انت بس يبا لك حزم معاها....

إذا كانت الزياره عصريه بقول يلا مب مشكله نمشيها لها... بس الزياره تكون من العشاء لبعد الفجر... عفوا هالشي احسه غلط...

الحزم ينفع مع زوجتك... انت بنفسك قلت انها تتصل لأهلها يمرون ياخذونها و بعدين يوم يوصلون تردهم و تقول خلاص... يعني هي اساسا مسويه حركه الشنطه لي ذراع فقط لا غير...

صعب من كل يوم تخليها يوم واحد في الأسبوع... انت تقدر تخلي لها خيارات تناسبكم انتو الإثنين...
الخيار الأول: يومين زياره في الأسبوع... بس الحد الأقصى يكون الساعه عشر المساء (مبيت ممنوع)
الخيار الثاني: زياره وحده في الأسبوع و تكون بنظامها الحالي... بعد العشاء إلى الساعه عشر الصبح... تفطر معاهم و تمر تاخذها...

في جميع الأحوال... انت محتاج تكون حازم و شديد معاها... يتيمه ما قلنا شي... بس عاد عمرها 24 سنه... خلصت سن اليتم على ما أظن... و الحين هي متزوجه و مسؤوله عن اسره... و لازم ترتب اولوياتها...

اللي فهمته انها الحين في بيت اهلها...
انزين 1- هي ما رضت ترجع معاك لأنها زعلانه أو لأنها تبي الفله او شو بالضبط؟

2- انت وافقت على بقائها الحين؟

إذا كانت الإجابه نعم زعلانه و تبي الفله على السؤال الأول و "لا" على السؤال الثاني... يا اخوي من هني ابدأ الحزم...

انت رحت لها و قلت لها ترجع... و مع هذا رفضت... خلالالالالالالالالالالالاص انتهى دورك... و لا تخاف على عيالك في الحفظ و الصون ان شاء الله تعالى... طنشها و لا ترسل و لا شي.... لأنها اصلا محصله تنبيه على هالموضوع و مع هذا كررته.. فخلاص انك تروح تحاول ترجعها احس كأنك يا بو زيد ما عزيت... و ترجع لنفس الدوامه معاها.... طناش تام لها... و عيش حياتك بالطول و العرض (تمثيل طبعا لأني عارفه انك متضايق من الداخل).. بناتك لا تقصر معاهم في المصروف و لكن مب نقدا.. انت تشتري الأشياء و توصلها لها هناك... خلها في الفله و الوناسه ليما تشبع و تعرف انك مستغني دامها مستغنيه... و الله انا مب قصدي شي... بس ما احب اشوف وحده مكلمينها أكثر من مره في نفس الموضوع و مع هذا يتكرر... يعني سالفة المبيت برع البيت هذي مب مقبوله ابدا...

المصروف اللي انت شوي زعلان منه... هذي انا مب معاك فيها... لأنك مب عارف كيف تتصرف في هالنقطه... هي دفعت لفلان و علان مب مشكله... بس انت ترجع تعطيها ليش؟؟؟ خلاص هي دفعت.. خلها تتحمل قلة المصروف لين الشهر الياي... و بتتعلم بعدها انها تدفع في اوقات معينه مب على الطالعه و النازله... أما انك ترجع تعطيها و تزعل بعد... يعني يا خوي محد غضبك ترجع تكمل النقص المالي في مصروفها و لا أحد جبرك عليه... انت تسوي هالشي من نفسك.. فلا تشتكي...

ارجع و اقول... زوجتك محتاجه حزم و حزم و حزم... بس بدون عصبيه و صراخ... بجديه فقط...

و يا ليتك تنسى موضوع انها يتيمه فتره رجاءا.... لأن المفروض كل شخص يكون مسؤول عن قراراته و حياته.. اتمنى انك فهمت اللي اقصده يا اخوي...