لاسف لم تحبها و ظلمتها وظلمت نفسك من البدايه والزوجه اكثر شي يقرهها و يقتلها عدم حب زوجها لها حتى لو حاول يمثل عليها
زوجتك صدقني مقهوره والمرض والتوتر الي كانت فيه اثر عليها كثير وبالنسبه لمساله النظافه ترى صعب التوفيق واكثر البيوت فيها خدم ومره فيها غده كان بامكانك ترحمها وتجيب لها شغاله وتخليها تتفرغ لك ترى المره ماهي سوبرمان تقدر على كل شي
وقطع المصروف ظلم ياخي تبيها تشحذ من الشارع ولا تسرق من بوكك يعني علشان ولي امرها وزوجها وقايم عليها تقوم تتسلط عليها اللهم لاتسلط علينا من لايخافك فينا ولايرحمنا جد هالموقف ضايقني وخلاني اتحامل عليك
علاقتها مع اهلك ماقدر اجزم اذا كان الخطا منها او من اهلك انت خلك عادل ووازن الامور
تهديدك بالطلاق خطا بنات الناس ماجو من الشارع كل شوي الواحد يهدد بطلق مو على اساس العصمه بايد الرجال اقوم اهددهها قوم سلوكها بما جا بالدين اهجرها بالمضجع ناقشها صارحها فهمها
سالفه انها ضربتك وسوت مكيده هي غلطانه وكبرت الموضوع والمحاكم المفروض تكون اخر خطوة
اطلب لقاءها وروح لها بيت اهلها وتناقش معاها
اذا ماقتنعت واصرت على الطلاق شوف وضع الاولاد واهم شي الاولاد مايضيعون وسط هذا كله
انا اقول خلها فتره عند اهلها تهدى اعصابها 17 سنه مو شي اكيد بتشتاق لك وبتحن وساعتها بترجع لك
لا تستعجل بالطلاق والله يهديكم اثنينكم بينكم اطفال ولا اشوف اسباب قويه ادت لهل المشاكل الكبيره
اعوذ بالله فعلا الشيطان لما يوسوس مصيبه واحب عمل عنده الطلاق
صدقني من مطلقه الطلاق صعب على كل الاطراف مؤلم جدا جدا احسه حل دائم لمشكله مؤقته