رد : كيفية التعامل
عن تجربة خاصة لما زوجي ينفعل ويعصب على شئ اخليه يهذر يهذر الين روحه تبرد ويطلع كل اللي عنده وبعد ماتبرد ناره ويهدأ وخاطره يطيب اناقشه وابتدي النقاش معاه بمزحه او نكتة حتى لو اشركت العيال في النكته بس علشان هو يبتسم ويعطيني رد إيجابي انه عنده استعداد لنقاش وحينها انقض عليه واطلع كل اللي عندي بعدين خلاص لو عرف نفسه غلطان يعتذر وعذره دايم واقف
معليش انتي تعرفين ان عندي سكر واعصب فجأه وبدون اسباب ولا انا احبكم ولا ارضى فيكم غصب عني والله طلع الكلام مني ان شاء الله مايتكرر اللي صارعاد انا واثقة منه ومن صدق كلامه وكالعاده امشيها بالذات ان اكثر عصبيته علشان العيال هو قلبه طيب وحنون والله انه لو صرخ في واحد من اولاده تلاقينه ماعاد باقي إلايبوس رجله علشان يرضيه بعد ماتهدأ نفسيته وحتى يتندم على الشئ اللي يصدر منه حتى لو كان هو غير مخطئ طبعه كذا من يوم تزوجته
بالنسبة لي انا لو عصبت علشان شئ كمان هو ما يناقش يسكت ولا يرادد ولا يتكلم نهائيا يسكت على طول بعدين لما يشوفني هادئة ورايقة لو فيه شئ يستاهل النقاش يناقشني فيه إذا كان مافيه خلاص عادي تمضي الأمور مثل ماكانت اول وبعض الأوقات يصير بيننا صدام في بعض المواقف بس من طبعنا إنا ما نطول في مواجهتنا هو يقول اللي عنده وانا اقول اللي عندي وخلاص يلفنا الصمت شوية وبعدين نرجع نسولف اول شئ خفيف خفيف حتى تتصافى النفوس بالتدريج والحمدالله مافيه احد يشيل على الثاني بخاطره صراحة انا اخاف عليه كثير ما احب اشوفه معصب لأن عنده سكر الله يحفظه ويشفيه فدائما احاول قدر المستطاع انه مايعصب لأن السكر له مضاعفات خطيرة حتى الأولاد لوفيه بينهم مشاكل ومضاربات احاول احلها بينهم بعيد عنه واجنبه العصبية الزايدة واجنب الأولاد كلامه وصراخه عليهم اما الضرب هو مايضربهم ولا عمره مد ايده على احد فيهم الحمدالله لا كن الصراخ يصرخ عليهم ويهزئهم تهزئ
بعدين مع الوقت والعشرة كل زوج وكل زوجة راح يفهم اسلوب شريكه وإيش اللي ينفع معاه العشرة كفيلة بأنها تخليك اكثر قربا ومعرفة بالطرف الآخر اهم شئ في وقت النقاش إنك تكون هادئ ورايق وذهنك صافي وتختار الوقت المناسب لنقاش وتبتعد عن العناد ورفع الصوت والتذمر وفتح الملفات الماضية مثل قول انت المرة اللي فاتت قلت كذا وعملت كذا ولا نسيت ايش اللي سويته وتخرط له الأولي والتالي ويحتاسون ويصبح نقاشهم عقيم وفاشل وما يطلعون منه بنتيجة احسن شئ انك تجهز المقدمه وتعد الأشياء اللي بتناقش فيها وترتبها وتنتقي افضل واجمل الكلمات اللي يحبها الطرف الآخر ويسعد بها حتى النقاش ينجح ويثمروحتى الطرف الآخر يتفهم وجهة نظرك ويتقبلها ومايمل او يهرب من النقاش ولامانع ان تناقش وانت تضحك وتتبسم وتدخل في نقاشك شئ من الفكاهة والمزح لإضفاء جو يعلوه الضحك والمرح وعلشان الجو ماينقلب عليك وانت تناقش مو مشكلة وجهت لطرف الآخر كلمة او انتقاد لاذع اتبعه بكلام جميل او مدح او نكته حتى هو خاطره يطيب ويتقبل كلامك ويفكر ويراجع نفسه إذا كان مخطئ طبعا كلن على حسب معرفته بشريك عمره
طبعا بعض الأزواج مايتقبلون النقاش ويمكن يرفضونه ويتمسكون برأيهم وماراح تطلع معاهم بنتيجة في النقاش المباشر لاكن يمكن يتفاهم لو راسلته بالهاتف او كتبت له رساله وعبرت فيها عن ما بداخلك من مشاعر وتمدحه وتثني عليه فيها وتكتب فيها الشئ اللي يضايقك واللي مو عاجبك يمكن انه يفهمك ويتغير ويغير اسلوبه ويتفاهم معاك بهذا الأسلوب
وعاد انا طولتها عليك يااوناا ومشكورة على الموضوع اللطيف والجميل الله يجزاك خير ويبارك فيك ويسعدك في حياتك يارب .
وربنا يسعد كل الأزواج والزوجات المسلمين في حياتهم إن شاء الله تعالى
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله