رد : سفر الأزواج
اقتباس:
المشاركة الأصلية كتبت بواسطة عيوني تحكيني
خاله ام سلطان شكرا ع الدعوه بس انا لسى صغيره مو مستعجله على الزواج..
بالنسبه لردك ولرد قوالب انو اذا تزوجت راح يتغير رأيي..
لا بالعكس ماراح يتغير ..
انا ما احب نظام الحكره..الا تقعد عندي وماتسافر بدوني ..
يعني بالله بخليه يجلس معاي طول الوقت..لا طبعا..
حلو يكون فيه اوقات يسافر فيها لوحده ..
طيب انتي يالزوجه ماتحبين تسافرين مع اهلك وتنبسطين معاهم ..هو بعد نفس الشيء..سواء مع اهله او اصحابه.
بعد بكره بنسافر لجزيرة سيشل ومعانا بنت عمي متزوجه وبتسافر بدون زوجها لان ابوي معانا ..ولا فكر زوجها يرفض لانها اذا سافر ماتسوي مناحه ..عايشين حياتهم بمبدأ الثقه ..
|
هلا عبير شوفي ياقلبي بقول لك شئ وركزي عليه زين مو كل الرجال يستحقون ان نعطيهم الثقة ونفتح لهم المجال ويسافر يسرح ويمرح على كيفة في دول الله اعلم وش فيها من فساد والشيطان مامات باقي عايش وكل زوجة تخاف وتخشى على زوجها وعلى نفسها واكثر الزوجات يرفضون سفر ازواجهم إذا كان بعض الأزواج ماصلوا على النبي وغضوا بصرهم وهم ببلدانهم ومع زوجاتهم من عاد بيردعهم لما يسافرون لحالهم وهناك مافيه شئ اسمه ممنوع ويشوفون كل شئ قدامهم مسموح وبأرخص الأسعار هذا اولا ثانيا الزوجة وش ذنبها تتحمل امراض زوجها وقرافته اللي يخمها معاه من برى ويجيبها لها ولما الزوجة زوجها ينقل لها مرض تجلس تتجرع المر والهم وحتى اقرب الناس لو عرفوا بمرضها راح يعتزلوها وما يقربوها هي وش ذنبها في هذا كله زوجة معززة مكرمة شريفه عفيفة نظيفة طاهرة وش ذنبها تبتلي بالزوج اللي يسافر ورى شهواته ونزواته ويجمع له من كل ديرة عله ويجي ينقلها لزوجته وهي في بيتها وانا اشوف ان الوقاية خير من العلاج اذا الواحد سافر في مهمة عمل او للعلاج مايخالف لاكن لسياحة ومع عزابية لاوالله إلاغير يجيب العيد إلامارحم الله إذا كان تجمعهم في الإستراحات والشقق وهم متزوجين يجلسون على منكر ويشاهدون المنكر من افلام وبلاوي عاد كيف برى بيكون وضعهم لما يسافرون لدول كلها فتن هذا هو واقع الكثيرمن العزابية والمتزوجين اللي يتجمعون بالإستراحات كله شرب وافلام وبلاوي الله العالم فيها كلها مضيعة للوقت مثل المعسل والبلوت والتدخين وماخفي اعظم وإلاعلى ايش يتجمعون وايش الفائدة اللي بيجنونها من تجمعاتهم بالذات اللي يجتمعون كل ليلة عاد اللي بالشهر مرة او بالأسبوع مرة يمكن تنبلع واكثر سبب خراب البيوت هي الإستراحات والشقق هي سبب المشاكل بين الأزواج انا الاحظ إن الأزواج اللي مايروحون إستراحات ولا يسهرون هم دائما الأكثر سعادة وانسجام وقرب من زوجاتهم وهذا شئ انا لاحظته بنفسي
من خلال محيطي من اقارب وجارات
طبعا انتي بنفسك شاهدتي كم عدد النساء اللي رفضوا سفر ازواجهم مع اصحابهم وكل زوجة هي تدري وتعلم بزوجها هل هو من المخبصين اولا لاكني اقولها وبكل صراحة حتى لو الزوج صالح وما خبص يجي له الصاحب السوء اللي يخليه يخبص ويقنعه ويهون عليه فعل المعصية ومهما كان تماسكه لابد من إنه يتأثر بأصحابه والصاحب ساحب يفلان جرب منت خسران شئ إن الله غفور رحيم ياشيخ متع نفسك واستانس ومن هالسوالف حتى يجيبون راسه وبعدها خلاص مع الخيل ياشقرا ويشتاق لسفر معاهم فالزوجة من حقها تخاف على نفسها ومن حقها تخاف على زوجها وتمنعه من السفر إن استطاعت اما مسألة إني اربط ايديه وارميه في البحر واقول له إسبح هاذي ماتنفع عندي الوقت هذا كله فتن وبلاوي وما سلمنا منها هنا في بلدنا وهو بلد محافظ باقي كيف لما الواحد يطلع لبلد آخر ويرى النساء السافرات اللي بكامل زينتهم وبلبسهم اشكال والوان إذا الواحد عندنا شاف مذيعة بتلفزيون فغر فمه وبحلقت عيونه عاد كيف لو شاف امرأة على الطبيعة بكامل زينتها والله ماغير يغمى عليه
لاكن لو الزوج يبغى يسافر ياخذ زوجته معاه حتى لو شاف منكر ولا شاف شئ يهيض مشاعرة تكون زوجته معاه حلاله بدل مايناظر يمين ويسار ويمكن لا سمح الله يرتكب محظور
هذا اللي قدرت اقول لك عليه والباقي ان شاء الله لو كبرتي وتزوجتي ذاك الساع تفهمينه يا عبوره
طبعا انا احترم رأيك ووجهة نظرك على عيني وراسي وتروحي وترجعي لنا بالسلامة يارب وسفرة سعيدة إن شاء الله تعالى واستودعتك الله الذي لاتضيع ودائعه.
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 11-07-2012 الساعة 06:51 AM