السلام عليكم ورحمة الله تعالى وبركاته
أختي في الله
عندي أخت مطلقة من زمااااااان ، وكانت زعلانة ابيتنا وهي حامل بولدها وعندها بنت ، ولما اولدت طلبت الطلاق وحب يعاند ومايبي يطلق ، وطلقناها غصباً علية ، ترعرعوا أعيالها عندنا ، مافكرنا بيوم من الايام اننا نشوة صورة ابوهم قدامهم او نشوة سمعة اهلهم ، مخلينها لله ، البنت الحين عمرها 18 سنة والولد بيدخل 16 سنة ، والله من كانوا عندنا مافكر يجيب لهم "قوطي حليب او حتى حفايظ" او يدزلهم مصروف !!

ربيناهم احسن تربية وعوضناهم عن حنان الأبو ، حنا ياخيلانهم صكينا عليهم ، كل شي يبونة يلقونة قدامهم ، وبعمرهم ماحسوا انهم أقل من غيرهم ولله الحمد ، لدرجة انهم قاموا يسمون نفوسهم على اسم ابوي مو على اسم أبوهم ، حتى أختنا اللي تطلبة اوامر على قلوبنا وتامرنا وتنهانا ومخلينها الكل بالكل وبعمرنا ماحسسناها انها مطلقة ، وهي ياعيني روتينها صلاة وقرآن وتلفزيون ونوم وبس.

المهم ان اعياله الحين مايميلون له نهائياً ، لأنهم أكبروا وحسوا وفهموا ، وحنا والله نحثهم على أبوهم ووصالة وبرة حتى لو من بعيد لبعيد حتى لو كان شخص مايستاهل!!

تزوج من سنتين او اكثر بعد ماخطب اكثر من 10 خطبات ويرفضونة ، ولما تزوج بنتة ماراحت عرسة ولا وقفت علية ، مع أن امها حثتها تروح ، لكن كبريائها ماسمح لها لانه مافكر حتى يتصل على بنتة ويقولها ابيج تكونين بعرسي ، او حتى يدزلها مصروف اتجهز نفسها فيه للمناسبة هاذي لأن مهما يكون هي شابه ، ومع هذا أحترمنا رغبتها.

الولد قال أنا أبروح أسلم علية وأبارك وأمشي مو عشانة ، عشان امر الله فيه ، وأتضح أن امة هي اللي مشجعتة على هالشي.

اللي أبيه من هالقصة انج تطمنين ولاتخافين على بنتج ، هي الحين صغيرة ماتعرف الصح من الغلط!! بس تكبر وتعرف تميز صدقيني بتبدأ تسحب نفسها من اهل ابوها اشوي اشوي ، واتأكد أن مالها إلا حظنج وحظن خيلانها ، عسى ربي يخليج لها ويخليها لج.

موفقة خير.

__________________
استغفر الله واتوب إليه