اقتباس:
المشاركة الأصلية كتبت بواسطة الفردوس غايتي
أقولك شي اختي الغالية يمكن يفيدك ..
تدرين يالغلا انا بحكي لك موقف صار لي بحياتي ما توقعت اني اسامح ذيك
الانسانة اللي خدعتني و استغلت طيبتي .. انا كنت اشتغل في بنك و راتبي
مو عالي في حدود المتوسط , و كانت معي زميلة عمل ظننتها صديقة لأنها تقربت
مني كثير و اشتكت لي سوء اوضاعهم في البيت اللي كنت ابكي وانا اسمع لها
بيوم من الايام ألفت على راسي كذبة كبيرة اخوها صدم سيارة لكزس وتصليحها غالي
و جابت لي ورقة مختومة من الظابط انه اخوها مطالب بمبلغ مالي كبير
انا و بصفتي ساذجة رحت اعطيتها راتبي كااامل حق ذاك الشهر والله العظيم
ما بقيت لي منه سوى 400 ريال وهي اخذته مني بوعود كثيره انها تسدد لي في ظرف شهرين فقط
وانا ما فكرت اخذه منها , تصوري بعد خمس شهور تسببت لي بمشاكل في العمل
ولا عمري جا في بالي انه من تحت راسها واكتشفت انها متسلفة من غيري وبنفس الطريقة
و تحكي فيني من وراي و اشياء كثير كثير صدمتني فيها و انا ايامها كنت مستقيلة من العمل
و لا فكرت اواجهها مو خوف منها لكن ترفع عنها لانها انكشفت عند الجميع وصارت سيئة ,
وبعد ما خرجت من العمل اتصل فيها ما ترد ارسلت لها رسالة .. ابي فلوسي
لاني كنت محتاجتها بسافر لأهلي , و ترسل لي انو انتي غلطانة بالرقم تركتها و رحت اتصلت في الإدارة تبع العمل
و طلبتها بالاسم وكلمتها و بعد السلام قلت لها ابي رقمك قالت ضاع ..
قلت طيب شلون اتصل بك انا ابيك بسالفة
قالت ابشري لا رجعت البيت كلمتك من جوال امي .. قلت اوكي انتظرك
تخيلي وش عملت هالادمية .. رجعت البيت وارسلت لي رسالة من جوالها اللي نصبت علي
وقالت انه ضاع .. كتبت لي كلام والله العظيم لما اتذكره ابكي قهر و حسرة علي وعلى سذاجتي
كلام سب وشتم و انكار للمبلغ و طعن فيني وتهديد و ارسلت لي صور لي و مقطع وانا من قفاي
اتاريها الله يسامحها مصورتني وانا مو منتبهة لها في العمل .. متخيلة ان في بنت ممكن تسوي هالموقف ..!
اقسم بالله لما اتذكرها ودي اذبحها من القهر والظيم اللي شفته منها وانا ما ضريتها بشي
انا طبعا ما سكتت لها على طول كلمت وحدة من صديقاتي زوجها ظابط
قلت لها السالفة من الى قال لي كلام كثير من ضمنه انك ما راح تكسبي شي والتهديدات بالرسايل
ما ياخذو عليها الشرطة يعني مشوارك طويل لكن فلوسك العوض عليها
اهم شي سمعتك ولا تنشر صورك لكن اتركيها هاذي مو من مستواكم و ترى تهدد بس تبيك تسكتي
عن الفلوس .. انا سكتت لأني انجبرت اسكت كثير تدخلو في الموضوع وهدوني و لكن ما ارتحت
ظليت ادعي عليها و اتحسب .
متخيلة حجم المعاناة و الظلم اللي تعرضت له منها .. وانا بس ساعدتها و سويت فيها خير وفتحت لها بيتي
يعني فيه ناس تضرك وانتي تنفعينها .. !!
ف اللي بقول لك عليه .. اني في فترة من فترات حياتي كنت حزينة لفراق اولادي ولا زلت
وكنت اكلم استاذة في التحفيظ وانا تعبانة نفسيا اقولها ابي ربي يجيب لي عيالي
تدرين وش قالت لي .. قالت اذا لك حاجة عند الله اعطيه عشان يعطيك
صرت طيبة حييل مع الناس سامحتهم كلهم و أول شي ذيك الآدمية على طول جات ببالي
و قلت يارب .. سامحتها لوجهك الكريم طمعا في رضاك وعطاك يارب
احنا محتاجين الله و رحمته وكرمه علينا , فلازم نعطي عشان ناخذ
و ابشرك قلبي صاااافي عليها الحمد لله
اذا تبين ربي يشملك بعفوه .. اعفي عن عبيده
ادعي الله بسجوودك ربي يصلح سريرتك وعلانيتك
الله يرزقك مبتغاك من الدنيا والاخرة قولي آمين
اعذريني طولت .. بس تذكرت هالموقف عند قرائتي لموضوعك
|
اللهم آميييين
يااااااالله والله كلامك اثر فيني كثير والموقف اللي صار لك بجد كبير
وماشاء الله عليك انتي قدرتي تسامحين وقلبك صافي عليها .. جد أهنيك على روحك الطيبه
وكلامك فااادني كثير
صادقه اختي والله .. احنا محتاجين من الله
ودي ودي اسوي اشياء كثييييييره لكن احاول نقطه نقطه لين اوصل
غاليتي الفردوووووس .. شكرررررا لك على كلامك
والله نزل علي مثل الماء البارد اللي برد على قلبي وريحني
وشاكره لك اهتمامك ووقفتك معي .. ماني عارفه كيف اشكرك
الله يرزقك مبتغاك وكل ماتتمنين ويريحك ويسعدك وييسر لك امووورك
ويجمعك بعياااالك عاجل غير آجل ويقر عينك بهم وتفرحين بهم اللهم آميييييين
الله يتقبل منك ياغاليه صالح اعمالك ويجعلك ومن تحبين من العتقاء من النار
بس لي طلب اختي .. طلبتك لا تنسيني من الدعاء
بأن ربي يثبتني ويشرح صدري ويتقبل توبتي ويغفر لي