة وكمان حاولي انك تاخذينه على وقته مثلا اذا كان ثلاث مرات يكون كل 8 ساعات واذا كان مرتين معناته كل 12 ساعة حاولي تضبطين مواعيد شرب الدواء وتكون معدتك مليانه لازم تاكلين زين قبل اخذ الدواء والمضاد حلو اذا سمح الله وفيه هناك التهابات فيروسية او بكتيرية يقضي عليها ان شاء الله بس انتي اعطيتي الدكتورة خبر انك ترضعين علشان الطفلة ما تتأثر من المضاد

لأن اي دواء تاخذه المرضع ينفرز مع الحليب فانتبهي لطفلتك

وبالنسبة للفطام بنتك عمرها تسعة اشهر ماشاء الله احس ان توها صغيرة فلا تمنعيها من صدرك ماشاء الله تبارك الله اذا كان الحليب بصدرك يدر زين فلا تمنعيها لاكن لو انه الحليب اللي بصدرك ماهو كثير ومايكفيها وانتي تتعبين حاولي انك تدورين لها بديل وعلميها خليها تاكل اخلطي لها بالخلاط رز ودجاج وادام وخففيه بشوية موية خليه مثل السريلاك وحطيه بالثلاجة واعطيها منه كل مابغيتي تأكلينها طلعي جزء منه وسخنيه واطعميها بالملعقة بالبدايةراح ترفض لاكن مع الوقت ترجع تتقبله واعطيها زبادي وملوخيا بالأرز والله انها زينه ماشاء الله تبارك تزيد وزن الطفل وترفع عنده نسبة الدم دائما اسويها لأطفالي وهما صغار


المهم توهتك طلعتك من موضوعك ودخلتك في موضوع غذاء الطفل

انتي الحمدالله مافيك الا العافية ولاتفكرين ولا توسوسين

صدقيني وانا اقولها لك الحين انك طيبة ومافيك خلاف وكمان

بنصحك نصيحة لك ولغيرك لا ترضعين بنتك قدام احد ماتثقين فيه

ترى العين حق انا الاحظ بعض النساء ان طفلها لو بكى على طول تطلع الثدي وترضعة بدون ماتحسب حساب للي حولها
اعرف امرأة عز المعرفة ولدت ولما روحت لبيتها كانو يجونها الحريم يزورونها ويباركون لها وكان كل ماصحت بنتها المولودة

شالتها ورضعتها والحريم عندها والله انها ماكملت اسبوعين الا وهي تعبانه وطلعت لها كتلة بالثدي وامتدت لتحت الإبط ولما راحت تسوي فحوصات وتحاليل طلع عندها مرض السرطان الله يحفظنا واياكم منه وحولوها لرياض على طول وعملوا لها تحاليل وجدوه منتشر عندها بنسبة عالية وصل حتى لركبتها ونخاع العظم والله انها كانت تمشي على رجولها رجعت على عربية متحركة يدفونها واستأصلوا لها الثدي كامل واليوم يعالجونها بالشعاع وكمان ودوها عند مشايخ رقاة رقوها واعطوها ماء وزيت مقري فيه والحمدالله اليوم طيبة صارت تمشي على رجولها ومواصلة على العلاج بالمستشفى في الرياض نسأل الله ان يشفيها ويشفي مرضى المسلمين اجمعين يارب

وربنا يشفيك ويعافيك لعيالك يارب وماتشوفين شر ياجمو

طهور ان شاء الله طهور و ماتنسين طمنينا عن احوالك يالغالية .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله