اشيروا علي بارك الله فيكم
السلام عليكم ورحمة الله وبركاته:
باختصار انا بنت عمري 22 وقبل شهرين تقريبا او اكثر زارونا خالتي وبنتها علاقتي بهم عاديه جدا,المشكله انه وصلتني تلميحات من بنت خالتي وهي اكبر مني ب8 سنوات تقريبا انها تبيني لاخوها!!
وانا هالانسان ماعمري فكرت ارتبط فيه بيوم من الايام احسه مثل اخواني او بالاصح ما احبه ولا اكرهه ,كل ماجلسنا مع بعض تلمح وتتكلم عنه وانا احاول اغير السالفه او اشوف لي شغله واقوم ,المشكله مو اني بس ماتوقعت ارتبط فيه,انا ماعندي رغبه فيه اطلاقا ورافضه تماما الزواج منه,
وقبل تسافر فرشنا انا وياها بالليل بغرفه لوحدنا وقمنا نسولف لين وقت متاخر ودار بينا حوار طويل وكان من ضمن كلامها(راح ازفك بنفسي وتشوفين!!)
من يومها وانا قلقانه وعشان كذا ماعرفت افكر حتى اني لمحت لها برغبتي بس احس انه مافاد,وبما اننا قرايب بيكون الوضع صعب وعلاقة امي بخالتي والعايله بشكل عام ممتاز ماشاء الله واحس اني بوررررررطه ,بتقولون ليش ترفضينه,لي اسبابي الي منها اننا بعمر واحد وانا اكبر منه بشهر وابدا ما احب ارتبط بانسان مثلي او اصغر مني لان بنظري كل ماكنت البنت اصغر من الرجل كان افضل,وغير كذا هو شخص مو ملتزم وانا بصراحه احب ارتبط بانسان ملتزم يعينني على امور ديني,والسبب الاخر ويمكن يكون تافه وماله اهميه انه اسمر مني وانا ولله الحمد ماشاء الله فاتحه كثير وجميله,وكمان كانت لنا ذكريات مع بعض وحنا صغار كان احيانا يضايقني كثير وكان شخص هزلي جدا وبس يتريق ومايخلي احد بحاله واخاف انه على هالحال لين الحين!وانا هالشخصيه الي مثل كذا ماحبها,الله يغفر لي وله وللمسلمين
وكمان ما احب المنطقه الي ساكنين فيها ليش والله مادري,وللعلم احنا ساكنين بعيد عن بعض يعني كل عيله بمدينه عشان كذا مالي هاذيك العلاقه الي تخليني اصرح الي بنفسي,حتى ان كانت اسبابي مو قويه مره انا ما ابيه,ولافي بنت منهم بعمري ارتاح لها واقولها الي بخاطري,وغير كذا قلت استخير لكن سمعت ان الانسان مايستخير الا بشي هو محتار فيه وانا رافضه من الاساس,والمشكله انه توظف من سنه ماشاء الله وبعد كلام اخته حسيت ان بيصير شي واتورط والصيفيه هم يجون عندنا يصيفون كم يوم واخاف يصير الي خايفه منه,
هل اضحي بسعادتي ورغبتي على حساب علاقة العايلتين ببعضها لان يمكن رفضي يسبب مشكله؟
ولا ارفض والي يصير يصير,ولا ادري كيف راح تكون ردة الفعل خاصه من ناحية راي امي وهاذي مشكله بحد ذاتها؟؟
انا اكبر خواتي ولا اقدر اقول لامي عن هالشي واحس ان عندها علم بالموضوع لان اتصالات خالتي كثرت واخاف يكون بينهم شي وانا آخر من يعلم,لدرجة اني فكرت اسجل بموقع زواج مضمون عشان انخخطب بسرعه وارتاح!
تكفوووون شوروا علي هل في طريقه اسويها تخلصني من هالارتباط ولا استسلم وافوض امري لله,؟
اعتذر عالاطاله ,وبانتظار آارائكم بارك الله فيكم.:safgh:
__________________
