حبيباتى

كل سنة و انتو طيبيين و بالف صحة و هنا و عيد سعيد عليكم باذن الله


نعومتى
قريت كلامك اكثر من مرة و مع كل مرة قلبى يتعصر من الالم اللى تخيلته كان فى قلبك وقتها و يوم الولادة
انا مش عارفة ليه كنت بحسك لما بتدخلى و انتى حامل كأن فى شئ سادد نفسك و ارجعته انك مش عاوزة تكلمى كتير عن حملك من باب انه لا جديد مثلا مش عارفة
بس اخر مرة قريت كلامك حسيت بفرج ربنا
انك استحملتى و شكرتى و رضيتى بقضاء ربنا و دا فى حد زاته نعمة من الله و ربنا يكرمك على اد احتسابك بخير تشوفيه فى حبيبى شهيد
ربنا يحمهولك من اى شر و يباركلك فيه و يكون زرية صالحة باذن الله و متشوفيش اى شر فيه ابدا يا رب


حلومة حبيبتى
فكرتينى بنفسى و انا بدعى ربنا وبعد الصلاة فى اسبوعين الانتظار عمرى ما انسى اللحظة دى
بقيت بنده على ربنا مش بدعىه لأ بنده عليه بصوت عالى عشان يسمعنى كأنى بقوله شوفنى انا اسمعنى انا ، انا هنا عاوزاك تشوفنى و تسمعنى مش عاوزة اضيع فى وسط كل اللى بيدعيك دلوقتى
كانت عندى حالة هيسترية لانى كنت رابطة حملى و نجاح العملية برضا ربنا عليا اكتر من انى يكون عندى طفل كنت عاوزاه راضى بس
و الحمد لله ربنا عمره ما حيخيب ظننا ابدا بس حتى اذا اخر طلبنا فهو لخيرنا و ان شاء الله الخير جاى جاى لاننا عندنا رب كريم رحيم
نحمدك و نشكر فضلك علينا يا رب


هالة بصى ممكن تكون نور جبانة انا كريم ابتدى يحبى لما تم سنة بالظبط و مشى كان عنده سنة و 4 شهور تقريبا بس اللى فاكراه ان تطوره كان اسرع من كرمة بكتير اللى ابتدت تحبى بدرى كانه كان بيعوض اللى فاته
و كنت لما اسمع كلام الدكاترة تقول ان الطفل يعتبر مشى اذا سند و مشى و انتى بتقولى انها بتمشى معاكى و انتى ماسكة ايادها
اديها فرصة انها تكسر حاجز الخوف اللى جواها و ان شاء الله حتعوض كل اللى فاتها


كريستالاااااااااااااااااااااااااااااااا
نعم؟!!!!!!!!!!!

و انا بقرا كلامك كنت متوقعة انى حقرا اسمى مش عارفة ليه بس لما قريته بطنى وجعتنى
اقولك على سر انا شايفة انى اقل من انى اكون ام عاوزة اعملهم حاجات كتير فى التربية و بترسى على "مالك مربى قال من عند ربى" يعنى لا اسس تربية ولا بطيخ و بيجيلى حالات من الخوف لاكون بعمل غلط و العيال تتطلع بايظة ولا معقدة ولا ولا ولا
ربنا يسترها عليهم
حتى ضربت مثل من كام يوم لجوزى (و باعتبارى بحب الكلاب) قلتله اذا الواحد جاب كلب فى بيته لا يحسن معاملته يا يطلق سراحه و انا مش قدها شكلى كدة
فقالى خلاص اطلقى سراحهم ههههههه

بس اذا (الله حى التالت جاى) مش حزعل لان ربنا اللى خالقنى هو ادرى بيا منى لكن انا مش حسعى ليه
و قل لن يصيبنا الا ما كتب الله لنا

بس برضو حتضربى و ابقى اتغطى و انتى نايمة ماهو متحلميش انتى و البس انا

رورو حبيبتى
ان شاء الله ربنا يفرح قلبك و يرحمك من الكلام الرخم اللى شربناه كاسات
الناس مبتسبش حد فى حاله و لو الواحد مشى ورا كلامهم حيلبس فى اقرب حيطة
ربنا يفرح قلبك يا رب


باقى البنات القمرات
كل سنة و انتو طيبيين
مع الاسف شهر الخير بيودعنا
عندى احساس ذى ما كانت ماما معايا هنا فى الكويت و بودعها فى المطار و هى سايبانى و راجعة مصر
كنت حاسة كأنى ماسكة فى ديلها و بقولها متسبنيش
كان نفسى يطول الشهر الكريم اكتر من كدة بس دا حال الدنيا الايام الجميلة عمرها قصير

ان شاء الله ربنا يبلغنا رمضان اللى جاى و احنا بخير و بصحة لينا و لبلادنا و امانينا كلها متحققة


بحبكم فى الله يا احلى اخوات

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة