رد : بابا المستشار
السلام عليكم بابا شحالك
يا بابا أنا أحس أني مب قادره أستوعب شيء , مب قادره أركز بشيء أمي ماخذه تفكيري كامل مب قادره أبعدها عن تفكيري يمكن يا بابا لاني ما شبعت منها , تدري صرت يا بابا خايفه أفكر باحد ثاني وانسى صورتها يا بابا خالد يباني بسرعه انساها دووم يقولي اعتبريها ماتت وفكيني بس هو يحب امه ويموت فيها وكل يوم صار يسير لها أنا صرت أكره خالتي بسببه بس والله من داخلي أحبها واحترمها . يا بابا صرت أخاف أكلم احد أو أشوف أحد مادري ليش اخاف أحد يرفع صوته يوم يتكلم وياي خالد يحب يوم يسولف صوت العالي بس أبوي كان لا يا بابا كان أبوي يسولف وياي بهدؤ كنت أفهم منه شو يبا من غير صراخ كان يسولف وياي وهو حاضني حتى لو كان يخاصمني ما كان يغلط وصوته ما يخلي أحد يسمعه ولكن خالد بالعكس يصارخ حتى البشاكير يسمعونه ما يعرف يتكلم بهدؤ .
يا بابا أنا عارفه أنا غلطانه بعد بس أنا مب قادره أسوي شيء أي أحد يشوفني يقول أنتي ياهل وتدلعين على خالد بس أنا لا أنا تعبانه أريد أحد يسمعني قبل كان أبوي أول ما يرد من سفر على طول يجي عندي في الجناح ويسألني شو سويتي شو بخاطرج يا بابا كان يقعد يسمعني بساعات كان يرسم وياي ونسولف كان يتكلم بادب وياي تدري يا بابا حتى لو غلط بالكلام على أحد كان يجي صوبي ويقولي بأذوني لجون انتبهي تراج غلطي اعتذري من غير ما احد يسمعه ولكن خالد بالعكس على طول يصارخ . أنا من زمان ما سرت بيت أبوي في خاطري أسير أقعد يومين عند أبوي بس خالد مب راضي يقولي بتسيرين ساعة او ساعتين وتردين تباتين لا ممنوع حتى أبوي صار من زمان ما جاء شافني كل ما أكلمه أحسه يتهرب وحاسه انه خالد قايله شيء أبوي كان يحبني دوم يشتاقلي بس لحين لا وسبب خالد مع انه هو دايمن يسير عند عمي وخالتي .
أنا مابي أكون أم مابي لان أكره هالكلمه صرت يا بابا يوم أسمع أحد يقولها أبكي , أبوي قبل كان مانع أخواني وخواتي ينادون أمهم بماما كان الكل يناديها باسمها كان يقولهم عشان بنتي حبيبتي وكانوا ما يزعلون حتى امهم ما زعلت لانها تحبني مثلهم كان أبوي ما ينادي يدتي بيما كنت أشوفه اذا كان يبا شيء منها يسير لعندها من غير ما يقول يما بس خالد لالالا يا بابا طول الوقت امي أمي بسير عندي أمي بتغدا عندها أنا ما أحب هالكلمه مابي أكون مثل أمي .
أنا يا بابا مرتاحه يوم كتبت كلامك وقريته وطول الوقت اليوم وانا أٌقرا فيه وأدري انه كلامك عدل بس يا بابا كلامك صعب صعب خالد دايمن يقولي أنتي ما راح تتغيرين أنتي بتمين جذي لانج ياهل وما تفتهمين شوفي أختج شوفي خواتي شلون دوم يقارن بيني وبينهم .