أكييييد أخذ راحتك

الصراحه .. اول ما كلمت ما كنت حاسه بقيمة الشيء اللي اسويه
كنت حاطه في بالي انها اشياء عاديه .. ما تخرج عن نطاق السوالف والضحك والفرفشه وتغيير الجو
كنت اظن الشيء عادي .. مجرد ادخل الشات اسولف ولما اخلص اصك الموقع وخلاص ولا كأن شيء صار
كأني اسولف مع صديقاتي او اي احد
خصوصا انا ما كنت حاطه ببالي ان الامور بتتطور واني بضيف على الماسنجر او بكلم بالجوال
هالشيء كان مرفووووووووض عندي .. حتى فكرة الماسنجر كنت رافضتها
بس شوي شوي صارت الفكره عندي عاديه .. خصوصا صديقتي كانت تشجعني ومثل ما قلت لك انا شخصيتي مهزوزه وبسرعه اتأثر واوافق الشخص اللي يكلمني حتى لو كنت ادري انه غلطان
وعلى فكره .. انا يوم بديت اكلم وادخل الشات كان عمري 14 قريب 15
ما كنت افهم شنو يعني حب ولا رومنسيه ولا علاقة شاب وبنت ولا سوالف جنس ولا حتى ادري ان في عالم مثل هالعالم وفيه ناس تحب وتعشق وتسوي اشياء بالحرام
هذا الشيء كان عندي خيااااااال ومن سابع المستحيلات بس طحت فيها
وانا ما بديت اكلم بالجوال الا بعد سنتين يعني يوم صار عمري 17 سنه
اما قبلها كنت بس سوالف عاديه ( وحتى هذا ما يهون الموضوع لكنه اقل بشوي)
من الآخر .. جواب سؤالك .. لا ما كنت احسه شيء كبير في البدايه دام اني ما طلعت ولا ارسلت صور ولا سويت شيء معه .. وصديقتي ماقصرت من هالناحيه

بس بوضح معلومه .. انا ماعندي خوات .. عندي اخوان اصغر مني .. انا الكبيره
في البدايه لا ما فكرت بالفضيحه لاني ما كنت اسوي شيء -على حد تفكيري ذاك الوقت-
كنت خايفه امي وابوي يكشفوني لكن ما بتوصل للفضيحه .. وكنت احاسب اكثر شيء على جهازي عشان محد يصيدني
لما كبرت شوي وصار عمري 19 بديت احس بنفسي واستوعب لما بديت اكلم جوال
حسيت اني ممكن انفضح وفكرت بأهلي وسمعتهم وكنت خايفه اكثر شيء من هالنقطه
خصوصا ان اهلي معروفين بالتزامهم وحسن اخلاقهم وتربيتهم وما كان ودي يضرهم شي
تصدق.. حتى انا كنت معروفه بالتزامي واخلاقي وان لو كل البنات يغلطون انا ما راح اغلط لاني متربيه صح ولان على حسب كلامهم اللي يتربى في بيئه مثل بيئتي ما ينخاف عليه .. شيء يضحك والله
بديت اخاف وافكر وحاوبت اسحب نفسي بس ماقدرت
وما فكرت ان ربي راح يوقف نصيبي .. لاني مثل ما قلت كنت حاسه ان الشيء اللي اسويه مو كبير وياما ناس سووا اكثر من كذا بكثير وما صار لهم شيء وعادي تزوجوا وعاشوا حياتهم وكل ابواب الرزق مفتوحه لهم .. هذا الشيء كان يحسسني ان كل اللي اسويه عادي ومافي شيء يستدعي الخوف (هذا كان تفكيري وقتها)
بس الحين صرت احسس بكل اللي تقول عنه وندماااااااااااانه واتمنى لو يرجع فيني الزمن لكن مايصير
الحمدلله على كل حال

في البدايه لا
بس من يوم صار عمري 19 وعيت واستوعبت وصحيت
وانا ذكرت بمواضيعي السابقه اني طول الوقت وانا كنت وياه كنت احس بتأنيب ضمير وذنب كبيييييير
كنت مو مرتاحه من وضعي بس كنت استمر ليش مدري
كنت ادري ان اللي اسويه غلط وحرام لكني مدري ليش ماقدرت اتراجع حسيت فيه شيء يمنعني
عادي سمني غبيه لاني فعلا كذا .. كنت محتاجه منه الحب اللي تعودته منه .. وانا اوهمت نفسي اني كنت احبه بس الحين لما تغيرت اكتشفت ان هذا مو حب .. وانا كنت غلطانه وهو عرف وين يدخل علي من الشيء اللي كنت فاقدته وهو عطاني
حاولت كثيييييير لمدة 3 سنوات اني ابتعد واطلع نفسي من اللي انا فيه لكني ماقدرت
بتقول ليش .. مدري بس انا عرفت هالعالم يوم كنت صغيره وتأثرت فيه بسرعه وصار جزء من حياتي
فترررره طويله كنت ما اشوف غير هالعالم .. كان صعب علي اطلع منه فجأة بعد ماتعودت
لين قدرت اخذ القرار وتبت وابتعدت
كان عندي رادع لكن نفسي ضعيفه كنت اتقدم خطوه وابتعد .. لكن بسهوله ارجع عشر خطوات ورا
ساعات اقول احبه ساعات اقول لا هذا مو حب
ساعات اقول يكسر خاطري
اشياء كثيره يا اخوي كانت توقفني حتى لو احاول واحاول
رغم اني عارفه من داخلي اني غلطانه واكون ندمااااااااااانه وانا اكلم واتضاااااااايق بس شيء يجذبني
تصدق بقولك شيء .. هذا الشيء ذكرته من قبل بموضوعي
لما كنت وياه اخر فتره لما بديت احس على نفسي واستوعب ان كل اللي اسويه غلط
كنت احاول اضغط على نفسي وعلى مشاعري اللي كنت احسهم وقتها
واقول ما بكلمه واظل فتره يعني مثلا اسبوووع ما اكلم
يجيني شيء يقول لي دقيييييي كلميه .. واظل افكر وافكر وافكر حتى نوم ما اقدر انام
ادق ولا ما ادق ادق ولا ما ادق .. بس خلاص لا تدقين انسي وعيشي حياتك .. هو يلعب عليك هو يعتبرك وسيلة تفريغ شهواته .. هو ما يحب هو يبي شيء واحد بس .. هو وهو وهو
اقول لنفسي هالكلام بس ما اقدر .. امسك نفسي لآخر شيء
احس نفسي احتااااج ادق واكلم واني ما برتاح الا بكذا
ليييييييين ادق .. تصدق اول ما ادق ارتاح لاني سويت الشيء اللي ببالي
بس والله العظيم من اسمع صوته واتكلم وياه تجيني ضيقه مو طبيعيه واندم اني تكلمت
واصك بسرعه واجلس وقت طويل وانا متضااااايقه من نفسي وندمانه ومقهوره لاني استسلمت
واظل فتره وارجع لنفس القصه
عندي رادع لكني ضعيفه .. وهذا الشيء دمرني
حتى المده الطويله اللي قضيتها بذاك العالم والشيء اللي لقيته هناك بأول فتره
كل هالاشياء دمرتني وخلتني استصعب الشيء اني ارجع عن ذاك الطريق
لكني الحمدلله انا الحين صرت اقوى من قبل .. تغيرت وماعاد يهمني
صار عمري 22 تقريبا .. عقلي صار انضج من قبل
كل اللي ابيه اني اتجاوز هذا الشيء
ما بكذب عليك .. اوقات امر بلحظات ضعف .. في البدايه ما كنت قادره عليها
لكني الحين تعلمت كيف اسيطر عليها وبدت تقل تدريجيا
لكنها ما اختفت نهائيا

هذي اجوبة اسألتك .. انا جاوبتك بكل صراحه واعذرني على صراحتي
كل اللي جاء ببالي ذكرته .. واذا عندك اي اسئله ثانيه لا تتردد
بالعكس انا ما تضايقت من اسئلتك ولا راح اتضايق من كلامك
سعة صدري مالها حد وجايه اسمع منك كل شيء
واسفه ع الاطاله بس حبيت اذكر كل شيء

__________________
اللهم اكفني بحلالك عن حرامك واغنني بفضلك عمن سواك
اللهم استرني فوق الأرض وتحت الأرض ويوم العرض عليك يا أرحم الراحمين