المشاركة الأصلية كتبت بواسطة جنوبية وأفتخر07 لأخت mbitiousdream ليس معوق ولكنه عيب في ذكره أكرمكم الله يتبول من الفتحة تحت والله مدري بس زي كذا بالضبط وأكرر شكري

إدا انا بحسب اتولد من غير كِلية او في شئ حيوي مش شغال !!

العيب اللي ذكرتيه ده مش عيب خالص خالص ،، ده بيتعمله عمليه صغيره جدا لما يبقى عنده 4 او 5 سنين

وحتى بتعتبر من عمليات اليوم الواحد وعملية تافهة اوي اوي

شوفي احيانا الاب والام (اقصد اب وام الزوجة) بيفكروا بعملية شوية يعني يقولوا خلي الطليق يشيل المسؤولية مش يتجوز ويطلق ويعاشر كإنه جايب جارية عنده ،، فيشوف تبعات اللي عمله يمكن يحس

وهو ولا هيحس ولا حاجة ،، دي جبلته كدا ،، هيرمي ابنه لأمه او اخته ويعيش حياته برده

والولد هيعيش مرمطون العيلة المصونه بتاعته اللي ربته اساسا وطلعته كدا بالامسؤولية دي

هيبقى في وضيع ذليل مالوش قيمه ،، جاي من جوازه غير مرغوبه وهو شخص غير مرغوب

هيتئذي طول عمره وهيطلع غير سوي

اول سؤال هيتقال طيب ابوه طلع ندل ،، فين امه ؟؟ ندله برده ؟؟ الامومة فِطرة يا بنتي جوة القلب

ماترميش الام ضناها الا اذا تفوقت انانيتها على فطرتها وده نادر اوي

طيب ولو هم الاتنين قرروا كأشخاص ناضجين يتجوزوا ويخلفوا ويتطلقوا ،، خصوصا وانه كان بإيديهم يمنعوا الحمل او ياخدوا موانع طالما في مشاكل وعدم راحة من البداية ،، بس احنا بنتخيل ان الخلفه هتحل المشكلات الزوجية كلها ودي فكرة غلط ،، ده بيزودها طبعا

هو ما اختارهمش ولا اختار ابوه وامه ولا ظروفه دي ولا انه يتولد اصلا

يبقى لازم حد يحترم نفسه ويحترم خياراته ويشيل الشيلة دي

انما يتم التحكم بمصيره بالطريقه الفجّه دي ، كإنه شئ زائد او حِمل على الاكتاف

وهو أمانه ورزق من ربنا ليكو ،، اي طفل هو أمانه في عنق ابوه وامه وذويه والمجتمع

والكل هيتحاسب مع اي استهتار او عدم تقدير للأمانه دي

وانتي طبعا عارفة عِظم الامانه عند ربنا ،،نار او جنه

انا مش فاهمة كونه ذكر يضايقكم في ايه ،، دي نقرة برده عجيبه في الموضوع

وكمان مِحرِم ليكو كلكوا وهيشيل مسؤولية نفسه بدري بدري

على الاقل يابنتي شجعي اخواتك انهم يقبلوا الولد وكلميهم ،،

وحاولوا تكونوا عوْن لأختكوا مش متواعونين عليها !! وفرولها الجو المناسب انها تخرج من التجربة القاسية دي

ساعدوها انها تنزل تشتغل وتحاول تشيل مسؤولية نفسها وابنها على الرغم انه مش فرض عليها

بس ده هيوفرلها فرص حلوة في الحياة من عقلية متفتحة وخلافه

والجواز في الاول وفي الاخر رزق يعني ايه الضمانه ان كل مرة تسلم الجرّة ،، سيبوا ده لربنا واتصرفوا في معطيات وقتكوا الحالي

وربنا يعينها ويقدرها ويحنن قلب اهلها عليها ويرزقها برزق ابنها ويرزقها الزوج الصالح يارب