رد : بنتي الصغيرة وما تعانيه
اقتباس:
المشاركة الأصلية كتبت بواسطة العـ/الفريد/ـقد
يا ربي تحفظها باين عليها حبيبه مره
شوفي اختي أم سلطان انت عندك عيال وتعرفين في هالأمور وما تخفى عليك
لكن خوفك الزايد موترك
الزبده حطي نفسك مكانها وعيشي خوفها
العقلانيه ما تنفع مع طفله صغيره
يعني قفلنا الباب ورحتي ورجعتي وش المشكله أنا أفتحه وهالأمور ما تمشي معها
ريحي قلب بنيتك وسوي مثل ماتبي منك
صحيح بتكون هالفتره مزعجه بس هي أهم وصحتها النفسيه أهم شي عندك وأنا ما أشك في ذلك
لذلك سايريها هالفترة وروحي معاها ولا تدققين وتحسسينها انك فاهمه انها خايفه
اصرفي نظرها عن هذا الخوف وحطي فكره ثانيه إيجابيه مكانها
في البيت إذا شفتيها صاحيه خذيها ان دخلتي المطبخ خليها تساعدك
ان سويتي أي شغله خليها موجوده ...
إن صدف وفقدتك وبكت سوي مسلسل فوق راسها ونسيها البكا
قولي تصدقين الشغله الفلانيه اللي أحبها مالقيتها .. انت اللي وين كنتي أنا كنت أدورك أبيك تساعديني
ولا سوي انك تركضين ورا واحد من عيالك وضحكيها عليكم وسوي شوية حركات آكشن
المهم أشغلي مخها قدر المستطاع عن فكرة الخوف ذي
أما لا تخافين ومافي شي يخوف وهالكلام ما ياينفع الله يصلحهم ويهديهم
يبيلنا ننزل بعقولنا لمستوى تفكيرهم وهذا متعب لنا احنا الكبار ومو كل وقت رايقين
لكن الله يصلح الحال..
|
حياك الله اختي الغالية العقد الفريد والله يسلمك يارب الحمدالله انا ابتديت هالأيام اطبق بعض من ماقلتيه هنا وان شاء الله اني اطبق الكلام كله وبإذن الله انها تتحسن هي قبل فترة كانت تخاف من الظلمه ولما تجي تنام تطلب مني اني ما اطفئ الضوء عنها بس رجعت الحمدالله الوضع عندها الحين صار عادي انطفى الضوء او اشتغل كله واحد عندها الا لما تنطفئ الكهرباء كامله هنا كل الأسرة تفزع وتعالى واسمعى التعليمات وانا اصيح كل واحد منكم يمسك مكانه ولايتحرك الين اجيب الجوال واشعل لهم الكشاف عندي كمان لمبات شحن بالبيت بس بعض الأوقات تكون غير مشحونة فنتظر لكشافات اجهزة الجوالات بس هي الحمدالله الحين ماعندها غير مشكلة الباب ومشكلة نفورها من الطلعة مع ابوها واخوانها يعني تخيلي عندي موعد للمستشفى عند الدكتورة ومصممه انها تنزل معاي وتدخل معاي وانا اخاف عليها مناعتها ضعيفة والمستشفيات كلها امراض ارفض نزولها معاي من السيارة واقول لأبوها واخوانها حاولوا تلهونها بأي شئ حتى انا انزل من السيارة ولو خلصت اعطيكم مكالمة وقابلوني امس كنت تعبانه مرة ورحت لطوارئ وحالتي حالة نزل معاي ولدي الكبير وابوها شالها هي واخوانها هي كانت مصممه تبغى تنزل معاي وانا مافيني شدة لها قلت لها شوفي الحارس العسكري اللي على الباب ماراح يسمح لك بالدخول المهم قبلت العرض على مضض وراحت مع ابوها واخوانها الباقين وداهم السوق السوبر ماركت وتقضوا منه وعقبها غثت ابوها وديني عند امي بشوف امي المهم ابوها جلس يلفلف فيها بالسيارة على مبنى المستشفى ويقول لها الحين ادور لك باب سري صغير على قدك وادخلك منه بس اصبري علينا حتى نلاقي هالباب او يفتحون لنا باب من الأبواب الصغيرات هاذي المقفله وادخلك منها تشوفين امك وهي صدقت ياعمري عليها حتى انا خلصت واتصلت عليهم وقلت لهم قابلوني انا خلصت ولما رجعت قلت لها ليش مالحقتي وراي داخل المستشفى كنت انتظرك هناك هي قالت يا امي كل ابواب الصغار مقفله والحارس واقف عند الباب ماراح يخلينا ندخل لاكن ابوية وداني السوبر واشتريت لي ولك عصير وبسكوت وعلك وقامت تناولني الكيس وتقول اختاري اللي تبغينه هي حبوبة وطيوبة وحنونه لاكنها حساسة لدرجة صعبة ماشفت حساسيتها كلها في اخوانها الباقين حتى اخوانها الباقين لو تزاعلت معاهم وجو يراضونها مستحيل ترضى إلا لما يبوسون راسها ويقولون لها آسفين وهي تسوي مثلهم لو حست بالغلط منها
يعني لو هي غلطانه تعتذر لهم اما لو فيه احد غلط عليها مستحيل عاد تكلمه او تجلس معاه حتى لو قدم لها اي إغرائات من لعب وحلويات واي شئ مستحيل انها ترضى إلا لما يعتذر لها امام اهل البيت اختها اكبر منها اخوانها يزعلونها لو يعطونها كيس شيبس اولعبة من لعبهم تلعب فيها على طول ترضى وتلعب معاهم لاكن الصغيرة مستحيل ترضى قبل يبوسون راسها ويتأسفون لها
عموما غاليتي شاكرة لك مجهودك ومشاركتك وارجوك لو عندك مزيد من المعلومات والخبرة اتحفينا فيها وانا ما استغني عن نصايحك ابد بل والله انها تزيد تنورني وترشدني لطريق الصحيح وتفتح عيوني على شئ انا غافلة عنه بالرغم من ان عندي عيال غيرها لاكن اللي خارج المشكلة يرى ويعطي حلول غير عن اللي واقع فيها فلا تحرمينا نصائحك وتوجيهاتك الطيبة بارك الله فيك وفي ذريتك واقر الله عينك ببر وصلاح أطفالك يارب وربنا يبلغك فيهم كل خير بإذنه تعالى وجزاك الله خير يالغالية .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 14-10-2012 الساعة 01:17 PM