اللي جالي من اهلي كان خير علي ..

بس الامور هذه انتبهت لها من قبل رمضان .. و كنت باصلحها مع نفسي ..
يعني مو عشان الموقف الاخير الي حصل من زوجي ..

انا كنت محتاجة لوقت عشان نفسيتي تتعدل بعد موت امي ..
كان من المفترض انه زوجي يصبر و يوقف معاي .. خاصة اني كنت اقول له كل مرة
سامحني .. تعبانة ..

الدليل اني كتبت موضوع هنا بعنوان هل من فجر قريب .. لاني عارفة اني ثقلت على زوجي ..

الفترة هذيك هو كان مضغوط ماديا و اهله كانوا يتريقوا عليه لانه كان عاطل ..
قالوله اخواته مرة انت الحرمة و زوجتك الرجال .. هي قايمة بكل شي بالبيت و انت عالة عليها

و انا مليت من سهره .. و كنت اقوله خلاص امي ماتت و اهلي انقلبوا علي ..
و انت رامي كل شي علي .. و البيت معتبره فندق لك ..
خلاص مابقي شي عندي اخسره ..
اتركني انت كمان .. انا ماني بحاجة لاي احد .. و لا بحاجة لك ..

ماكنت ابغى احسس حالي او احسس اي احد اني انكسرت بموت امي ..
ماكنت ابغى زوجي يجلس معايا تعاطفا لي ..لانه هو كمان بدأ يتغير لما شاف الوضع كذا
كان على باله مالي اهل .. عشان كذا لما دخلت عمي بالموضوع اخر مرة ( خاف ) و صار يحسب حساب ..

الحمد لله .. دحين رجعت تدريجيا لطبيعتي و رجعت لعلاقاتي الاجتماعية ..
و الفترة الي مريت بها بعد موت امي و بعد الولادة .. كانت فترة طبيعية ..

بس انا بالغت بردة فعلي و كنت اقوله كل مرة ( سيبني )

.
.

لما قريت مشكلة توفي و فيصل ..

اكتشفت اني كنت اعاني من عقدة بسبب امي و ابوي الله يرحمهم ..
افتكرت ابوي مرة من المرات و مع انه كان يحب امي مرة .. بس مرة تخاصموا و انا كنت بالمتوسطة ..
و قال لنا ابوي و اول مرة في حياته كذا يدخلنا بمشاكلهم ..
قال امكم اطلقها .. و جلس يستشيرنا عشان يقهر امي ..

امي كانت ساكتة و ماعمرها بحياتها قللت من احترام ابوي او رفعت صوتها ..
تمنيت وقتها امي تقول له ( طلق )

ابوي يموت بامي الله يرحمهم .. بس الموقف هذا كتمته بداخلي ..
تمنيت وقتها اني اخد حق كل النساء الي يذلوهم ازواجهم ..

كان يقول دحين انادي اخوي و اختي و هما الي يحكموا و يقرروا مابيننا ..
قلت وقتها ببراءة لامي .. ماما ليش ماتخلي عمتي تتدخل و تصلح بينكم ؟
امي كانت كتومة و قالت ماحد يتدخل و يتشمت فينا ..

تخيلت وقتها اذا امي تطلقت .. فين بنروح و عشت الاحداث و تاثرت ..
و تمنيت امي تقول لأبوي ( يالله طلق )

عشان كذا لما تزوجت امي قالت لي .. لو بيوم ماكنت مرتاحة مع زوجك .. لاتحسبي انه بيت امك مافي
انا كنت اسكت عشان امي كانت قاسية و ماعندها بنت تتطلق .. بس انت بيت اهلك فيه و ماحد يكسرك ..

بعد موت امي ..
يمكن صرت انتقم لها من الرجال بزوجي ؟ و صرت اقول له كل مرة .. طلقني مابغى اعيش معاك ..
خاصة انه هو كمان كان خلاص مفقود الامل منه .. لا يبغى يتحمل المسئولية و يبغى يعيش على هواه ..
و يكذب و من وظيفة لوظيفة .. و مادري عن راتبه و لا يصرف مثل بقية الرجال ..

يعني خلاص مابقي عندي شي اخسره ..

.
.

انا برمضان جلست مع نفسي و قلت يابنتي استهدي بالله ..
و رحت كلمته و اعتذرت ننه لو غلطت او زعلته و نويت وقتها مع نفسي اني اعمل الي علي خلاص
و كنت بالعشر الاواخر ادعي له و صارحته من قبل .. انه هو متغير .. صاير جاف و عشان كذا انا كمان
خلاص وصلت لمرحلة يأست فيها منه خلاص .. و ماعاد عندي طاقة اتحمل اي شي ..

.
.

نرجع للسؤالين ؟