السلام عليكم ورحمة الله تعالى وبركاته

إحساسك بالفشل هو اللي راح يخليكِ تبحثين عن النجاح وتكونين حريصة على علاقتك بزوجك ، وهالشي جداً جميل ، وفيه مثل عندنا يقول (من خاف سلم) فلا توسوسين دامك حريصة على علاقتك الجديدة!!

بالعكس أنا أشوف أنج جداً راح تنجحين بعلاقتك الجاية مع زوجك لأن الحرص باين عليك ، وانا متأكد من نجاحك إن شاء الله لأن اللي مثلك ماعلية خوف بإذن الله.

قبل لا أدرس الهندسة كنت في مجال الطب وماحبيت الطب بصراحة لأن ميولي كانت هندسية ف ماتوفقت ف الطب اول سنة وفشلت فشل ذريع وطلعت !! مع أني من المتفوقين بالثانوية ، ودخلت الهندسة اللي نفسي فيها ، وجاني ابوي وقالي لاتفشلني اذا انت مو قد الهندسة قولي عشان نشوفلك كلية على قد مستواك !! وأمي بعد قالتلي مثل أبوي وصار فيني إحباط بشكل مو طبيعي خصوصاً أنهم عارفين أني شاطر !! بس السنة اللي دخلت فيها طب خلتهم يفقدون الثقة فيني.

دخلت الهندسة وكلام أهلي براسي وكنت مرعوب جداً وخايف من الفشل ، فصرت حريص جداً على دراستي ومهتم فيها لأبعد الحدود والحمدلله درست فيها وحققت نتايج طيبة ونجحت وتخرجت وهذا انا مهندس ولله الحمد والمنة.

عاد أنتي مثل قصة دراستي بالضبط !! عشان كذا انا متأكد إن شاء الله انك بتكونين ناجحة وانه بيكون هالزواج زواج العمر ، والنبي قال تفائلوا بالخير تجدوة ، ف خليكِ متفائلة ومحسنة الظن بالله رب العالمين لأن ربنا يقول في حديث قدسي "فيما معناة" أنا عند حسن ظن عبدي بي فإن أحسن الظن بي أحسنت الظن به.

اهم شي أنك تستفيدين من أخطائك في العلاقة السابقة وتتحاشينها في علاقتك الجديدة.

وألف مبروك يارب العالمين منه المال ومنك العيال ياعروسة.

__________________
استغفر الله واتوب إليه