السلام عليكم ورحمة الله تعالى وبركاته

اللي يحبك عشان شيء معين ، بس يروح هالشي يكرهك..!!
اللي يحبك عشان جمالك ، بس يختفي هالجمال بيتركك.
اللي يحبك عشان جسمك ، بس يخرب هالجسم بيتنازل عنك.
اللي يحبك عشان فلوسك ، بس تروح فلوسك يبيعك.

الحب الحقيقي هو ان الشخص يحب شخص من غير اسباب معينة ، يحبة كذا ومن غير مايعرف الاسباب ، هذا والله الحب الحقيقي اللي يبيع فيه الإنسان كل ماوراة ودونة عشان يتمسك فيه.

سبب طلاقك ماكان عشان موضوع النفقة او انك طلبتية فلوس ، موضوع طلاقك هو لأنه ماعرف يستغلك او يستفيد منك ، ولما حس انك مفتحة وتبين نفقتك (وهذا حقك حتى لو كنتي موظفة) تعامل معاكِ بنيتة الخسيسة وطلقك لانه عرف انه ماراح ياخذ شي منك.

بقولك قصة صغيرونة حصلتلي شخصياً
أتصل علي زوج أختي مرة ، ف قالي أبي اقابلك في موضوع ، ف قلت له حياك الله المجلس ، قال لا خليها برى !! فقلت له خير فيه شي خوفتني ترى ؟؟ قال لاتخاف كل الخير ان شاء الله ، ف رحتلة وتقابلنا في "كوفي شوب" ف قالي يا متفائل انا رجال موظف والله رازقني من فضلة ومقتدر ، وزوجتي (اللي هي اختي) موظفة في التعليم ، وحالتنا جداً طيبة ومرتاحة ولله الحمد ، بس عندي مشكلة معاها ، فقلت له خير شفيه ؟؟ قال كل ما اجيها اعطيها نفقتها ترفضها بحجة انها مو محتاجتهم ومتنازلة عنهم ، وانا رجال اخاف الله ، واخاف اموت والله يسألني عن نفقتها ، ف حتى لو مهي محتاجتهم لازم تاخذهم مني تحقيقاً لما امر الله ، وانا عجزت عنها ف قلت اجيلك لانك اقرب واحد من اخوانها لها يمكن تقنعها تاخذهم..!! بصراحة كبر بعيني واجد.

رحت كلمت اختي ورفضت ف البداية وقلت لها ان الموضوع ديني اكثر من انه يكون موضوع عدم حاجة او كذا ، ف قالت خلاص اذا هو بيعطيني نفقة خله يسويلي وقف خيري بقيمة النفقة يمشيلي طول العمر ، ف قلت خلاص اتفقي انتي معة على كذا وشوفي وش يقول ، ف قالتله ووافق على ان نفقتها تروح للاوقاف الخيرية.

ف شوفي الفرق بين الزوج اللي يخاف الله ، وبين الزوج اللي مايخاف الله
بين اللي يعرف الحق ويمشي علية ، وبين اللي ينكر الحق ويمشي بخلافة.

اقولج شي يامتفائلة!! اذا بتندمين اندمي على رجل حقيقي بكل معنى الكلمة.
او اندمي على ايامك اللي قضيتيها مع واحد سخيف وخسيس مثل هذا حطم حياتك عشان وصخ دنيا.

أتصدقين انا مرتاح من طلاقج ، وجداً متفائل ، وادري انك راح ترتاحين مستقبلاً بس تروح منك الصدمة.
حتى والدتي والله جمبي اسولفلها عن موضوعك تقول من كل قلبها " ياعلة مايعَود" وفراقة عيد وسعد.

كل اللي لازم اتفكرين فيه الحين كيف تبدأين حياة جديدة ، خصوصاً ان ماعندك اولاد منة والحمدلله.
استانسي وافرحي والبسي واكشخي وبيني للناس كلهم انك مو ندمانة على اللي صار وانك انتي الكسبانة ، واحضري افراح وخلي كل الناس يشوفونك ، وعيشي مثل ماكنتِ عايشة عند اهلك قبل الزواج.

ولا تخافين ترى الطلاق ما يحققة الله للبشر إلا من منطلق (الطيبون للطيبات ، والخبيثون للخبيثات) فإذا حصل الطلاق تأكدي ان الله سبحانه وتعالى بيفصل الخبيث عن الطيب والطيب عن الخبيث ، وبيرزق الطيب طيب مثلة ، وذاك الخبيث بيسلط علية الخبيثة اللي مثلة.

هذا معنى الطلاق ترى وهاذي حكمة الله منة.

فهل انتي تشوفي نفسك طيبة ام خبيثة ؟؟
اذا كنتي تشوفين نفسك طيبة ، ف أبشرك بالطيب اللي بيجيلك لحد عندك.


لاتضايقين وانا اخوج ، وأولاً واخراً رضا رب العالمين اهم ، والدنيا حلوة ، بس نعيشها بتفاؤل.

الله يارب يهون عليك اللي بقلبك ، ويريح بالك ، ويكشف عنك الهم والغم ، ويبث في قلبك الرضا والسعادة.

__________________
استغفر الله واتوب إليه