من ناحية الطاعات .. انا احاول الحين احافظ على الذكر والصلاة في وقتها
والحمدلله من يومين صلاة الفجر قمت اصليها بموعدها وفعلا حسيت برااااحه
صحيح للحين احس بحاااااجز يخليني ما احس باللي اسويه
ولا اشعر بلذة الطاعه ولا الصلاة ولا الذكر .. وما اخفيكم اوقات يجيني احباط
لكن اتذكر كلامكم .. وان المعصيه تبعد الرزق وتجعل حاجز وتبعدني عن الله
واني احتاج وقت .. قررت اعطي نفسي الوقت اللي تحتاجه
لكني خاااااايفه ان الوقت يطول ويمر علي رمضان وانا ما احس فيه

من يومين جاني خالي البيت وطلب من امي يكلمني .. وانا صراحه خفت
لكنه بارك لي بالتخرج وقعد يكملني عن هدفي وطموحي ومخططاتي للمستقبل
قلت له هدفي الوظيفه .. قال لي وبعدها .. قلت له مدري وماخططت
فكان يكلمني كلام عن الطموح والاهداف والغايه من حياة الانسان وغيرها من الكلام
حسيته متقصد يقوله لي .. ولولا اني متأكده انه ماقرا موضوعي كنت قلت انه يعرف بكل شيء
لكني ارتحت لكلااااامه .. وبنفس الوقت خوفني لانه حسسني بأنه يعرف ان شخصيتي مهزوزه واني ضعيفه
وان بداخلي ملاااايين الافكار والتخوفات
قبل لا يطلع .. قال لي انا عندي كم شغله ودي انك تساعديني فيهم لشغلي
بحكم تخصصك وموضوع دراستك .. قلت له انا ما بقدر افيدك كثير
انا مبتدئه وما اعرف اشياء كثير وفيه ناس احس مني اكيد
قال لا انا ابيك انتي تساعديني .. وترى كلها اشياء بسيطه تضبطين فيها شغلي وانا بكون وياك
انربط لساني .. ويوم طلع قلت لامي كل الكلام اللي دار
قالت لي هو لو يبي شخص متخصص كان يقدر يجيب احسن الناس
لكن هو قال يبيك انتي لانه واثق فيك وليش انتي منزله من نفسك كذا ومو واثقه من قدراتك
تقدرييين تسوين اي شيء
مدري حسيت من كلامهم ان الحركه هذي مقصوده يبون يرفعون معنوياتي او يزيدون من ثقتي بنفسي لان كل العايله تدري اني شخصيتي ضعيفه وكتومه وابد مااااعندي ثقه بنفسي

فيه شغله ثانيه .. انا صحيح ابي اتغير وحسيت بالذنب يوم رجعت وقررت اتغير للابد
وجيت هنا عشان اتغير .. وذكرت اني ما احس بالاشياء اللي اسويها
وقلتوا لي كلكم اني احتاج الوقت عشان احس بالتغيير وانه يبدا خطوه بخطوه
لكن انا بديت احس اني فقدت الاحساس بكل شيء يتعلق بالحياة
يعني خبر حلو اسمعه .. ما افرح له
خبر حزين اسمعه .. ما اتأثر
ادري بالذنب اللي قاعده اسويه وحاسه بعظمه وكبره .. لكن بنفس الوقت بديت احس ان وضعي هذا عادي
كأني ما سويت شي !!!! ما اقصد اني ما احس بالذنب .. لكني بديت انسااااااه كأنه ما صار واعتبر حياتي عاديه
واقضيها كأي انسان ما غلط بحياته
كل تفكيري محصور بكيف احس بالطاعه وبالصلاة والاذكار .. ما افكر كيف اكفر عن ذنبي !!
مدري هل الطاعه والصلاه هي نفسها تكفير ولا احتاج شيء ثاني ؟!!
المره اللي قبلها كان يقتلني الندم وحتى النوم ما انامه .. الحين اقدر انام واقدر ما افكر في اللي صار !!

مدري تفكيري كذا صح ولا غلط ؟!!
ياليييييت ترشدوني وتخبروني انا وش اللي قاعده امر فيه

__________________
اللهم اكفني بحلالك عن حرامك واغنني بفضلك عمن سواك
اللهم استرني فوق الأرض وتحت الأرض ويوم العرض عليك يا أرحم الراحمين