رد : بنات ارجو ان اجد منكن الاجابه ......
السلام عليكم ورحمة الله تعالى وبركاته
اولا حمدالله على سلامة بنتك يا اونا وماتشوف شر بعون الله واعتذر عن تأخري عنك والله اني ماشفت خبر بنتك إلا متأخرة طبعا لقلة تواجدي في المنتدى والله يابنت الحلال حصلت لي شغلة ومضغوطة حدي هالأيام لدرجة إني صاير عندي حالة إكتئاب وشكلي بنفجر في اي لحظة عندي بنت سجلتها في المدرسة وجايبة لي الجنون وتعبت معاها ماتبغى المدرسة وعندها خوف منها غير طبيعي والحين انا وهيه في كر وفر والله يعينني عليها وربنا يشرح صدرها ويسرامرها ويحبب قلبها ويعلقه بالمدرسة وحب العلم الصراحة عجزت معاها مرة بالشدة ومرة باللين طلعت لها كل العيون الحمراء والصفراء والخضراء وللحين انا وهي مرة تروح بالرضا والترغيب ومرة بالشدة والترهيب وخليها بس تستوي بالمدرسة وارجع لكم ان شاء الله
داومت اول اسبوع وتقول خلاص ابغى افصل من المدرسة يعطوني شهادتي وابغى افصل واجلس في البيت والحين بيني انا وهي اتفاق تخلص الصف الأول وتاخذ الشهادة وتبغى تفصل من المدرسة نهائيا وانا قايلة لها ان شاء الله يصير خير بعد والحين البنت مصدقة حالها كل يوم الصباح تبتدي تتكاسل وتبكي وتتمارض واذكرها بالوعد وتروح واحيان اضغط عليها واوديها للمدرسة انا بس اطلع من باب المدرسة والتفت إلا وهي لازقة بظهري طالعة وراي وامسكها وارجعها اخر شئ عصبت وقلت لأبوها والله ماعاد اودي بنتك تبغى تدرسها وديها انت المدرسة شيل بنتك واذلفوا من وجهي وشالها ابوها ثالث يوم ورابع يوم وداها للمدرسة طبعا ابوها باله طويل ويعرف لها وخامس يوم كان فيه حفل ختامي لطالبات التمهيدي وقالت لهم المدرسة لازم الأمهات يحضرون للحفل وجتني تحبحب فوق راسي وتعتذر وابوها يتوسط وبعهود ومواثيق والتزامات منها انها ما تغلبني ولا تخليني اعصب وافقت ورحت معاها والحمد الله الأمور مشت وهذا الأسبوع يوم السبت يمكن طلعت مية حبة شيب براسي او اكثر بعدها داومت مع السواق ومعاها بنات جيراني واليوم داومت مغصوبة بس الحمدالله روحت فرحانه ومبسوطه اليوم وتمدح في المدرسة طبعا انا رفعت معنوياتها ووعدتها بحفلة لنجاحها وهدية وحسيت انها انبسطت بس عاد بكرة مدري كيف بيكون شعورها والله اني ادعي لها ان الله يحببها في المدرسة ويصلحها واستودعها الله لاكن والله انها تروح للمدرسة وانا في البيت قلقانة عليها ومشغولة خايفة عليها وفي نفس الوقت احس إني اقسى عليها شوية بتعاملي من ناحية المدرسة الطيب والحنية احسها ماجابت نتيجة لو جيتها بالطيب تزيد في دلعها وحركاتها لاكن لو حزمت عليها احس انها تتعدل لاكن تبقى في نفسي غصة عليها بس ما احاول اظهرها لها علشان ماتلعب على هالوتر
معليش يا اوناا دخلتك معاي بمتاهة وانتي اللي فيك مكفيك الله يعينك ويسهل لك امرك ويفرج همك يارب
معليش لا تحسبين إني اقفيت عنك او عن موضوع جارتك والله انك في بالي بس منتظرة الاقي فرصة وارجع لك هنا وهناك بس الوقت والمشاغل ماخلتنا نتنفس هالأسبوعين بالذات علية ضغط مو طبيعي لاكن اوعدك مجرد ما افضى برجع لك واكرر منك اعتذاري وتأكدي إني لو غبت عن مواضيعك بمشاركاتي ماراح اغيب عنك بقلبي ولا راح انساك من دعواتي انتي اخت عزيزة وغالية على نفسي ومقامك غالي الله يحفظك ويسعدك ويوفقك في حياتك وصلي بوساتي لأطفالك الحلوين حمودي وفوفو وروان واستودعك الله الذي لاتضيع ودائعه .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 09-09-2012 الساعة 08:53 PM