السلام عليكم ورحمة الله تعالى وبركاته

جو المنتدى بصراحة جابلي عقدة نفسية وخلاني متشائم شوية ، وتعقدت من بعض المواضيع وبعض الأراء ، وبيني وبينكم ما احب هالأجواء ولا احب اني اكون متشائم ، وياما تمنيت اني اعيش بجزيرة فيها ناس خبلة مثلي ، بس للأسف مالقيت لأن كل الجزر اللي حولي فيها ناس معقدة ، وحاس ها حاس انهم يبون يعقدوني معاهم.

مالكم بالطويلة اليوم اخبالي واجد ، وابي افرفش ، ومالقيت مكان إلا هنا ، واللي يجي يسوي من موضوعي "الحبة" قبة ، ياويلة ياسواد ليلة .. الحريم اخلي ابو عبدالله يتولاااهم ، والرجال اخلي مسز داني تاكلهم ، لاتقولون ماقلت لكم ، هذا انا نبهت.

طلاق 2012
المرأة: عبدالله لو سمحت طلقني خلاص ماني قادرة اتحمل أكثر ماتربيت على كذا.
الرجل : ليه مو قادرة اتحملين اسم الله عليك وش جايك مني يابنت مايكروسوفت.
المرأة : لو سمحت لاتستهزء بأهلي وطلقني مانبي انطور الموضوع
الرجل : طلاق ماني مطلق وأعلى ما بخيلك اركبية.
المرأة : لو انك رجال وفيك ذرة رجولة طلقني ..!!
الرجل: انا رجال وغصباً عن أهلك وأنتِ طالق
المرأة: أفا تطلقني بالسهولة هاذي ياعبدالله ؟؟

الخدامة
الزوج : أسمعي يا أحلام انا ما اكل من الخدم فهمتي وإلا لا!! وإلا أقسم بالله أسفرها
الزوجة : حاضر يابو محمد تامر امر انت بس هدي بالك انا أطبخلك واسويلك اللي تبي.

الخدامة: انا يقص بصل وثوم وطماط ويغسل الدجاج والرز ويجهز البهارات وماما يجي يحط جوا القدر عشان بابا مايبي ياكل طبخ خدامة.

الزوج: منو سوى الغدا ؟؟
الزوجة: والله العظيم يابو محمد أنا ..!!

فشلني!!
أبوي: أسمع يالمتفائل خلك رجال مو تقوم تقلبها ضحك على الشيبان بالمجلس لاتفشلني.
أنا : يبة الله يهدينا وياك هالشيبان اليا جونا مايتكلمون الا على الحريم والزاوج من أخرى (وسوالفهم كلها إسفاف كأني اشوف حلقة من حلقات فوزية الدريع) وكأن سوالف الرجال خلصت ، وبعدين أبذكرك بشي تذكر انك قلتلي انك قبل زواجك من امي كنت تحب وحدة ؟؟؟ تبيني اعلم أمي ؟؟
أبوي : والله و(؟؟؟) عليك انت وامك.
أنا: طيب الوعد عند أمي
أبوي: تدري شلون .. فشلني.

كل شي حقنا
زوجتي : اليوم أحترقت حديقتنا ؟؟
أنا : منيلكم حديقة انتم ؟؟
زوجتي : الحديقة اللي في منطقتنا
أنا : ليش تقولين حديقتنا خوفتيني قولي حديقة المنطقة.

زوجتي : يقولي ابوي ان مسجدنا غيروا أثاثة ماشفتة !!
أنا : ماشاءالله عندكم مسجد ؟؟ من متى محد قالي واكيد ماشفت الاثاث لاني مادري ان عندكم مسجد
زوجتي : لا أقصد مسجد منطقتنا
أنا : أبعرف انا .. منو مسجل الكرة الأرضية بأسم أهلج ؟؟؟

فضووول
البنوتة اللي كانت تعتقد انها ذكية وتسوي روحها نايمة لما يتجمعون المتزوجات عشان تسمع سوالفهم (المحظورة عليها) احب أقولك أنك صرتي مكشوفة " يا ام دماغ "

وحالك مثل حال الرجال اللي يسولف ويقول مالكم علي حلفان ، وربي صرنا ندري انه كذاب من قال مالكم علي حلفان.

فلسفة خبلة!!
اختي أتكلم صاحبتها في التلفون ، وشكل صاحبتها تشتكيلها ، ف تبي تضحكها ف تقولها مسوية لنفسك مصيبة ليه ؟؟ وغاثة نفسك ومحزنة ليه؟؟ .. حطي ف بالك أن عندك مصيبة اكبر الا وهي زوجك ، وقامت تضحك !!

فقلت لها ليه زوجها مو زين ؟؟؟ قالت بالعكس تموت علية ، فقلت لها طيب ليش قلتيلها كذا؟؟ قالت لأنكم بعض المرات تصيرون على قلوبنا مصايب وما اقول الا حسبي الله ونعم الوكيل!!

ف عشان كذا هالجملة متداولة بينا يالحريم نصبر قلوبنا فيها ونقصد فيها الفرفشة!!

ف أقولها أنتي هيية انا اخوج ترى مو زوجك ليه تتحسبين علي ؟؟ قالت لاني ماقدر اتحسب علية قدامة تحمل !!

أكبر كذبتين..!!
الرجل : إن شاء الله هذا اخر "باكيت" دخان اشربة وبعدها بقطع التدخين!!
المرأة : خلاص من يوم السبت ببدأ رجيم.



مرحباً بمن سيمر من هنا بإبتسامة.

__________________
استغفر الله واتوب إليه