تطلقت اختي من 13 سنة او 14 بعد ولادة أبنها فيصل على طول
وقبلها كان عندها بنت عمرها 3 او 4 سنوات ، والحين البنت عمرها 17 سنة والولد 14 سنة (تقريباً)
والله يحفظهم امهم ربتهم أحسن تربية بمساعدة أبوي (جدهم) وبمساعدتنا (خيلانهم) حيث أننا عوضناهم عن حنان الأب بشكل كبير
وتبارك الله متفوقين بدراستهم ودائماً من الأوائل ، ونحسبهم صالحين والله حسيبهم.

سبب الطلاق
هو سوء أخلاق زوجها وإنحرافة ، كان دايماً يضربها (ماكانت تقولنا) ومايعاملها معاملة طيبة أبداً ، بذئ لسان ، يخونها ، راعي سفرات ماجنة (مرة أختي وهي ترتب شنطتة بعد مارجع من سفرتة لقت فيها صور بنات وشيء اخر استحي اقولة) ، يشرب خمر ، كذاب ، مستهتر ، وجبان درجة اولى ، وقولي اللي تبينة من اشياء وصخة كل شي راكب علية ولازال.(الله يهدية)

للأسف انه من العايلة (أبوة ولد عم أبوي) ، وعندنا قانون غبي جداً اسمية انا قانون الكفر والظلم (أستغفر الله العظيم)
أن الهاشمية الحسينية (وهذا هو نسبي) ماتاخذ إلا هاشمي حسيني وإلا حسني ، وغير كذا تحلم تتزوج من برا لو تقعد عانس طول عمرها!!

أقسم بالله شفت ظلم بالدنيا بس مثل ظلم هالقانون اللي سنتة أعرافنا وعاداتنا وتقاليدنا ماشفت!!
أختي كانت رافضتة رفض قطعي من اول ماخطبها لكن أبوي الله يسامحة أجبرها عشان مايزعل ولد عمة.

والحين أبوي ندمان شديد الندم كل ماشافها او شاف أولادها ومن كثر ندمة دايماً يطلبها السموحة!!

أذكر مرة من المرات كنت جالس في البيت الحالي وأهلي كانوا في البر (نادين) وجتني أختي هاذي داخلة البيت تبكي وفي فمها دم ، فقعدت أهديها (أنفجعت) فأقول لها أشفيك؟؟ تقول مافيني شي وين أمي ؟؟ يابنت الحلال إشفيك؟؟ رفضت تقولي!! ماحسيت إلا ولد عمنا (زوجها) داخل علينا البيت يصرخ يناديها ويشتمها!! أقسم بالله العظيم لاشعورياً لقيت نفسي فوقة أضربة لين شبعت منة طق ومافكة إلا أنه هرب بسيارتة!! ولقيت أختي تحضني وتبوس راسي والله موقف أثر فيني ولازال مأثر فيني!!

كان عمري وقتها 16 سنة تقريباً!! صحيح أن اللي سويتة يمكن يكون غلط نوعاً ما!! بس من شفتة مو محترم حرمة البيت ، ولاهو معبرنا ، ومن أستنتجت ان هو اللي ضارب أختي جنون الدنيا أركبتني!! خصوصاً أنها كانت حامل وعلى وجة ولادة ولا رحم ضعفها.

بعد ماولدت قالت مابية وما ارجعلة واطلقوني منة!! وكانت أعيونها أطالع فينا يا اخوانها
وطلقناها منة غصباً علية وهو صاغر لما خبرتنا أمورة وسوالفة.

الغريب بالموضوع أن من تطلقت منة أختي ولا عمرة جاب لهم حليب او حتى حفايظ او حتى مصروف والأغرب من هذا انه حتى بالعيد مايفكر يشوفهم ، وأولادة حيل صالحين تبارك الله ، لكن سبحان الله مقرود والله قاردة مايبيهم.

البنت بعد كذا كل ماشافت أبوها في مكان تصد عنة ماتبيه ولا تبي اتسلم علية ، وأختي اتهاوشها وتقول لها هذا ابوك مايجوز كذا روحي وسلمي علية!! ترد عليها وتقول أبو بالأسم انا مابية!!

الولد كذلك يصد عن أبوة ومايطيقة بشكل غريب!! مع أن أختي حيل توصيهم على أبوهم ، وحنا والله أحياناً نجبرة يسلم علية اليا شافة في مناسبة!! بس يبان حتى من وجهة انه مايبية!!

ولد عمنا هذا أفصلوة جهة عملة من فترة كبيرة بسبب الغياب وصار عالة على أخوانة "الصغار" يصرفون علية.

الله يهدية إن شاء الله.

__________________
استغفر الله واتوب إليه