رد : انقذوني
ماشاء الله تبارك الله يعني انت ولجين بتجهزون فطور حق العائلة يوم الإثنين طيب يابو خليفة على كذا انا اشوفك منحاس بالمرة بالشغلة انا اقترح عليك تصلي صلاة الفجر وتطلع من المسجد ولجين تكون صلت وتجهزت وتمر عليها وعلى طول بوجهك على بيت اهلك ولا يردك إلا المطبخ وشوفوا شغلكم من الفجر علشان تخلصون بدري وحتى لجين لو ماتعرف لطبخ خلها تسليك بالسوالف وانت خلص الشغل
شوف انا عندي اقتراح اسهل واحسن وهو مادام ان الوالدة الله يطول بعمرها مصممه على انه لجين اللي تطبخ لها وانت قررت تساعدها عندي لك شور وهو جد الجد وليس مزح
اطبخوا الوجبات عندكم في البيت يطبخونها الطباخين وخلهم يسنعونها ويضبطونها ويطبخون وجبات تختلف من صنف لآخر وانت شيل القدور حقت اهلك وجيبها للبيت وان امكن روح شيلها من ليلة الأحد علشان الطبخ يكون فيها وبعد مايخلصون الطبخ شيلها على السريع لبيت اهلك وحط القدور على النار وفي كل قدر ملعقة وخفض النار ونادى على الوالده وخل لجين توقف وتحرك في القدر بالملعقة والبسوا ملابس المطبخ وافرك فيها شوية بصل وشوية صلصة وشوية ثوم وبهار وشمر عن سواعدك وامسك الملعقة الثانية في ايدك ونادي للوالدة وقول لها تعالي يايمه شوفي ايش رأيك اليلة بالفطور كيف تتوقعين بتطلع السفرة وحركوا القدور قدامها وقطعوا الخضار والفواكه علشان هي تنبسط وارفع الصفارة اللي بقدر الضغط وخل كل الأدوات الكهربائية بالمطبخ تزمر زمير
عاد هاذي خطة ان شاء الله انها تناسبك وبقول لك كلمه واتمنى انها ماتضايقك المفروض ان الوالدة الله يحفظها وهي تدري ان زوجتك ما تتقن الطبخ ولا عندها خلفية عن المطبخ انها ما تطلب هالطلب من لجين ولا تسمع كلام زوجات اولادها الباقين وكمان هي تعرف عن وضع وظروف لجين لاكن مادام ان امك الله يحفظها لك اللي طلبت هالطلب من لجين تستاهل ولأجل عين تكرم مدينة وان شاء الله ان لجين تقوم بالواجب وازود وماراح تقصر وتكون بنت سنافيه وسنعة وماراح تفشلك ولا تخيب ظن خالتها فيها وبالتوفيق لك وللجين يارب .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله